އިރާނާ ގުޅުންހުރި ތެޔޮ އުޅަނދުފަހަރަށް އަރައި އެ ތަކެތި ހިފެހެއްޓުމަށް އެމެރިކާގެ އަސްކަރިއްޔާއިން ތައްޔާރުވަމުންދާ ކަމަށް އެމެރިކާގެ އޮފިޝަލުންނާ ހަވާލާދީ ވޯލް ސްޓްރީޓް ޖާނަލް ނޫހުން އިއްޔެ ރިޕޯޓުކޮށްފި އެވެ.
މި ރިޕޯޓުގައިވާ ގޮތުން، އިރާނަށް ކުރިމަތިކުރުވާ ފިއްތުންތައް ވަރުގަދަކުރުމުގެ ގޮތުން ކުރިއަށް އޮތް ދުވަސްތަކުގައި ބައިނަލްއަގުވާމީ ކަނޑުގެ ސަރަހައްދުތަކުގައި ހަރަކާތްތެރިވާ އިރާނުގެ ތެޔޮ ޓޭންކަރުތައް އެމެރިކާގެ ބާރުގެ ދަށަށް ގެނައުމަށް ވަނީ ނިންމާފަ އެވެ.
އެމެރިކާގެ އޮފިޝަލުން ވިދާޅުވި ގޮތުގައި، މި ހަރަކާތްތައް ހަމައެކަނި މެދުއިރުމައްޗަށް އަމާޒުކުރުމުގެ ބަދަލުގައި، މުޅި ދުނިޔޭގެ ކޮންމެ ސަރަހައްދެއްގައި ވިޔަސް އިރާނުގެ ތެޔޮ އުފުލާ ނުވަތަ އެ ގައުމަށް އެހީތެރިވާ އުޅަނދުފަހަރަށް ފިޔަވަޅު އަޅާނެ އެވެ.
'އިކޮނޮމިކް ފިއުރީ'ގެ ނަމުގައި ހިންގާ މި ކެމްޕޭނުގެ މައިގަނޑު މަގުސަދަކީ ހޮރްމޫޒް ކަނޑުއޮޅި ހުޅުވުމަށް މަޖުބޫރުކުރުވުމާއި އިރާނުގެ ނިއުކްލިއާ ޕްރޮގްރާމާ ގުޅޭ ގޮތުން އެ ގައުމުން ދޫދޭނެ މަގު ފަހިކުރުމެވެ.
އެމެރިކާގެ ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކެއިން ވިދާޅުވި ގޮތުގައި، އިރާނުގެ ދިދަ ޖަހާފައިވާ އުޅަނދުތަކާ އަދި ދަތިކުރުމުގެ ފިޔަވަޅުތަކުން ރެކުމަށް މަސައްކަތްކުރާ 'ޑާކް ފްލީޓް' ނުވަތަ ސިއްރު އުޅަނދުފަހަރު ހޯދައި އެ ތަކެއްޗާ މެދު ހަރުކަށި ފިޔަވަޅު އެޅުމުގައި އެމެރިކާ ފަހަތަކަށް ނުޖެހޭނެ އެވެ.
މިހާތަނަށް ވެސް އިރާނުގެ ބަނދަރުތަކުން ނުކުންނަން އުޅުނު 23 އުޅަނދެއް އެމެރިކާއިން ވަނީ ހުއްޓުވާފަ އެވެ. އޮފިޝަލުން ހާމަކުރެއްވި ގޮތުގައި، ޗައިނާ ފަދަ ގައުމުތަކަށް ތެޔޮ ފޯރުކޮށްދޭ އުޅަނދުތައް ހިމެނޭހެން، ދުނިޔޭގެ އެކި ކަންކޮޅުތަކުގައި މިފަދަ އުޅަނދުތައް ޓްރެކްކޮށް ހުއްޓުވުމުގެ މަސައްކަތް އިތުރަށް ފުޅާކުރާނެ އެވެ.
މި ނިންމުން އައިސްފައިވަނީ ހޮރްމޫޒް ކަނޑުއޮޅީގައި އޮތް ނުތަނަވަސްކަން އިތުރުވެފައިވާ ދަނޑިވަޅެއްގަ އެވެ. އެ ސަރަހައްދުގައި އިރާނުން ވަނީ އުޅަނދުފަހަރަށް ހަމަލާދީ، ކަނޑުއޮޅީގެ ކޮންޓްރޯލް އިއްޔެ ވަރުގަދަކޮށްފަ އެވެ.
ވޮޝިންޓަނުން ބުނާ ގޮތުގައި، މި ފިޔަވަޅުތަކުގެ ބޭނުމަކީ ކުރިއަށް އޮތް މަޝްވަރާތަކުގެ ކުރިން އިރާނަށް އިގްތިސާދީ ގޮތުން ބޮޑެތި ޕްރެޝަރުތަކެއް ކުރިމަތިކުރުވުމެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވީ، މަޝްވަރާތައް ނާކާމިޔާބުވެއްޖެ ނަމަ އަސްކަރީ ފިޔަވަޅު އެޅުމަށް އެމެރިކާގެ ފައުޖުތައް އޮތީ އެންމެ ފުރިހަމައަށް ތައްޔާރުވެފައި ކަމަށެވެ.
ނަމަވެސް، އޮފިޝަލުން ފާހަގަކުރެއްވި ގޮތުގައި، ސީދާ އަސްކަރީ ކުރިމަތިލުމަކަށް ދިއުމުގެ ބަދަލުގައި، އެމެރިކާއިން މިވަގުތު އިސްކަންދެނީ އިގްތިސާދީ ގޮތުން ދަތިކޮށްގެން މައްސަލަތައް ހައްލުކުރުމަށެވެ. ނަމަވެސް، ދެ ގައުމުގެ ދެމެދުގައި އަސްކަރީ ކުރިމަތިލުމެއް ހިނގައިދާނެ ކަމުގެ ބިރު ވަނީ ކުރިއަށް ވުރެ ބޮޑުވެފަ އެވެ.