ފުވައްމުލަކު ސިޓީއަށް ރޭ ފަތިހު ދިމާވި ކަރަންޓުގެ މައްސަލަ ހައްލުކުރުމަށް 10 ވަރަކަށް ގަޑިއިރު ނަގާނެކަމަށް ފެނަކަ ކޯރޕަރޭޝަނުން ވިދާޅުވެއްޖެއެވެ.
ފެނަކައިން ފުވައްމުލަކަށް ކަރަންޓު ފޯރުކޮށްދިނުމަށް ބޭނުންކުރާ މައި ޓްރާންސްފޯމަރަކަށް ދިމާވި މައްސަލައަކާ ގުޅިގެން ރޭ ފަތިހުން ފެށިގެން އެ ސިޓީން ވަނީ ފެނާއި ކަރަންޓުގެ ކެނޑިފައެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން ފެނަކަ ކޯރޕަރޭޝަންގެ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދު ވިދާޅުވީ، އެ ސިޓީން ކަރަންޓާއި ފެނުގެ ޚިދުމަތް މެދުކެނޑިފައިވަނީ މައި ނެޓްވޯކުގައި ހިމެނޭ 2500 ކޭވީއައި ޓްރާންސްފޯމަރެއް ގްރައުންޑްވުމުގެ ސަބަބުން ކަމަށެވެ. އަދި މިކަމުގެ ސަބަބުން ސިޓީގެ ގާތްގަނޑަކަށް 80 އިންސައްތައިން ކަރަންޓާއި ފެން ކެނޑިފައިވާކަމަށް ސައީދު ވިދާޅުވިއެވެ.
ސައީދު ވިދާޅުވީ، މި މައްސަލަ ހައްލުކުރުމުގެ މަސައްކަތް ފެނަކައިގެ ޓީމުން ކުރަމުންދާކަމަށެވެ. އެގޮތުން އައްޑޫ ސިޓީން 4500 ކޭވީއައިގެ ޓްރާންސްފޯމަރެއް ގެންދިއުމުގެ މަސައްކަތް ކުރަމުންދާކަމަށް ސައީދު ވިދާޅުވިއެވެ. އަދި މި މައްސަލަ ހައްލުކުރުމަށް ވަގުތު ނަގާނެކަމަށާއި، މިހާރު އަންދާޒާ ކުރެވެނީ މުޅި ސިޓީއަށް އަލުން ފެނާއި ކަރަންޓުގެ ޚިދުމަތް ފޯރުކޮށްދިނުމަށް 10 ގަޑިއިރާއި 12 ގަޑިއިރުގެ މުއްދަތެއް ނަގާނެކަމަށެވެ.
ފުވައްމުލައް ސިޓީގައި ކަރަންޓުގެ ޚިދުމަތް ދިނުމަށް މިހާރު ބޭނުންކުރާ އިންޖީނުގެއާއި، ކަރަންޓު ނެޓްވޯކަށް ދުވަސްވުމުގެ ސަބަބުން ޚިދުމަތް ދިނުމުގައި ތަފާތު ގޮންޖެހުންތަކާ ކުރިމަތިވަމުންދާކަން ފެނަކައިން ވަނީ ފާހަގަކުރައްވާފައެވެ.