މިޤައުމުގެ ހަލާކުގެ އަސްލަކީ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމިން ކަމަށް ޕީޕީއެމްގެ ޕްރައިމަރީގައި ވާދަކުރެއްވެވި އެޕާޓީގެ ކުރީގެ އިންތިޤާލީ ނައިބު ރައީސް އުމަރު ނަސީރު ވިދާޅުވެއްޖެއެވެ.
ޖުމްހޫރީ ގުޅުމަށް މިއަދު ތާއީދުކުރައްވާ ޖުމްހޫރީ ގުޅުމުން މިރޭ ބޭއްވި ޖަލްސާގައި ވާހަކަފުޅު ދައްކަވަމުން އުމަރު ނަސީރު ވިދާޅުވީ ޕީޕީއެމްއަކީ އެބޭފުޅުން އުފެއްދެވި ޕާޓީއެއް ކަމަށެވެ.
"އެހެންކަމުން އަޅުގަނޑު ޔަޤީންކަމާއިއެކު ދަންނަވަން ޕީޕީއެމްގެ މެންބަރުންނަށް އަބްދުﷲ ޔާމިން ގޮވައިގެން 2013 ގެ ރިޔާސީ އިންތިހާބު ކާމިޔާބު ނުވާނެކަން" އުމަރު ވިދާޅުވިއެވެ.
އުމަރު ވިދާޅުވީ މިޤައުމުގެ މަގުތަކުގައި ގެންގުޅޭ މަސްތުވާތަކެއްޗާއި ޔާމިނާއި ގުޅިފައިވާ ކަމަށް ބައެއް ފަރާތްތަކުން ބުނާ ކަމަށާއި، މިޤައުމުގައި ޤަވައިދާ ޚިލާފަށް އުޅޭ ބިދޭސީންގެ ތެރެއިން 40،000 ބިދޭސީން އެތެރެވެފައިވަނީ ޔާމިންގެ "ނޭފަތް" ދަށުން ކަމަށެވެ.
"ރައީސް މައުމޫންގެ ކޮއްކޯފުޅަކީ (ޔާމީން) މި ގައުމުގައި މިއޮތް ހުރިހާ މައްސަލަތަކުގެ އަސްލު. ގަވާއިދާ ހިލާފަށް ރާއްޖެ އަށް އެތެރެވެފައި ތިބި 40،000 މީހުންނަކީ އެމަނިކުފާނުގެ ނޭފަތް ދަށުން އެތެރެވެފައި ތިބި މީހުން. ދިވެހި ރާއްޖޭގެ މަގުތަކުގައި ވިއްކާ މަސްތުވާތަކެތީގެ އެއްޗިއްސާ އެމަނިކުފާނާ ގުޅުން ހުރި ކަމަށް މީހުން ބުނެ އުޅޭ. އެހެންވީމާ އެފަދަ މީހަކަށް، ޕީޕީއެމްގައި ތިބެ، މި ގައުމު ދެކެ ލޯބިވާ އެއްވެސް މީހަކު ވޯޓު ދިނުމަކީ މި ގައުމަށް ވެވޭ ހިޔާނާތަކަށް ނޫނީ ނުވާނެ" އުމަރު ވިދާޅުވި އެވެ.
އުމަރު އެއިޝާރާތް ކުރައްވަނީ ރައީސް މައުމޫންގެ ވެރިކަމުގައި ޔާމިން ލޭބާ މިނިސްޓަރަކަށް ހުންނެވި ދުވަސްވަރު ޤަވައިދާއި ޚިލާފަށް ބިދޭސީންތަކެއް އެތެރެކޮށްފައިވާ ކަމަށެވެ.
އުމަރު ވިދާޅުވީ އޭނާ ޖުމްހޫރީ ގުޅުމަށް ތާއީދުކޮށް ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމިންއަށް ފާޑު ވިދާޅުވި ނަމަވެސް ޕީޕީއެމްގެ ރައީސް އަލްއުސްތާޒު މައުމޫން އަބްދުލް ޤައްޔޫމަށް ކުޑައިމީސްކޮށް އެއްވެސް އެއްޗެއް ވިދާޅުވާން ބޭނުންވާ ކަމަށެވެ.
"އަޅުގަނޑު މިއަދުވެސް ރައީސް މައުމޫނަށް ފުރިހަމައަށް ތާއީދުކުރަން. ރައީސް މައުމޫންއަކީ މިޤައުމުގެ ތަރައްޤީގެ ބާނީ" އުމަރު ވިދާޅުވިއެވެ.
އުމަރު ވިދާޅުވީ އޭނާ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމިންއަށް ތާއީދު ނުކުރައްވަނީ ޔާމިންއަށް މިޤައުމުގެ ވެރިކަން ލިބިއްޖެނަމަ ޤައުމުގެ ތިޖޫރީވެސް "ނުހުންނާނެތީ" ކަމަށާއި، ކޮރަޕްޓް "ބައިގަނޑެއްގެ" އަތްމައްޗަށް ޤައުމުގެ ވެރިކަން ދިއުމަށް ނޭދޭ ކަމަށެވެ.
ޖުމްހޫރީ ގުޅުމުގެ ރިޔާސީ ކެންޑިޑޭޓް ޤާސިމް އިބްރާހިމާއި ރަނިންމޭޓް ޑރ. ޙަސަން ސައީދަށް ވަރަށް ބޮޑަށް ތާއީދުކުރައްވާ ވާހަކަފުޅު ދައްކަވަމުން އުމަރު ނަސީރު ވިދާޅުވީ މިޤައުމަށް މިއަދު ބޭނުންވާ ތަރައްޤީއާ ކުރިއެރުން ގެނެސްދެވޭނެ ބޭފުޅުންނަކީ ޤާސިމާއި ޑރ. ޙަސަންއަށް ކަމަށެވެ.
އުމަރު ނަސީރު ވިދާޅުވީ މިހާރުގެ ރައީސް ޑރ. މުޙައްމަދު ވަހީދު ޙަސަން މަނިކަކީ ވެސް އޭނާ ވަރަށް ބޮޑަށް ތާއީދުކުރައްވާ ބޭފުޅެއް ކަމަށެވެ. ނަމަވެސް ރިޔާސީ އިންތިހާބުގައި ވާދަކުރެއްވުމަށްޓަކައި ރައީސް ވަހީދަށް ރަނިންމޭޓެއްގެ ގޮތުގައި ނެންގެވުނީ ޤައުމަށް "ހިޔާނާތްތެރިވެފައިވާ" ރަނިންމޭޓެއް (ޑީއާރުޕީގެ ލީޑަރު އަހްމަދު ތަސްމީން އަލީ) ކަމަށެވެ.
އުމަރު ވިދާޅުވީ ތަސްމީންއަކީ ޖީއެމްއާރަށް ވިކިފައިވާ ބޭފުޅެއް ކަމަށާއި، ތަސްމީންއަށް އިތުބާރު ނުކުރެއްވޭ ކަމަށެވެ.
އުމަރު ވިދާޅުވީ އޭނާ ޖުމްހޫރީ ގުޅުމުގެ ޖަލްސާއެއްގައި އެހެން ރިޔާސީ ކެންޑިޑޭޓުންނަށް ފާޑު ވިދާޅުވުމުން އެކަން ނުކުރަން ޖުމްހޫރީ ގުޅުމުގެ ބައެއް ބޭފުޅުން ވިދާޅުވެދާނެ ކަމަށާއި، ނަމަވެސް ހަޤީގަތް ރައްޔިތުންނަށް އޮޅުން ފިލުވައިދިނުމަށްޓަކައި އެފަދަ ވާހަކަތައް ދައްކަންޖެހޭ ކަމަށެވެ.
އުމަރު ވިދާޅުވީ ރިޔާސީ އިންތިހާބުގެ ދެވަނަ ބުރަކަށް ޤާސިމް ވަޑައިގަންނަވާނެ ކަމަށާއި، އެހެންކަމުން ދުރާލާ ރޭވިގެން ޤާސިމަށް ހަމަލާދެއްވަމުން ގެންދަވާނެ ކަމަށެވެ. އެހެންކަމުން އެކަމަށް ސަމާލުވެ ވަރަށް ރޭވުންތެރިކަމާއެކު ރިޔާސީ އިންތިހާބުގެ ކެމްޕޭން ރާވަންޖެހޭ ކަމަށްވެސް އުމަރު ވިދާޅުވިއެވެ.
ޖުމްހޫރީ ގުޅުމުގެ ޖަލްސާ ހިނގަމުންދާ މާފަންނު ކުނޫޒަށް މިރޭ އުމަރު ނަސީރު ވަޑައިގަތުމުން ޖަލްސާގެ ހާޒިރީން ވަނީ އުމަރަށް ހޫނު މަރުހަބާއެއް ދަންނަވާފައެވެ.