ދަތުރުވެރިންގެ މާރުކޭޓްގެ ގޮޅިތައް ހަވީރު ހައެއް ޖަހާއިރު ބަންދުކުރަން ހައުސިން މިނިސްޓްރީން އަންގައިފި އެވެ. މާރުކޭޓްގެ ގޮޅިތައް ހިންގާ ފަރާތްތަކަށް މިނިސްޓަރުގެ ނައިބު ހަސަން އަލީ ސޮއިކުރައްވައި މިދިޔަ ބުރާސްފަތި ދުވަހު ފޮނުއްވި ސިޓީއެއްގައި ވަނީ ވަކި ގޮތެއް އަންގަންދެން މާރުކޭޓްގެ ގޮޅިތަކުގައި ވިޔަފާރިކުރުމުގެ ވަގުތަކީ ހެނދުނު 6:00 އިން ހަވީރު 6:00 އަށް ކަމަށެވެ. މީގެ ކުރިން އެތަނުގެ ވިޔަފާރިކުރާ ގަޑިއަކީ ހެނދުނު 6:00 އިން ރޭގަނޑު 10:00 އަށެވެ. ގޮޅިތައް ބަންދުކުރާ ގަޑި އަވަސްކުރި ސަބަބެއް ސިޓީގައި ވިދާޅުވެފައެއް ނެތެވެ. "ހަވީރު"ން މިރޭ އެތަނަށް ދިޔައިރު ގޮޅިތަކަށް ވަންނަ ދޮރުތައް ވަނީ ތަޅުލައިފަ އެވެ. އަދި އެ ސަރަހައްދުގައި ތިބި ބަޔަކު ބުނީ ހައެއްޖެހުމާއެކު މީހުން ނެރެ ހައުސިން މިނިސްޓްރީން މާރުކޭޓު ތަޅުލާފައިވާ ކަމަށެވެ. "މީގެ ސަބަބުން އެތައް ބަޔަކަށް ލިބޭ އާމްދަނީ ދަށްވެގެންދާނެ. ރޭގަނޑު ވަގުތަކީ ވަރަށް ގިނަ ބަޔަކު މިތަނަށް ވިޔަފާރިކުރަން އަންނަ ވަގުތެއް. އެއްވެސް މަޝްވަރާކުރުމެއް ނެތި ކުއްލި ގޮތަށް އެންގީ އެ ވަގުތުން ފެށިގެން ބަންދުކުރަން،" އެތަނުގައި ހުރި މީހަކު ބުންޏެވެ. އާ މާރުކޭޓާއެކު، އެތަނުގެ ވިޔަފާރި ބަންދުވުމަށް ފަހު، ހައުސިން މިނިސްޓްރީން އަބަދުވެސް މާރުކޭޓް ތަޅުލަ އެވެ.