އެމްޑީޕީ ފޭދޫ ދާއިރާގެ ޕްރައިމަރީ އާއި ގުޅިގެން ޝަކުވާތަކެއް ހުށަހެޅުނު ނަމަވެސް ނަތީޖާ އަށް ބަދަލު އަންނަ ވަރުގެ ކަމެއް ހިނގާފައި ނުވާ ކަމަށް ކަނޑައަޅައި އެ ދާއިރާގެ ވޯޓު ބާތިލް ނުކުރަން އެމްޑީޕީން ނިންމައިފި އެވެ.
އެމްޑީޕީ އިންތިހާބާއި ބެހޭ ކޮމިޓީން ބުނީ ފޭދޫ ދާއިރާގެ ޕްރައިމަރީ އަލުން ނުބޭއްވުމަށް ނިންމީ އެދާއިރާގައި ވޯޓްލާފައިވަނީ ޕާޓީގެ ވެބްސައިޓުގައި އާންމުކޮށްފައިވާ ލިސްޓަކަށް ކަމަށްވާއިރު، އެލިސްޓުގައި ހުރިކަމަށް ބުނާ މައްސަލަތައް ބެލި ބެލުމުން ނަތީޖާއަށް ބަދަލު އަންނަވަރުގެ ކަމެއް ފާހަގަނުވާތީ ކަމަށެވެ.
އަދި އެމްޑީޕީ ވެބްސައިޓުގައި އޮތް ލިސްޓާއި ފޭދޫ ދާއިރާގައި ވޯޓުލީ ލިސްޓަށް ބަލާއިރު، 67 މީހެއްގެ ތަފާތު ހުރި ނަމަވެސް އެއީ ވޯޓުގެ ނަތީޖާ އަށް ބަދަލު އަންނަ ވަރުގެ އަދަދެއް ނޫން ކަމަށް އެ ކޮމިޓީން ބުނެ އެވެ.
ފޭދޫ ދާއިރާގެ ޕްރައިމަރީން އެއް ވަނަ އަށް ހޯދި މުހައްމަދު ނިހާދަށް 316 ވޯޓު ލިބިވަޑައިގެންނެވިއިރު ދެވަނައަށް ދިޔަ އަހުމަދު މިރުޒާދަށް 186 ވޯޓު ލިބިވަޑައިގެންނެވިއިރު ތިންވަނައަށް ދިޔަ މިހާރުގެ މެންބަރު އަލްހާން ފަހުމީއަށް ލިބިވަޑައިގަތީ 154 ވޯޓެވެ. މި ދާއިރާއަށް ޖުމްލަ 11 ކެންޑިޑޭޓުން ވާދަކުރި އެވެ.
ފޭދޫ ދާއިރާގެ ވޯޓު އޮޅުވާލާފައިވާ ކަމަށް ވިދާޅުވެ ނަތީޖާ ގަބޫލުނުކުރައްވާނެ ވިދާޅުވީ އަލްހާން ފަހުމީ އެވެ.