ހުޅުމާލޭ މޫދު ކައިރީގައި ބަންގްލަދޭޝްގެ ފިރިހެނަކު އޭނާގެ ދެ ދަރިންގެ ފޮޓޯ ނަގަނީ އެވެ. އަންހެނުން ހުރީ ކައިރީގައި ބަލަހައްޓައިގެންނެވެ. ދެން އަންހެނުން އެދުނީ ފިރިމީހާ އާއި ކުދިންގެ ފޮޓޯއަކަށް ހުއްޓިލުމަށެވެ. ދެ ޖިންސްގެ ދެ ދަރިން ކައިރިކޮށްލައިގެން ފިރިމީހާގެ ގިނަ ފޮޓޯޯތަކެއް އަންހެނުން ނެގި އެވެ.
އެހާ ހިސާބުން އަޅުގަނޑު ގޮސް ފިރިހެންމީހާ ކައިރީ އަހާލީމެވެ: ތިއީ ޓޫރިސްޓުން ހެއްޔެވެ؟ އޭނާ ބުނީ އާއެނކޭ އެވެ. ވާހަކަ ފެށީމެވެ.
ނަމަކީ ނަޒުމުލް ހައްގެވެ. އިންކަމް ޓެކްސްގެ ދާއިރާއިން ހާއްސަ ގާނޫނީ ވަކީލެކެވެ. މީގެ ކުރިން ސިންގަޕޫރާއި ދުބާއީ ފަދަ ތަނަތަނަށް ދަތުރުކުރި އެވެ. އެކަމަކު މިއީ ޗުއްޓީގައި ރާއްޖެއަށް އައި ފުރަތަމަ ފަހަރެވެ.
"ގުދުރަތީ ރީތިކަން. މިވަރެއް ނުދެކެން،" ރާއްޖެ އައި ސަބަބާ ބެހޭ ގޮތުން ސުވާލުކުރުމުން ނަޒުމުލް ބުންޏެވެ.
"މި ޖައްވު، މޫދު، ބީޗު. ވަރަށް ރީތި ތަނެއް."
މިއީ މިހާރު ރާއްޖޭގެ ޓޫރިޒަމްގައި ކުރިއަރަމުން އަންނަ މާކެޓަކަށް ނިސްބަތްވާ އެންމެ ޓޫރިސްޓެއްގެ ވާހަކަ އެވެ. ބަންގްލަދޭޝްގައި ރާއްޖެ މަޝްހޫރުވެފައި އޮންނަ މަސައްކަތު މީހުންނަށް ފަހި ގައުމެއް ކަމަށް ބަލާބެލުން ބަދަލުވަނީ އެވެ. ދިވެހިން ވެސް ހަމައެކަނި އެ ނަޒަރުން ބެލުން ހުއްޓާލަންވީ އެވެ. ގާތްގަނޑަކަށް 173 މިލިއަން މީހުންގެ ބޮޑު އާބާދީއެއް އޮތް އަވަށްޓެރި ގައުމުން ލިބެން އޮތް ހުރިހާ ފައިދާއަކަށް މި އޮތީ ވިސްނަން ޖެހިފަ އެވެ.
މީގެ 15 އަހަރު ކުރިއަށް ބަލާ ނަމަ ރާއްޖެ އައި ބަންގްލަދޭޝްގެ ޓޫރިސްޓުންގެ އަދަދު 500 އަށް ވެސް ނާރަ އެވެ. އެކަމަކު ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ 13 ވަނައަށް، މިދިއަ އަހަރު، ބަންގްލަދޭޝް އެ އެރީ 10 އަހަރުގެ ތެރޭގަ އެވެ.  ތިރީގައި އެ ވަނީ ކުރު ތަފާސްހިސާބެކެވެ:
2009
388: ބަންގްލަދޭޝްގެ ޓޫރިސްޓުން
2014
2،231: ބަންގްލަދޭޝްގެ ޓޫރިސްޓުން
2023
24،982: ބަންގްލަދޭޝްގެ ޓޫރިސްޓުން (15 ވަނަ)
2024
29،735: ބަންގްލަދޭޝްގެ ޓޫރިސްޓުން (13 ވަނަ)
ޓޫރިޒަމް ދާއިރާގެ ބައެއް ތަޖުރިބާކާރުން ބުނާ ގޮތުގައި މެދު ފަންތީގެ އާބާދީ ވަރަށް ބާރަށް ކުރިއަރަމުން އަންނަ އަވަށްޓެރި ބިޔަ ގައުމަކީ ދިވެހި ޓޫރިޒަމަށް އޮތް ފަހި މަންޒިލަކަށް ހެދިދާނެ އެވެ. 
"ބަންގްލަދޭޝްއަކީ ރަނގަޅު މާކެޓެއް. އަނެއްކާ އެ އަންނަ މީހުން ފުދޭވަރަކަށް ހަރަދު ވެސް ކުރޭ،" ކުރިން ވިލާ ގްރޫޕްގެ އެކި ރިސޯޓްތަކުގެ ޖެނެރަލް މެނޭޖަރުކަން ކުރައްވައި މިހާރު ގެސްޓްހައުސް ވިޔަފާރީގައި އުޅުއްވަމުން އަންނަ ގައިސަރު ނަސީމް ވިދާޅުވި އެވެ.
އޭނާ ވިދާޅުވި ގޮތުގައި ބަންގްލަދޭޝްގައި އޮންނަ ބައެއް ފެއާތަކުގައި ވެސް މިހާރު ރާއްޖެއިން ބައިވެރިވެ އެވެ.
ބަންގްލަދޭޝްގައި ތިބެގެން ދުނިޔޭގެ ބޮޑެތި ކުންފުނިތަކުގެ ވަޒީފާ އަދާކުރާ އައިޓީ ދާއިރާގެ މީހުންގެ އަދަދު ވެސް އެހާމެ ގިނަ އެވެ. އެއީ ނިސްބަތުން ރަނގަޅު އާމްދަނީއެއް ހޯދާ ބައެކެވެ. ބަންގްލަދޭޝްގައި އެންމެ މަތިން އާމްދަނީ ލިބޭ މީހުންގެ އާބާދީ ވެސް އަންނަނީ މައްޗަށް ޖެހެމުންނެވެ. އެހެންކަމުން ރާއްޖެއަށް އޭގެ ފައިދާ ނަގަން އެނގިއްޖެ ނަމަ، އެ ގައުމު ވާނީ ޓޫރިޒަމަށް ރަނގަޅު މާކެޓަކަށެވެ.
ނަޒުމުލްގެ ފުރަތަމަ ތަޖުރިބާ އެހާ ހިތްގައިމެއް ނޫނެވެ. އޭނާ ބުނީ މީގެ ތިން މަސް ކުރިން ބުކިންސް ހަދައި، ފައިސާ ދެއްކި ނަމަވެސް ގެސްޓްހައުސްއަށް އައުމުން ކޮޓަރިއެއް ނެތް ކަމަށެވެ.
"ދެން އެ މީހުން އަހަރެމެން އެހެން ގެސްޓްހައުސްއަކަށް ލީ. އެއީ މައްސަލައެއް. އެހާ ކުރިން ފައިސާ ދައްކާފައި މި އަންނަނީ،" ގާތް އެހެން އާއިލާއަކާ އެކު ރާއްޖެ އައި ނަޒުމުލް ބުންޏެވެ.
ހުޅުމާލޭގެ އިތުރުން އެ މީހުންް ވަނީ މާފުށީގައި ދެ ދުވަސް ހޭދަކޮށްފަ އެވެ. އެއީ ވެސް ވަރަށް އުފާވެރި ތަޖުރިބާއެއް ކަމަށް ބުންޏެވެ. 
ޓޫރިޒަމް ދާއިރާގެ ބައެއް ހިންގުންތެރިން ބުނާ ގޮތުގައި ރާއްޖެއަށް ހުޅުވިދާނެ އެތައް މާކެޓެއް އެބަ އޮތެވެ. ބޭނުންވަނީ ރަނގަޅު ރޭވުންތެރިކަމާއި އެންމެން ގުޅިގެން މަސައްކަތްކުރުމެވެ. މާދަމާ ކަންކަން ކުރަން ނުތިބެ، އެންމެ ކުރުވެގެން އަހަރެއްގެ ކުރިއަށް ޕްލޭންތައް ހެދުމެވެ.
ހުޅުމާލޭ ގޮނޑުދޮށުގައި އަޒުމުލްގެ އާއިލާ އެ ހޭދަކޮށްލަނީ އެ މީހުންނަށް ބަންގްލަދޭޝްއިން ނުލިބޭ އުފާވެރިކަމެއްގަ އެވެ. އޭނާ ބުނިހެން ގުދުރަތީ ރީތިކަމުގައި ރާއްޖެ ވަރެއް ނެތެވެ.