މާލޭގެ ރައްޔިތުންނަށް ހާއްސަކޮށްގެން ހިންގާ ބޯހިޔާވަހިކަމުގެ މަޝްރޫއުގެ ދަށުން ދޫކުރާ ފްލެޓް ލިބުނު މީހުން ހިމެނޭ ލިސްޓު، ހައުސިން މިނިސްޓްރީން އަލުން މުރާޖައާ ކުރަން ފެށިއިރު އެކަމުގައި މާލޭ ސިޓީ ކައުންސިލްގެ ބައިވެރިވުން ނެތުމުން، މޭޔަރު އާދަމް އާޒިމް ކަންބޮޑުވުން ފާޅުކުރައްވައިފި އެވެ.
ވީ ކިހިނެއް؟- ކުރީގެ ސަރުކާރުން އިއުލާން ކުރި 4،000 މީހުންގެ ފްލެޓް ލިސްޓު މުރާޖައާ ކުރުމުގެ މަސައްކަތް އިއްޔެ ހައުސިން މިނިސްޓްރީން ވަނީ ފަށާފަ އެވެ. އެއާއެކު، މޭޔަރު ވަނީ އެކަމުގައި ވަރަށް ގިނަ ބައެއްގެ ކަންބޮޑުވުން ހުރިކަން ފާހަގަ ކުރައްވާފަ އެވެ.
އާޒިމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ:
ކުރިން ފްލެޓް ލިބޭނެ ކަމަށް ކަނޑައަޅައި، އެކަމުގެ އުއްމީދުގައި ތިބި މީހުންނަށް ލިބެންވާ ފްލެޓްތައް، ހައްގު ނޫން މީހުންނަށް ދީފައިވާ ކަމުގެ ވާހަކަ މިހާރު ވެސް ދައްކަމުންދާ ކަމަށް
އެ ފަދަ ދަނޑިވަޅެއްގައި ލިސްޓު އަލުން މުރާޖައާ ކުރަން ފެށުމުން، ރައްޔިތުންގެ މެދުގައި އިތުރު ހިތްހަމަނުޖެހުންތަކާއި ޝައްކުތައް އުފެދިދާނެ ކަމަށް
އެކަމަކު އެންމެ ބޮޑު މައްސަލައެއްގެ ގޮތުގައި އާޒިމް ފާހަގަ ކުރެއްވީ، މުރާޖައާ ކޮމިޓީގައި މާލޭ ސިޓީ ކައުންސިލްގެ އެއްވެސް ބައިވެރިވުމެއް ނެތުމެވެ. 
އޭނާ ވިދާޅުވި ގޮތުގައި:
ފްލެޓް ލިބޭ ފަރާތްތަކުގެ ލިސްޓު އަލުން އެކުލަވާލުމަށް ކަނޑައަޅާފައިވާ ކޮމިޓީގައި ތިއްބެވީ، އައްޔަންކޮށްފައިވާ ބޭފުޅުން
ރައްޔިތުން އިންތިހާބުކޮށްފައިވާ މަންދޫބަކު، އެ ކޮމިޓީގައި ނެތުމަކީ އެ މަސައްކަތުގެ ސައްހަކަމާ މެދު ސުވާލު އުފެދޭނެ ކަމެއް
"ސަރުކާރުގެ ކަމާބެހޭ ފަރާތްތަކަށް އަޅުގަނޑު ކުރަން އޮތް އިލްތިމާސަކީ، މި ކަމުގައި މާލެ ސިޓީ ކައުންސިލްގެ ބައިވެރިވުން ހޯއްދަވައިގެން ނޫނީ ކުރިއަށް ވަޑައިނުގަތުމަށެވެ." ޕޯސްޓުގައި އާޒިމް ލިޔުއްވި އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު ވިދާޅުވީ ގެދޮރުވެރިޔާ ސްކީމުގެ ދަށުން ފްލެޓު ލިބޭ މީހުންގެ ފައިނަލް ލިސްޓު އިއުލާނުކޮށްފައިވަނީ ސަރުކާރު ބަދަލުވާން ދެ ދުވަހަށް ވެފައި ވަނިކޮށް ކަމަށާއި އެކަން ކޮށްފައި ވަނީ ފްލެޓު ދޫކުރުމާ ގުޅުން ހުރި މަސައްކަތްތައް ހުއްޓާލަން އޭސީސީން އަންގާފައިވަނިކޮށް ކަމަށެވެ.
"ދާއިމީ ލިސްޓާ ގުޅިގެން އޭސީސީން ކުރިއަށް ގެންދިޔަ ތަހުގީގަށް ފަހު ފާހަގަކޮށްފައިވާ ކަންކަމަށް ބަލާއިރު އަދި އަޅުގަނޑު [މަގާމާ] ހަވާލުވެ އެ ބޭފުޅުންނާ އެކު ދެކެވުނު ވާހަކަތަކަށް ބަލާއިރު، އޭސީސީގެ މެންބަރުންގެ އެންމެ ބޮޑު ކަންބޮޑުވުމަކީ ހަމަހަމަކަމާ އެކު އަމަލުކޮށްފައި ނުވުން،" އޭނާ ވިދާޅުވި އެވެ.
"ވަކިން ހާއްސަކޮށް މާލޭގައި މެދުނުކެނޑި 15 އަހަރު އުޅުނުކަން ބެލުމަށް އެކި ފަރާތްތަކަށް އެކި ގޮތްގޮތަށް އަމަލުކޮށްފައިވޭ."
އޭނާ ވިދާޅުވީ އެ ލިސްޓު އަލުން މުރާޖައާ ކުރުމަށް ފަހު، އަންނަ ރޯދަ މަހުގެ ކުރިން ލިސްޓު ގެޒެޓް ކުރައްވަން މަސަައްކަތް ކުރައްވާ ކަމަށެވެ.