ކަނޑުތަކުން އުފައްދާ އޮކްސިޖަން މަދުވަމުންދާ ކަމަށް ތިމާވެށީގެ މާހިރުން ބުނެފިއެވެ.
ދުނިޔޭގެ ތިމާވެށީގެ ދުވަސް ފާހަގަކުރަމުންދާއިރު، މިއަދު ނެރުނު ރިޕޯޓެއްގައި ބުނެފައިވާ ގޮތުގައި އިންސާނުން ނޭވާލާ އޮކްސިޖަންގެ 50 އިންސައްތައަށްވުރެ ގިނަ އުފައްދަނީ ކަނޑުތަކުންނެވެ. ނަމަވެސް، ޕްލާސްޓިކުގެ ސަބަބުން ކަނޑުތަކަށް ނޭވާ ނުލެވޭ ހިސާބަށް ދާކަމަށް މާހިރުން ވަނީ ބުނެފައެވެ.
ރިޕޯޓުގައި ހާމަކޮށްފައިވާ ގޮތުގައި، ކޮންމެ އަހަރަކު 8 މިލިއަން ޓަނަށްވުރެ ގިނަ ޕްލާސްޓިކް ކަނޑުތަކަށް އެޅެއެވެ. މިކަމުގެ ސަބަބުން ކަނޑުގެ ދިރުންތަކަށާއި މުޅި ކަނޑުގެ ނިޒާމަށް ނޭދެވޭ އަސަރުތަކެއް ކުރަމުންދާ ކަމަށް ރިޕޯޓުގައި ބުނެފައިވެއެވެ.
ދުނިޔޭގެ ތިމާވެށީގެ ދުވަހާ ގުޅިގެން ރާއްޖޭގެ އެކި ހިސާބުތަކުގައި ހޭލުންތެރިކަން އިތުރުކުރުމުގެ ޙަރަކާތްތަކެއް ކުރިއަށްދާނެ ކަމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން ބުނެފައިވާއިރު މީގެ ތެރޭގައި ރަށްރަށުގައި ގޮނޑުދޮށް ސާފުކުރުމުގެ ޕްރޮގްރާމްތަކާއި، ސްކޫލްތަކުގައި ހިންގޭ ހާއްސަ ސެޝަންތައް ހިމެނެއެވެ.