ހުޅުމާލެ ދެވަނަ ފިޔަވަހީގައި ޑްރޯން އެއް އަރުވަން ހުރި ނޫސްވެރިޔަކަށް ފުލުހުން އަނިޔާކުރި ކަމަށް ބުނާ މައްސަލައިގައި ފުލުހުން އެ ނޫސްވެރިޔާއަށް އަނިޔާ ކުރި ކަމަށް ބެލެވޭތީ އެ މައްސަލަ ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅަން ނިންމާފައިވާ ކަމަށް މޯލްޑިވްސް ޖާނަލިސްޓު އެސޭސިއޭޝަން (އެމްޖޭއޭ) އިން ހާމަކޮށްފި އެވެ.
ފުލުހުން އަނިޔާ ކުރި ކަމުގެ ތުހުމަތު ކޮށްފައިވަނީ ވަން އޮންލައިންގައި މަލްޓި މީޑިއާ ނޫސްވެރިއެއްގެ ގޮތުގައި މަސައްކަތް ކުރާ ހަމްދާން އަހުމަދެވެ. އެ މައްސަލައާ ގުޅިގެން އެމްޖޭއޭ އިން ފުރަތަމަ ނެރުނު ބަޔާނުގައި ފުލުހުން ކުށްވެރިނުކޮށް ނޫސްވެރިންނަށް ދިނީ ނަސޭހަތެވެ.
ނަމަވެސް، މިއަދު އެމްޖޭއޭއިން ނެރުނު އިންސިޑެންޓަލް ރިޕޯޓުގައި ވަނީ އެ ހާދިސާއާ ގުޅޭ ތަފްސީލުތަކަށް ބަލައި އަނިޔާކުރުމުގެ ޖާގަ އޮތްކަމަށް ބުނެފަ އެވެ. ފުލުހުން ހަމްދާނަށް ދިން އިންޒާރުތަކުގެ ތެރޭގައި، "ނޫސްވެރިންނަށް ވެސް ތިހެން ފުއްޕާފައި ނޫޅެވޭނެ"، "ހޭ އަރުވާލާނެ ކަމަށް"، އަދި "ރިލްވާނަށް ހަދާލި ގޮތް" ހަދާލާނެ ކަމަށް ބުނުން ހިމެނެ އެވެ.
"އެ ހާދިސާ އިތުރަށް ތަހުގީގު ކުރުމަށާއި އޭނާ ސީނަށް ގޮސް ހުއްޓުވުމުގައި އުޅުނު ދެ ފުލުސް އޮފިސަރުންގެ މައްސަލަ ނޭޝަނަލް އިންޓަގްރިޓީ ކޮމިޝަނަށް މި ޖަމްއިއްޔާގެ ފަރާތުން ހުށަހަޅާނެ.
ހަމްދާންގެ ފޭސްބުކް އެކައުންޓުން ކޮށްފައިވާ ޕޯސްޓުގައި ބުނެފައިވަނީ ޑްރޯން އެރުވީ ޓެސްޓު ކުރުމުގެ ބޭނުމަށް ކަމަށާއި ޑްރޯން އެރުވީ ހަތް ފޫޓަށް އުހަށް ކަމަށެވެ. ޑްރޯން އަރުވަނިކޮށް ދެ ފުލުހަކު އައިސް ޑްރޯން އަރުވަނީތޯ ސުވާލުކޮށް ހުއްދަ ނެތް ނަމަ އެކަން ނުކުރަން އެންގި ކަމަށް ހަމްދާން ބުނެފައިވެ އެވެ.
"ހަމްދާންގެ ހާލަތު ކައިރިން ބަލައި އޭނާއަށް ދެވެން އޮތް އެހީތެރިކަމެއް ދީ އެ މައްސަލަތަކުގައި ގާނޫނީ އެހީތެރިކަން ބޭނުންވާ ނަމަ މި ޖަމްއިއްޔާގެ ފަރާތުން އެކަން ފޯރުކޮށްދިނުން،" އެމްޖޭއޭއިން ބުނެފައިވެ އެވެ.
ހަމްދާން ބުނި ގޮތުގައި ފުލުހުން ހަޑިހުތުރު ބަހުން ވާހަކަ ދައްކަން ފެށީ އޭނާގެ ވޮލެޓުގައި އޮތް ނޫސްވެރިޔެއްކަން އަންގައިދޭ ކާޑު ފެނުމުންނެވެ.
ޕްރެސް ކާޑު ފެނުމުން، ނޫސްވެރިޔަކަސް "ނުފުއްޕޭނެ" ކަމަށް ފުލުހުން ބުނެ ހަޑިހުތުރު ބަހުން ފުލުހުން ވާހަކަ ދެއްކި ކަމަށް އޭނާ ބުނެފައިވެ އެވެ.
ފުލުހުންނާ ދެމެދު ދެކެވުނު ބައެއް ވާހަކަތައް ހަމްދާން ފޭސްބުކްގައި ލައިވްކޮށްފައި ވާއިރު، ފުލުހުން އަދި ހަމްދާން ވެސް ހަޑިހުތުރު ބަހުން ވާހަކަ ދައްކާ އަޑު ސާފުކޮށް އިވެ އެވެ.
ހުޅުމާލެ ދެވަނަ ފިޔަވަހީގައި ހުންނަ ޕޮލިސް ސްޓޭޝަން އަށް ހަމްދާން ގެންގޮސް އެތަނުގެ މެސް ރޫމަށް ވައްދައި، މޫނު މަތީ ތަޅައި އަނިޔާކުރި ކަމަށާއި ކަރުގައި ހިފައި ނޭވާ ހާސްކުރި ކަމަށް ހަމްދާން ބުނެފައިވެ އެވެ. އޭނާ ގައިގައި ފަސް ފުލުހަކު ތެޅި ކަމަށް ހަމްދާން ތުހުމަތު ކުރެ އެވެ.
މި ތުހުމަތާ ގުޅިގެން ބަލަން ޖެހޭ ކަންކަން ބަލަމުންދާ ކަމަށާއި ނަމަވެސް މިހާތަނަށް ބެލި ބެލުމުން އެފަދަ ކަމެއް ހިނގާފައިވާ ކަމަށް ނުބެލެވޭ ކަމަށް ފުލުހުންގެ މީޑިއާ ޓީމުން ފޮނުވި މެސެޖެއްގައި ބުނެފައިވެ އެވެ.
މި މައްސަލާގައި ފުލުހުން ބުނެފައިވަނީ ހަމްދާން ހައްޔަރުނުކުރާ ކަމަށާއި އޭނާ ޕޮލިސް ސްޓޭޝަނަށް ގެންދިޔައީ މައުލޫމާތު ދިނުމަށާއި ޑްރޯން އެރުވުމުގެ ހުއްދަ ދެއްކުމަށް ދެކޮޅު ހަދައި ހުތުރު ބަހުން ވާހަކަ ދެއްކުމުން ކަމަށެވެ.