އެމެރިކާ އިން އީރާނަށް ހަމަލާދީފި ނަމަ ރައްދު ހަމަލާ ހަރުކަށިވެ، ނުރައްކާތެރިވާނެ ކަމަށް އީރާންގެ ރައީސް އިންޒާރު ދެއްވައިފި އެވެ.
މެދުއިރުމަތީގައި ހުންނަ އީރާނުގެ އޮފިޝަލަކު ވިދާޅުވީ ދާދި ފަހުން އީރާންގައި ހިނގި މުޒާހަރާތަކުގައި 5،000އަށް ވުރެ ގިނަ މީހުން މަރުވެފައިވާ ކަމަށެވެ. އޭގެ ތެރޭގައި ސަލާމަތީ މީހުންގެ ތެރެއިން ވެސް 500އަށް ވުރެ ގިނަ މީހުން ހިމެނޭ ކަމަށް އޭނާ ވިދާޅުވި އެވެ.
އީރާނުގެ ގްރޭންޑް ބާޒާރުގައި މިދިޔަ މަހު މުޒާހަރާތައް ފެށީ އިގްތިސާދީ މައްސަލަތަކާ ގުޅިގެންނެވެ. ފަހުން ސިޔާސީ ހަރަކާތްތަކަށް ބަދަލުވެ، މުޅި ގައުމަށް ފެތުރި، ހުރިހާ ޖީލުތަކަކާއި އާމްދަނީ ހޯދާ ގްރޫޕްތަކުގެ ބައިވެރިން ވަނީ ރޫހާނީ ލީޑަރުގެ ވެރިކަން ނިމުމަކަށް ގެނައުމަށް ގޮވާލައިފަ އެވެ. އެ މީހުންގެ ތެރޭގައި ފިހާރަތަކުގެ ވެރިންނާއި ދަރިވަރުންނާއި އަންހެނުންނާއި ފަގީރުންނާއި މުއްސަނދިން ހިމެނެ އެވެ.
މުޒާހަރާގެ ބައިވެރިން މަގުމަތީގައި މަރާލާ ނަމަ ނުވަތަ ދަންޖައްސައި މަރާ ނަމަ، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް ތަކުރާރުކޮށް އިންޒާރު ދެއްވައިފަ އެވެ. ޕޮލިޓިކޯއަށް ދެއްވި އިންޓަވިއުއެއްގައި އޭނާ ވިދާޅުވީ މިއީ އީރާނުގައި އާ ލީޑާޝިޕެއް ހޯދަން ޖެހޭ ވަގުތު ކަމަށެވެ.
އީރާނުން ވަނީ ހަމަނުޖެހުންތަކުގައި ހައްޔަރު ކުރި މީހުންނަށް މަރުގެ އަދަބު ދިނުމަށް މަސައްކަތް ކުރާ ކަމުގެ އިޝާރާތެއް އިއްޔެ ދީފަ އެވެ. އަދި 1979 ވަނަ އަހަރުގެ އިސްލާމީ އިންގިލާބަށް ފަހު އެންމެ ނުރައްކާތެރި ހަމަނުޖެހުންތަކާ ގުޅިގެން އެ ގައުމުގެ ދީނީ ލީޑަރުންނަށް ބައިނަލްއަގުވާމީ ޕްރެޝަރުތައް އަންނަނީ ކުރިމަތިވަމުންނެވެ.
އީރާނުގެ ރައީސް މަސްއޫދު ޕެޒެޝްކިއަން އެކްސްގައި ވިދާޅުވީ، އީރާނަށް ހަމަލާއެއް ދީފި ނަމަ، ތެހެރާނުން ބަދަލުގައި ހިތުން ނުފިލާވަރުގެ ހަމަލާއެއް ދޭނެ ކަމަށެވެ. އަދި ގައުމުގެ އެންމެ މަތީ ވެރިޔާއަށްދޭ ކޮންމެ ހަމަލާއަކީ ވެސް ގައުމާ ދެކޮޅަށްދޭ ހަމަލާއެއް ކަމަށް ވެސް އޭނާ ވިދާޅުވި އެވެ.
އެމެރިކާގައި އިންސާނީ ހައްގުތަކަށް މަސައްކަތް ކުރާ ޖަމާއަތެއް ކަމަށްވާ އެޗުއާރުއޭއެންއޭ އިން ބުނީ އީރާނުގައި މަރުވި މީހުންގެ އަދަދު 3،308އަށް އަރާފައިވާ ކަމަށެވެ. އަދި އިތުރު 4،382 ކޭހެއް ރިވިއު ކުރަމުން އަންނަ ކަމަށެވެ.
އޭގެ އިތުރުން، 24،000 އަށް ވުރެ ގިނަ މީހުން ހައްޔަރު ކޮށްފައިވާ ކަމަށް ވެސް އެ ބަޔާނުގައި ބުނެފައިވެ އެވެ.