ރާއްޖޭގައި ބާއްވާ އެންމެ ބޮޑު ކުޅިވަރު ހަރަކާތް، ހިއުންޑާއި ގޯލްޑަން ފުޓްސަލް ޗެލެންޖު 2026 ގެ ގަދަ 16 ބުރުގެ ޖާގައެއް، ތ. ތިމަރަަފުށި، ލ. އިސްދޫ، ކ. ގާފަރު އަދި ދ. ކުޑަހުވަދޫން ހޯދައިފި އެވެ.
ޒޯން ހައެއްގައި ރޭ ކުޅުނު ފަހު މެޗުތައް ދިޔައީ ފޯރިގަދަކޮށެވެ. ތ. އަތޮޅުގެ ޗެމްޕިއަން، ތ. ތިމަރަފުއްޓާއި ލ. އަތޮޅުގެ ޗެމްޕިއަން، އިސްދޫގެ ކުރިމަތިލުން 2-2 އިން އެއްވަރުވެ، މި ދެ ޓީމަށް ވެސް ޒޯން ފައިނަލާއި ގަދަ 16 ގެ ޖާގައެއް ވަނީ ޔަގީންވެފަ އެވެ. މި ޒޯނުގައި ދެން ކުޅުނު މެޗުން، ތ. އަތޮޅުގެ ރަނަރަޕް، ކިނބިދޫން ވަނީ 4-2 އިން ލ. އަތޮޅުގެ ރަނަރަޕް، ގަން އަތުން މޮޅުވެފަ އެވެ.
ތިމަރަފުށީގެ އަހުމަދު އަފްލާޒް ދެ ފަހަރު ވެސް ތިމަރަފުށްޓަށް ލީޑުނަގައިދިން މި މެޗުގައި އިސްދޫ އަށް ދެ ފަހަރު ވެސް އެއްވަރުކޮށްދިނީ ލޫތު އަހުމަދު ފަތުހީ އެެވެ. ރޭގެ މެޗުގައި، ގަމުގެ ދެ ލަނޑު އަހުމަދު ހަލީމް (އަންމަޑޭ) ކާމިޔާބުކުރިއިރު، ކިނބިދޫގެ ލަނޑުތައް ޖެހީ، މެޗުގެ މޮޅު ކުޅުންތެރިޔާ، މުހައްމަދު ސަހާއު (ބޭލް) ދެ ލަނޑުގެ އިތުރުން، އަހުމަދު ހަމްދާން ހުސައިން އަބްދުﷲ ސަމީހު އެވެ.
ގަން ކޮޅަށް ލަނޑު ޖެހުމަަށް ފަހު ކިނބިދޫ ކުޅުންތެރިން އުފާފާޅުކުރަނީ---- ފޮޓޯ: އިމޭޖަސް،އެމްވީ
ގަމާއި ކިނބިދޫ މެޗުގެ ފަހުކޮޅުގައި، ހިނގައިދިޔަ ހަމަނުޖެހުންތަކެއްގެ ކަންކަން ވީޑިއޯ ސަޕޯޓުން ބަލައި، ގަމުގެ އަބްދުﷲ ޖުނައިދު (ޖެންނޭ) އާއި ހުސައިން އަޒުމީ އަދި މުހައްމަދު އަކްމަލް އަށް ރަތް ކާޑު ދެއްކިއިރު، ކިނބިދޫގެ ސަމީހު އާއި ގޯލްކީޕަރު އަބްދުﷲ ފަޔާޒު (ފަޔާ) އަށް ވަނީ ރަތް ކާޑެއް ދައްކައިފަ އެވެ.
ޒޯން ތިނެއްގެ ފަހު މެޗުތަކަށް ރޭ ނުކުތްއިރު ވެސް ފުރަތަމަ ދެ މެޗުން މޮޅުވެ، އޭދަފުށިން އޮތީ ޒޯން ފައިނަލާއި ގަދަ 16 އިން ޖާގަ ހޯދައިފަ އެވެ. ގާފަރުން ރޭ އޭދަފުއްޓާ ކުޅެން އޮތް މެޗުން ޕޮއިންޓެއް ހޯދައިގެން ޒޯން ފައިނަލާއި ގަދަ 16 އިން ފުރުސަތު ލިބެން އޮތްއިރު، އެ ޓީމުން ވަނީ 1-1 އިން އޭދަފުއްޓާ އެއްވަރުކޮށްފަ އެވެ. މި ޒޯނުގެ އަނެއް މެޗުން ޅ. އަތޮޅުގެ ޗެމްޕިއަން، ކުރެންދޫން ވަނީ 2-1 އިން ކ. އަތޮޅު ރަނަރަޕް، މާފުށި ބަލިކޮށްފަ އެވެ.
ރޭގެ މެޗުގައި، އޭދަފުށީގެ ލަނޑު ޖެހީ އިސްމާއީލް ޝަރީޕް އެވެ. އަދި، މި މެޗުގައި، ގާފަރަށް އެއްވަރުކޮށްދީފައިވަނީ، މެޗުގެ މޮޅު ކުޅުންތެރިޔާގެ މަގާމު ހޯދި ސާމިން މުހައްމަދު ނަސީރު އެވެ. ކުރެންދޫން ލަނޑުތައް ޖެހީ އަބްދުލް ވާހިދު އިބްރާހީމް (ވާޑު) އާއި ހުސައިން ފާއިޒު އެވެ. މާފުށީގެ ހަމައެކަނި ލަނޑު ކާމިޔާބުކުރީ ހުސައިން ރިފާން އެވެ.
ގާފަރާއި އޭދަފުށި ކުޅުނު މެޗުގެ ތެރެއިން.--- ފޮޓޯ: އިމޭޖަސް.އެމްވީ
ޒޯން ފަހެއްގައި ތިން ޓީމު ވާދަކޮށްފައިވާއިރު، އެ ޒޯންގެ ފަހު މެޗުގައި ރޭ ބައްދަލުކުރީ ދ. އަތޮޅުގެ ޗެމްޕިއަން، ކުޑަހުވަދު އާއި ފ. އަތޮޅުގެ ޗެމްޕިއަން، މަގޫދުއާ އެވެ. މި މެޗު 1-1 އިން އެއްވަރުވެ، މި ޒޯނުގެ ފައިނަލުގެ ޖާގަ އާއި ގަދަ 16 އިން ޖާގަ ލިބުނީ މ. އަތޮޅުގެ ޗެމްޕިއަން، ދިއްގަރާއި ކުޑަހުވަދޫ އަށެވެ.
ރޭގެ މެޗުގައި، މަގޫދޫގެ ލަނޑު ޖެހީ، ފަހުމާން އަބްދުލް ހަމީދު އެވެ. އަދި، ކުޑަހުވަދޫން މެޗުގައި، އެއްވަރުކުރީ އަބްދުﷲ ސަރުމާދުގެ ލަނޑުންނެވެ.
ރޭ ކުޅުނު މާލޭ ޒޯންގެ ފަހު މެޗުތަކަށް ނުކުތްއިރު، ހަތަރު ޓީމަށް ވެސް ޒޯން ފައިނަލާއި ގަދަ 16 ޖާގަ އޮތީ ހުޅުވިފަ އެވެ. މައްޗަންގޯޅިން ވަނީ ފަހަތުން އަރައި 2-2 އިން ހުޅުމާލެއާ އެއްވަރުކޮށް، ލަނޑުގެ ތަފާތުން ގަދަ 16 ބުރުން ޖާގަ ހޯދައިފަ އެވެ. ހުޅުމާލޭން މި މެޗުގައި ޓީމުގެ ކެޕްޓަން، އަހުމަދު މަހުދީގެ ލަނޑުން ލީޑުނެގިއިރު، މެޗުގެ ފަހުކޮޅުގައި، އަހުމަދު މައީޝް މުހައްމަދުގެ ލަަނޑުން ލީޑުފުޅާކުރި އެވެ. އެކަމަކު، މައްޗަންގޯޅިން ވަނީ އަހުމަދު ހުސެއިން (އައްމަޑޭ) ފަހު ވަގުތު ވައްދާލި ދެ ގޯލާ އެކު މުބާރާތުގައި ކުރިއަށްދިއުމުގެ ފުރުސަތު ހޯދައިފަ އެވެ.
އެންމެ ފަހުގެ މި ޒޯނުގެ ޗެމްޕިއަން، ވިލިމާލެ ފުރަތަމަ މެޗުން މައްޗަންގޯޅި އަތުން ބަލިވި ނަމަވެސް ދެން ކުޅުނު ދެ މެޗުން ވަނީ މޮޅުވެފަ އެވެ. ރޭ، މާފަންނު ކައިރިން ވިލިމާލެ މޮޅުވީ 1-4 އިންނެވެ. މި މެޗުގައި، ވިލިމާލޭގެ ލަނޑުތައް ޖެހީ އިސްމާއީލް ވަޖީހު (ވައްޖެ) ދެ ގޯލާއި އަބްދުﷲ ސަމީހު މޫސާ (ސަމިއްޓެ) އަދި އަހުމަދު ބައްސާމް މުހައްމަދު ނައީމް (ބައްކު) އެވެ. މެޗުގައި، މާފަންނުގެ ހަމައެކަނި ލަނޑުޖެހީ ހުސައިން ސުހައިލް (ސޮކޭ) އެވެ.
މުބާރާތުގައި މިރޭ ކުޅެން ހަމަޖެހިފައިވާ މެޗުތައް:
20:00: ޒޯން 2: ނ. މާޅެންދޫ - ރ. ދުވާފަރު
20:00: ޒޯން 2: ށ. ކަނޑިތީމު - ށ. ފޯކައިދޫ
21:00: ޒޯން 4: އއ. މަތިވެރި - އދ. މަހިބަދޫ
21:00: ޒޯން 4: ވ. ކެޔޮދޫ - އދ. އޮމަދޫ
22:00: ޒޯން 1: ހދ. ނޮޅިވަރަންފަރު - ހއ. ކެލާ
22:00: ޒޯން 1: ހއ. މާރަންދޫ - ހދ. ނައިވާދޫ
23:00: ޒޯން 7 ސެމީ ފައިނަލް: ގދ. ވާދޫ - ގދ. ދެއްވަދޫ
23:00 ޒޯން 7 ސެމީ ފައިނަލް: ސ. މަރަދޫ - ސ. ހިތަދޫ