ސޯޝަލް މީޑިއާ ޕްލެޓްފޯމް, ޓިކްޓޮކްގައި މާތްވެގެންވާ އިސްލާމް ދީނަށް ފުރައްސާރަ ކުރި ކަމުގެ ތުހުމަތުގައި އިތުރު މީހަކު ހޯދުމަށް ފުލުހުން މިއަދު އިއުލާން ކޮށްފިއެވެ. ތަހުގީގަށް ހާޒިރު ކުރަން ބޭނުން ވެގެން ފުލުހުން ހޯދަމުން އަންނަނީ, ނ. ކުޑަފަރީ, ހިޔަލީގެ, ޙުސައިން ޔޫސުފް, 44, އެވެ. ފުލުހުން އޭނާގެ މައްޗަށް ތުހުމަތު ކުރަނީ އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާއި، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކައާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަޢުލޫމާތު، ސޯސަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމަށެވެ. https://sun.mv/218320 އޭނާގެ ފޮޓޯ އާއި ވަނަވަރު ހާމަ ކޮށްފައިވަނީ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ ކަމަށް ފުލުހުން ބުންޏެވެ. ފުލުހުން ވަނީ މި މަހުގެ 18 ވަނަ ދުވަހުގެ މެންދުރު 12:00 އަށް, މާލޭގެ ހެންވެއިރުގައި ހުންނަ ސާޖަންޓް އާދަމް ޙަލީމް ކުރިމިނަލް އިންވެސްޓިގޭޝަން ބިލްޑިންއަށް އޭނާ ހާޒިރުވާން އަންގައިފައެވެ. ފުލުހުން މި ފަހުން ވަނީ ޓިކްޓޮކްގައި އިސްލާމް ދީނަށް ފުރައްސާރަ ކުރާ ކަމުގެ ތުހުމަތުގައި, ހ. ފިލިކުރިގެ, އަޙްމަދު އާމިރު, 51, ވެސް ފުލުހަށް ހާޒިރުވާން އަންގައި އިއުލާން ކޮށްފައެވެ. އާމިރު ހަދާފައިވާ ޓިކްޓޮކުތަކުން އެނގޭ ގޮތުގައި ޖަޕާން މީހަކާ ކައިވެނިކޮށްގެން އޭނާ ދިރިއުޅެމުން އަންނަނީ އެ ގައުމުގައެވެ.