އެމެރިކާ އާއި އިޒްރޭލު އަދި އީރާނާ ދެމެދު ހިނގަމުންދާ ވަރުގަދަ ކުރިމަތިލުންތަކުގެ ތެރޭގައި، އެމެރިކާގެ ސަބްމެރީނަކުން އީރާނުގެ މަނަވަރެއް ފައްތާލިތާ ދެ ދުވަސް ފަހުން، އީރާނުގެ ދެވަނަ އުޅަނދެއް ސްރީ ލަންކާގެ ކަނޑުގެ ސިފައިންގެ ބެލުމުގެ ދަށުން ބަނދަރަށް ގެންގޮސް، އޭގައި ތިބި 208 ފަޅުވެރިން ނޭވީ ކޭމްޕަކަށް ބަދަލުކޮށްފި އެވެ.
ލަންކާގެ ރައީސް އަނޫރާ ކުމާރާ ޑިސާނަޔަކަ ވިދާޅުވީ، ހާލުގައި ޖެހިފައިވާ މި ފަޅުވެރިންނަށް އެހީތެރިކަން ފޯރުކޮށްދިނުމަކީ އެ ގައުމުގެ އިންސާނީ ޒިންމާއެއް ކަމަށެވެ.
ލަންކާގެ ކަނޑުގެ ސިފައިން ބުނި ގޮތުގައި، އައިއާރުއައިއެސް ބޫޝެހެރު ނަމަކަށް ކިޔާ މި އުޅަނދު ލަންކާގެ އިގްތިސާދީ ސަރަހައްދުގައި ތާށިވީ އިންޖީނަށް ދިމާވި މައްސަލައަކާ ގުޅިގެންނެވެ.
މި ފަޅުވެރިން ކޮލަމްބޯއަށް ބޭލުމަށް ފަހު، ސިއްހީ ޗެކަޕްތައް ހަދައި ވެލިސާރާގައި ހުންނަ ނޭވީ ކޭމްޕަށް ވަނީ ބަދަލުކޮށްފަ އެވެ. ނަމަވެސް، އުޅަނދު ޓްރިންކޮމަލީއަށް ގެންދިއުމުގެ މަސައްކަތުގައި އެހީތެރިވުމަށްޓަކައި 15 ފަޅުވެރިން އަދިވެސް އުޅަނދުގައި އެބަތިއްބެވެ.
މި ހާދިސާ ހިނގާފައިވަނީ ލަންކާގެ ކަނޑުގެ ސަރަހައްދުން އީރާނުގެ އައިއާރުއައިއެސް ދޭނާ މަނަވަރު އެމެރިކާގެ ސަބްމެރީނަކުން ފައްތާލައި 87 ފަޅުވެރިން މަރުވި ހިތާމަވެރި ހާދިސާއަށް ފަހު އެވެ. މިއީ މި ހަނގުރާމަ އިތުރަށް ވަރުގަދަވެގެންދިޔަ ކަމެއްގެ ގޮތުގައި ވަނީ ފާހަގަކުރެވިފަ އެވެ.
އީރާނުން ވަނީ ހާލުގައި ޖެހުނު ފަރާތްތަކަށް ލަންކާއިން ފޯރުކޮށްދިން އެހީތެރިކަމަށްޓަކައި ޝުކުރު އަދާކޮށްފަ އެވެ.
އީރާނުގެ ޑެޕިއުޓީ ފޮރިން މިނިސްޓަރު ސައީދު ހާތިބްޒާދާ ވިދާޅުވީ، ފައްތާލި އުޅަނދަކީ އެއްވެސް ހަތިޔާރެއް ނެތް، ރަސްމީ ބޭނުންތަކަށް ބޭނުންކުރާ އުޅަނދެއް ކަމަށެވެ. އަދި އޭނާ ވަނީ އެމެރިކާއިން ދިން ހަމަލާ ވަރަށް ބޮޑަށް ކުށްވެރިކުރައްވާފަ އެވެ.