ނ. ވެލިދޫގައި ސީ އެމްބިއުލާންސްގެ ޚިދުމަތް މިއަދު ފަށައިފިއެވެ. ވެލިދޫގައި ސީ އެމްބިއުލާންސްގެ ޚިދުމަތް ފެށުމާ ހަމައަށް، އެ އަތޮޅުގައި ސީ އެމްބިއުލާންސްގެ ޚިދުމަތް ދެމުން އައީ މަނަދޫގައި އެކަންޏެވެ. އެހެންކަމުން ވެލިދޫގައި ސީ އެމްބިއުލާންސްގެ ޚިދުމަތް ފެށުމުން، ބަލި މީހުން އުފުލުމުގައި ލުއި ލިބިގެން ދާނެ ކަމަށް ޑިފެންސް މިނިސްޓްރީން ބުންޏެވެ. އެކަމަށްޓަކައި ވެލިދޫގައި ބޭއްވި ރަސްމިއްޔާތުގައި ވާހަކަ ދައްކަވަމުން ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާޠިމަތު މިޒްނާ ޢަލީ ވަނީ، ވެލިދުއަކީ ސަފާރީ ފަދަ އުޅަނދު ބަނުމާއި ލޯކަލް ޓޫރިޒަމް ކުރިއަރާފައިވާ ރަށެއްކަން ފާހަގަކުރައްވައިފައެވެ. "މިއީ މި ސަރަހައްދުގެ އިގުތިސޯދީ މަސައްކަތަށް ލިބުނު ވަރުގަދަ އައްޑަނައަކަށް ވެގެން ދާނެ. ރަށުގެ ސިއްހީ ރައްކާތެރިކަމާއި އަވަސް ފަރުވާގެ ނިޒާމެއް އޮތުމަކީ ވިޔަފާރިވެރިންނާއި އިންވެސްޓަރުންގެ އިތުބާރު ބޮޑުވެ، ސަފާރީތަކާއި ފަތުރުވެރިކަމުގެ ސިނާއަތުގައި މަސައްކަތްކުރާ އެތައް ސަތޭކަ މަސައްކަތްތެރިންނަށް ލިބޭނެ ނުހަނު ބޮޑު ހިތްހަމަޖެހުމެއް،" މިޒްނާ ވިދާޅުވިއެވެ. އޭނާ ވިދާޅުވީ، ވެލިދޫގައި ސީ އެމްބިއުލާންސްގެ ޚިދުމަތް ފެށިގެން ދިއުމުގެ ސަބަބުން ނ. އަތޮޅުގެ ރަށްރަށުގެ ހޮސްޕިޓަލުތަކުގެ ޚިދުމަތްތައް ގުޅާލެވިގެން ދާނެ ކަމަށެވެ. ޑިފެންސް މިނިސްޓްރީން ބުނީ، މިއަހަރު ނުވަ ރަށެއްގައި އަލަށް ސީ އެމްބިއުލާންސްގެ ޚިދުމަތް ގާއިމްކޮށް، ތިން ރަށެއްގައި އަލުން އެ ޚިދުމަތް ފަށާނެ ކަމަށެވެ. ހެލްތު މިނިސްޓްރީން ވަނީ މި މަހުގެ 17ވަނަ ދުވަހު، 56 އެމްބިއުލާންސް އަތޮޅުތެރޭގެ އެކި ރަށްރަށާ ހަވާލުކޮށްފައެވެ. https://sun.mv/217050 ތިން ބުރަކަށް ބަހާލައިގެން އެމްބިއުލާންސްތައް ގެނައީ، މި މަހުގެ ތެރޭގައި ކަމަށްވާއިރު މި އަހަރު އިތުރު 31 ރަށަށް އައު އެމްބިއުލާންސްތައް ގެނެސް، ޚިދުމަތް ދެވޭނެ ކަމަށް ހެލްތު މިނިސްޓްރީން ބުނެފައިވެއެވެ. އޭގެއިތުރަށް، މާލޭ ސަރަހައްދާއި ސިޓީތަކުގައި ޕެރަމެޑިކް ޚިދުމަތް ދިނުމަށް ބޭނުންވާ 10 ޕެރަމެޑިކް އެމްބިއުލާންސް ގެނެވި، މި އަހަރު އެ ޚިދުމަތް ވެސް ފެށޭނެކަން އެ މިނިސްޓްރީން ފާހަގަކުރިއެވެ. ފާހަގަކޮށްލެވޭ ގޮތުގައި ވެލިދުއަށް ގައުމީ އެއާލައިން، މޯލްޑިވިއަންގެ ސީޕްލޭން ދަތުރުތައް ވެސް މިދިޔަ ހުކުރު ދުވަހު ވަނީ ފަށައިފައެވެ.