ފުރަތަމަ ދުވަހު ފިރިމީހާއަށް ގެއަށްވަދެވުނުއިރު ސިޓިންގ ރޫމްގެ ސޯފާގައި އޮތަ އޭނާގެ އަނބިމީހާގެ ބަނޑަށާއި މެއަށް އަވަށްޓެރިއަކު ފިތަނީއެވެ. ފިރިމީހާގެ ގާތުގައި ބުނީ އޭނާގެ މެއަށް ކުއްލިއަކަށް ތަދެއް އެރީކަމަށާއި އަވަށްޓެރިޔާ ވަރަށް ގިނަ ކަންކަންކޮށްނުދިންނަމަ އޭނާގެ ފުރާނަ ސަލާމަތް ނުވެ ނުރައްކަލާއި ކުރިމަތިވީސް ކަމަށެވެ. އަވަހަށް ޑޮކްޓަރަށްދާން ބުނުމުން ބުނީ މިހާރު ރަނގަޅު ކަމަށާއި މިހާރު ޑޮކްޓަރަށް ދިއުމުގެ ބޭނުމެއް ނެތް ކަމަށެވެ.   
އެއިގެ ހަފްތާއެއްހައި ދުވަސްފަހުން ފިރިމީހާ ގެއަށް އައިއިރު އަނބިމީހާ ބަދިގޭގައި އުޅޭތީ ބަދިގެއަށް ދިއައިރު ހަމަ އެއްކަލަ އަވަށްޓެރިޔާ ބިންމަތީގައި ކަކޫޖަހައިގެންއިނދެ ސިންކުގެ ގުލީ އާއި ކުޅެނީއެވެ. ބުނީ ގުލީ ބެދިގެން ފެންނުދާތީ ގުލީ ބަދަލުކުރީ ކަމަށެވެ. ފިރިމީހާ ބުނީ ބަދަލުކުރިނަމަވެސް މިހާރުވެސް ތިއައިނީ މީގެ 10 ވަރަކަށް ދުވަސްކުރިން އޭނާ އަމިއްލައަށް ބަދަލުކުރި ގުލީ ކަމަށެވެ. އިތުރު އެއްޗެއް ނުބުނެ މަޑުކޮށްލާފައި ނައްޓައިލި ގުލީ ކޮބައިތޯ ސުވާލުކުރުމުން ދޭނެ ޖަވާބެއް ނުއެނގުނެވެ.  
އެއިގެ އެއްހަފްތާފަހުން ހަވީރު ގެއިން ނުކުންނަމުން އަނބިމީހާ ގާތުގައި ބުނީ ކަމެއް ޖެހިގެން އޮފީހަށްދަނީ ކަމަށާއި އާދެވޭނީ ތަންކޮޅެއް ލަހުން ކަމަށެވެ. އެދުވަހު ފިރިމީހާ އޮފީހަށް ދިއައީއެއް ނޫނެވެ. ދުރުގައި ފިލައި ބަލަންހުރީއެވެ.  
އިރުކޮޅަކުން އަވަށްޓެރިޔާ ގޮސް ގެއަށްވަނުމުން ކުޑައިރުކޮޅެއްކޮށްފައި ގެއަށްވަދެ ކޮޓަރިބެލިއިރު ދެމީހުން ތިބީ އެނދުގައެވެ. ކުރާ ކަންތައް ބަލަން އިރުކޮޅަކު ހުރެފައި ދޮރުލައްޕާފައި ގޮސް ސިޓިންގރޫމްގައި އިންދާ ދެމީހުން އައުމުން ބުންޏެވެ. ފުރަތަމަ ދުވަހު ޑޮކްޓަރަކަށްވެގެން އަނބިމީހާގެ ފުރާނަ ސަލާމަތްކުރީއެވެ. ދެވަނަ ދުވަހު ގުލީ ބަދަލުކުރީއެވެ. މިއަދު އެނދުގައިކުރިކަންތައް ވަރަށް ރީތިކޮށް ފެނިއްޖެއެވެ. އެއީވެސް އަނބިމީހާގެ ފުރާނަ ސަލާމަތްކުރަން ދިން ފަރުވާއަކަށް ނޫނީ ނުވާނެތާއެވެ. އަހަރެންގެ އެއްވެސް މައްސަލައެއް ނެތެވެ. ދެމީހުން އެކުގައި މިގެއިން ހަމަމިހާރު ނުކުންނާށެވެ. ކަލޭގެ ގެއަށް ގެންގޮސްގެން އިތުރުފަރުވާދޭށެވެ." 
އަނބިމީހާ ބުނީ އޭނާއަކީ ބަލިމީހެއްކަމަށާއި އޭނާއަށް ރަޙުމްކުރަން އެދޭކަމަށެވެ. ފިރިމީހާ ބުނީ ބަލިމީހަކަށްވާތީ މިޙަވާލުކުރީ ހުރިހާ ބަލިތަކަށް ފަރުވާކޮށްދެވޭނެ ޑޮކްޓަރަކާއި ކަމަށެވެ. އެހެންގޮތެއް ނެތުމުން ދެމީހުންނަށްވެސް ޖެހުނީ ގެއިން ނުކުންނާށެވެ. އަވަށްޓެރިޔާގެ އަންތބަކު އިނދެއެވެ. ވީމާ އެގެއަށް ވެއްދޭކަށް ނެތެވެ. އަނބިމީހާ މަގުމަތިވީއެވެ.  
އަނބިމީހާއަށް ކުރިމަތިވީ އެންމެ ނިކަމެތި ޙާލަތެވެ. އަޅައިލާނެ މީހަކު ނެތި މަގުމަތިވީއެވެ. އުޅެމުން އުފާވެރި ދިރިއުޅުން ގެއްލުނީއެވެ. ނުހަނު ލޯބިވާ ފިރިއެއްގެ ލޯބިން މަޙްރޫމްވީއެވެ. ގޭގޭގައި ނޯކިރީކޮށްދޭން ހިނގަން މަޖުބޫރުވީއެވެ.  
ހަމައެންމެ ކަމެއްގެ ސަބަބުންނެވެ. ފިރިމީހާއަށް ޚިޔާނާތްތެރިވުމުގެ ސަބަބުންނެވެ. ޝުކުރުވެރި ނުވެވުމުގެ ސަބަބުންނެވެ. ޙަރާމެއް ޙަލާލެއް ނުބަލައި ހިތްއެދޭހައި އުފާތަކެއް ލިބިގަންނަން މަސައްކަތްކުރެވުނީތީއެވެ.  
މިހިރީ ވިސްނައި ފިކުރުކުރަންވީ ކަންކަމެވެ. ކޮންމެ އަންހެނަކުވެސް އަދި ފިރިހެނަކުވެސް ވިސްނައިލާށެވެ. އެކަކު އަނެކަކަށް މަކަރުހަދައި ވައްކަން ކުރެވިދާނެއެވެ. ނަމަވެސް އަބަދަކު ނުކުރެވޭނެއެވެ. ފަޅާއަރާނެއެވެ. އެދުވަހުން ކުރަންޖެހޭނެ ހިތާމަ މާބޮޑުވާނެއެވެ.
 
- ނަޒުލާ / މިއަދުނޫހުގެ ކިޔުންތެރިއެއް