ރާއްޖެ އާއި އިންޑިއާއާ ދެމެދު ފައިސާގެ މުއާމަލާތްތައް ކުރުމަށް ރާއްޖޭގެ އިންސްޓަންޓް ޕޭމަންޓް ސިސްޓަމް "ފަވަރަ" އާއި އިންޑިއާގެ ޔުނިފައިޑް ޕޭމަންޓްސް އިންޓަފޭސް (ޔޫޕީއައި) ގުޅާލުމުގެ ޓެސްޓުތައް މިމަހު ފަށާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.
މި ދެ ސިސްޓަމް ގުޅާލުމުން ދެ ގައުމުގެ ދޭދޭ ފަރުދުންގެ މެދުގައި ރައްކާތެރިކަމާއެކު އަދި ހެޔޮ އަގުގައި ޕޭމަންޓް މުއާމަލާތްތައް ވަގުތުން ކުރެވޭނެ އިންތިޒާމް ހަމަޖެހިގެންދާނެއެވެ. މީގެ އިތުރުން، މި ނިޒާމު ގާއިމުވުމުން ޑޮލަރަށް އޮންނަ ޑިމާންޑަށް ވެސް ކޮންމެވެސް ވަރެއްގެ ލުޔެއް ލިބިގެންދާނެ ކަމަށް ރާއްޖޭގެ ބޭންކުތަކުން ލަފާކުރެއެވެ.