ކުރިޔަށް އޮތް މަޖިލިސް އިންތިޚާބަށް އެންމެ 10 ވަރަކަށް ދުވަހަށް ވެފައިވަނިކޮށް, އިންތިޚާބުގައި ރައީސް މުއިއްޒުގެ ކޮއްކޮ ސައުދާ ވާދަކުރަމުންދާ, ނިލަންދޫ ދާއިރާގައި ހިމެނޭ ނިލަންދޫއިން 129 ގޯތި ދޫކުރުމަށް އިއުލާން ކޮށްފިއެވެ.
ނިލަންދޫ ކައުންސިލުން ކުރި އިއުލާނެއްގައި ބުނެފައިވަނީ މި މަހުގެ ތިން ވަނަ ދުވަހު ބޭއްވި އެ ކައުންސިލްގެ ހަތަރު ވަނަ ދައުރުގެ މި އަހަރުގެ 14 ވަނަ ޖަލްސާއިން އެރަށުން ދިރިއުޅުމަށްޓަކައި ބަންޑާރަ ގޯތި ދޫކުރުމަށް ފާސްކޮށްފައިވާ ކަމަށެވެ. އަދި މިދިޔަ މާޗު މަހުގެ 30 ވަނަ ދުވަހު ގެޒެޓްކޮށްފައިވާ ގޯތި ދޫކުރުމާބެހޭ އުސޫލަށް ބައެއް އިސްލާހް ގެނެސް، އެބަދަލުތަކާއެކު އަލުން އެއުސޫލު ގެޒެޓްކޮށްފައިވާ ކަމަށްވެސް އެ ކައުންސިލުން ބުންޏެވެ.
ނިލަންދޫއިން 129 ގޯތި ދޫކުރުމަށް ކުއްލިއަަކަށް އިއުލާންކުރިއިރު އެ ދާއިރާއަށް ރައީސް މުއިއްޒުގެ ކޮއްކޮ ސައުދާ ދަނީ ވާދަކުރަމުންނެވެ.
އެ ދާއިރާއަށް ވާދަކުރަމުންދާ މުއިއްޒުގެ ކޮއްކޮ ސައުދާއަށް ގޮނޑި ކާމިޔާބު ކޮށްދިނުމަށް މުއިއްޒުދަނީ އިންތިޚާބަށް ނުފުޒު ފޯރުވުމުގެ ނިލަންދޫގެ ގިނަ ބަޔަކަށް ސިޔާސީ މަގާމްތައްވެސް ދެމުންނެވެ. އެގޮތުން ނިލަންދޫގެ 40 ފަރާތަކަށް މިހާތަނަށް އައިއިރު ސިޔާސީ މަގާމްތައް ހަމަޖައްސާދީފައިވާކަމަށް ”ދިޔަވަރު އޮންލައިން“އަށް މައުލޫމާތު ލިބިފައި ވެއެވެ.
”ދިޔަވަރު އޮންލައިން“އަށް މައުލޫމާތު ދިން ސަރުކާރުގެ ސިޔާސީ މަގާމެއްގައި ހުރި އެދާއިރާގެ އިސް ބޭފުޅަކު ވިދާޅުވީ, ސަރުކާރުގެ އެކި އޮފީސްތަކުންނާއި, އަދި އެރަށުގައި ހުންނަ ހެލްތު ސެންޓަރުންވެސް ގިނަބަޔަކަށް މިހާރު ސިޔާސީ މަގާމްތައް ދީފައިވާ ކަމުގައެވެ.
ހަމަ އެއާއެކު, ފ. މަގުދޫގައި ރައީސް ސާލިހުގެ ސަރުކާރުން އަޅަންފެށި އެއަރޕޯޓުގެ މަސައްކަތް މިސަރުކާރުން ހުއްޓާލާ, ސައުދާއަށް ވޯޓު ހޯދުމުގެ ބޭނުމުގައި ފ. ނިލަންދޫގައި އެޅުމަށް ހަމަޖެހިފައިވާ އެއަރޕޯޓު އެޅުމަށް ބޭނުންވާ ބިން ހިއްކުމުގެ މަސައްކަތް ވަނީ ފަށާފައެވެ.
ސަރުކާރުގެ އެއްވެސް އޮފީހަކުން މުވައްޒަފުންގެ މުސާރަތައް ބޮޑު ނުކުރުމަށާއި, އަދި އެއްވެސް މުވައްޒަފަކަށް ޕްރޮމޯޝަންވެސް ނުދިނުމަށް ފިނޭންސް މިނިސްޓްރީން އެންގުމަށްފަހު, ރައީސް މުއިއްޒު ގެންދަވަނީ ކުރިޔަށް އޮތް މަޖިލިސް އިންތިޚާބާ ދިމާކޮށް, ބޮޑެތި މުސާރަލިބޭ ސިޔާސީ މަގާމްތަކަށް ގިނަ އަދަދެއްގެ ބަޔަކު ވައްދަމުންމެވެ.
އެގޮތުން މިހާތަނަށް ސިޔާސީ އެންމެ ގިނައިން ދީފައިވާ އެއް ދާއިރާއަށް ވެގެން ގޮސްފައިވަނީ މުއިއްޒުގެ ކޮއްކޮ ސައުދާ ވާދަކުރަމުންދާ ނިލަންދާ ދާއިރާކަން ފާހަގަ ކޮށްލެވެއެވެ.