ބެލުންތެރިންގެ ހިތްތައް ދަމައިގަންނަ ގޮތަށް ވަރަށް "ލޯބިން" ފިލްމްތައް ޑައިރެކްޓްކުރާ އަބުދުލް ފައްތާހު އަކީ މިހާރު ރާއްޖޭގައި ހުރި އެންމެ ކުޅަދާނަ، ބެލެންތެރިން ބަލައިގެންފައިވާ އެއް ޑައިރެކްޓަރެވެ. ފައްތާހަކީ ފިލްމީ ދާއިރާގައި ގިނަ ދުވަސްތަކެއްވެ، ދާއިރާ ކުރިއެރުމަށް ގިނަ މަސައްކަތެއް ކޮށްފައިވާ ފަރާތެކެވެ.
"ނުވަ އަހަރާ ހަމައަށް ކެލާގައި"
ފައްތާހަކީ ހއ.ކެލާއަށް އުފަން މީހެކެވެ. އުމުރުގެ ޅަ އުމުރު ހޭދަކުރީ ކެލާގައިއެވެ. އުމުރުން ނުވަ އަހަރު ވަންދެން ފައްތާހު ކެލާގައި އުޅުނުއިރު ފައްތާހުގެ ބައްޕައަކީ ހަރުމުނިޔާ ކުޅުއްވި މީހެކެވެ. ކެލާގައި އުޅުނީ ވަރަށް ސަކާރާތުގަ ކަމަށާއި ސްކޫލްގައި އުޅުނުއިރު ދޮން ހިޔަލާއި އަލިފުޅުގެ ޑްރާމާއެއްވެސް ކުޅިފައިވާނެ ކަމަށް ފައްތާހު ބުނެއެވެ.
"ފުރަތަމަ ކުޅުނީ ބައްޕައެއްގެ ރޯލް"
މާލެ ބަދަލުވެ، ގްރޭޑް ނުވައެއްގައި އުޅެނިކޮށް ފައްތާހަށް ފިލްމީ ދާއިރާއަށް ވަނުމަށް ތަޅުދަނޑިއެއް ލިބުނެވެ. އެ ތަނޅުދަނޑިއަކީ މަރިޔަމް ޝައުގީ ދެއްވި ފުރުސަތެކެވެ. އޭރު ޓީވީއެމް ސްކޫލް ކުދިން ބޭނުން ކޮށްގެން އޮފީސް ޓެލެޑްރާމާ ހަދާއިރު މަރިޔަމް ޝައުގީގެ އެދިލެއްވުމަށް ފައްތާހު އަމިއްލައަށް ވާހަކައެއް ލިޔެ، އެ ޑްރާމާގައި ބައްޕަގެ ރޯލެއް އަދާކުރިއެވެ.
1990 ގައި ވެސް ޑްރާމާއެއް ކުޅެފައިވާނެ ކަމަށާއި އެ ޑްރާމާގައިވެސް އަދާކުރީ ބައްޕަގެ ރޯލުކަމަށް ފައްތާހު ބުނެއެވެ. ދެންވެސް ކުޅުނީ ޑްރާމާއެކެވެ. އެ ޑްރާމާގައި ފައްތާހުއާއެކު މުހައްމަދު މަނިކުވެސް ހަރަކާތްތެރިވިއެވެ.
ގްރޭޑް 10 އެއް ނިންމާލާ، ދެން ފައްތާހު ބަދަލުވީ ފަތުރުވެރިކަމުގެ ދާއިރާއަށެވެ. ރިސޯޓެއްގައި ވަޒީފާ އަދާކުރަން ފެށިއެވެ. ނަމަވެސް އެ ދާއިރާގައި އުޅެން ފެށިތާ މާގިނަ އިރުތަކެއް ނުވެ ދާއިރާގެ ދެކެ ފޫހިވުމުން އަނެއްކާވެސް ފައްތާހު މާލެ އައީއެވެ.
ފިލްމީ ދާއިރާގައި ހުރި ޗާލާކީކަން އެނގުމުން ދޫކޮށްލާ ހިތެއް ނުވި
އޭރު ފިލްމީ ފަންނާނުންނަކީ ވަރަށް ގޮތުގަ އުޅުން ބައެއް ކަމަށާއި އެގޮތުން ރެސްޓޯރެންޓްތަކަށް ގޮސް، ޓެކްސީ ފަދަ އެއްޗެއްސަށް ވަދެ އުޅެނީ ފިލްމީ ތަރިން ކަމަށް ފައްތާހު ބުނެއެވެ.
ފައްތާހުގެ ބައްޕަ ނިޔާވުމުން، ފައްތާހުގެ ބޮލުގައި ޒިންމާތަކެއް އެޅުނެވެ. އެގޮތުން ފައްތާހު ބުނީ ކުނި އުކާލަން ދިއުމާއި ކެއްކުމާއި ފެން އުފުލި ހަނދާންވެސް އެބަހުރި ކަމަށެވެ.
ފުރަތަމަ ފާސްޓް ފުޑް ރެސްޓޯރެންޓް "ޗިއާސް"ގައި ފައްތާހު މަސައްކަތްކުރިއިރު މާލޭގެ މަޝްހޫރު މީހުންގެ ދިރިއުޅުން ފެންނަން ފެށީ އެތަނުގެ ކައުންޓަރ ފަހަތުގައި ފައްތާހު ހުރިއިރުއެވެ. ފިލްމީ ދާއިރާއަށް ފައްތާހަށް ލޯބިޖެހުން މިއީވެސް ސަބަބެކެވެ.
ދެން ފައްތާހު ވަނީ ސިފައިންގެއަށެވެ. ސިފައިންގޭގައި ފައްތާހު 6 އަހަރާއި 1 ދުވަސް ހޭދަކުރިއެވެ.
1995 އަހަރުގެ ސިފައިންގެ ޑްރާމާ ޑައިރެކްޓްކުރީ ފައްތާހެވެ. އެއީ ޑްރާމާ "ވޭން" އެވެ. އެ ވާހަކަވެސް ލިޔުނީ ފައްތާހެވެ.
މިގޮތަށް ވިދިވިދިގެން ތިން އަހަރު ސިފައިންގޭގެ އޮފީސް ޓެލެޑްރާމާ ޑައިރެކްޓްކޮށް އެ ތިން އަހަރުވެސް ފައްތާހު ވަނީ އެންމެ މޮޅު ޑައިރެކްޓަރގެ މަގާމު ހާސިލުކޮށްފައެވެ.
ދެން އަނެއްކާވެސް ފައްތާހުގެ ހިޔާލު ބަދަލުވީއެވެ. ސިފައިންގެއަކީ ފައްތާހުގެ ދާއިރާ ނޫން ކަމަށް ގަބޫލުކޮށް ސިފައިންގެއިން ވަކިވެ ފިލްމީ ދާއިރާއަށް ނިކުތީއެވެ.
ފައްތާހު އެންމެ ފުރަތަމަ ޑައިރެކްޓްކޮށްފައިވާ ލަވައަކީ ދަންދަން އެވެ. އޭގެފަހުން އާބެރު ޓޮއްޓޮއް ޑައިރެކްޓްކުރިއެވެ. މީގެއިތުރުންވެސް ކޮޕްސް ބޭންޑާއި ޓީވީއެމްގެ ގިނަ ލަވަތަކެއް ފައްތާހު ޑައިރެކްޓްކޮށްފައިވެއެވެ. އަދި ޓީވީއެމްގެ ޑްރާމާ ސީރީސްތައްވެސް ޑައިރެކްޓްކޮށްފައިވެއެވެ.
"ހިމޭންދުނިޔެ ހެދީ ޖެހިލުންވެ ހުރެ"
ފައްތާހު އެންމެ ފުރަތަމަ ޑައިރެކްޓްކުރި ފިލްމަކީ "ހިމޭންދުނިޔެ"އެވެ. އެއީ 2000 ވަނަ އަހަރުއެވެ. މި ފުރުސަތަކީ ހަވީރުގެ މޫސާ ލަތީފާއި އިސްމާއިލް ނަސީރު ދެއްވި ފުރުސަތެކެވެ. އެ ދެ ބޭފުޅުންގެ އެދިލެއްވުމާއި ހިތްވަރުން ފައްތާހު އޭރުގެ ފިލްމީ ދާއިރާގައި ތިބި މަޝްހޫރު ބޮޑެތި ފަންނާނުންނާއެކު ފައްތާހު އެ ފިލްމް ހަދާ ނިންމާލިއެވެ.
ދެން ފައްތާހު މަސައްކަތް ކުރީ އެއްބައި ނިންމާފައި އޮތް "ރަންމުތް" މި ފިލްމް އެއްކޮށް ނިންމުމެވެ. އެއަށްފަހު ފައްތާހުގެ "އާނ އަހަރެންވެސް ލޯބިވިން" ފެނިގެންދިޔައެވެ. އެއަށްފަހު "ވެހޭ ވާރޭ ތެރެއިން" ޑައިރެކްޓްކުރިއެވެ.
ދެން ސްލޭމް ސްޓޫޑިއޯގެ "އޭނާ" ފައްތާހު ޑައިރެކްޓްކުރިއެވެ. އެއަށްފަހު ފައްތާހުއަށް މި ދާއިރާގައި އޭނާއަށް ލިބުނު އެންމެ ހިތި ތަޖުރިބާއާ ކުރިމަތިވިއެވެ. އެއީ އޭނާ ޑައިރެކްޓްކުރި ފިލްމް "ހުރީމޭ އިންތިޒާރުގައި" އެވެ. އެ ފިލްމަކީ ފައްތާހުގެ ފިލްމެއް ފްލޮޕްވި ހަމައެކަނި ފިލްމެވެ. ފައްތާހު ބުނާ ގޮތުން އެއީ އޭނާގެ ހަޔާތުގައި ކުރެވުނު އެންމެ ޅަ އެގްރިމެންޓެވެ.
އެއަށްފަހު ފައްތާހު އުފެއްދީ އަމިއްލަ ސްޓޫޑިއޯއެކެވެ. އެއީ ރެޑް ޕްރޮޑަކްޝަނެވެ. އެ ޕްރޮޑަކްޝަނުގެ ދަށުން ބެލުންތެރިންގެ ބޮޑު މަގުބޫލު ކަމެއް ހޯދި ޑްރާމާ "ހިނިތުންވެލާށޭ ކަލާ" ފައްތާހު އަމިއްލަ ރަށުގައި ޑައިރެކްޓްކޮށް ނިންމާލިއެވެ. އެއަށްފަހު ފައްތާހު ޕްރޮޑިއުސްކުރި ފިލްމަކީ "ވާ ލޯބި އެނގޭނަމަ ކަލާ"އެވެ.
އެއަށްފަހު ފައްތާހު ޑޭޝްއާ ގުޅި، އަމިއްލަ ސްޓޫޑިއޯ އުވާލިއެވެ. އެގޮތުން ޑޭޝްއާ ގުޅުމަށްފަހު ފައްތާހުގެ އެންމެ ކާމިޔާބު، އެންމެ މަނީ މޭކިން ފިލްމް "ޖިންނި" އޭނާ ޑައިރެކްޓްކުރިއެވެ. ދެން އަމްޖޭއާއެކޮށް "ހަ ފަރާތް"ގެ މަސައްކަތް ފައްތާހުކުރިއެވެ. އެއަށްފަހު "ސާދަވިލޭރޭ" އަދި "ލަވް ސްޓޯރީ" ފައްތާހު އުފެއްދިއެވެ.
ފައްތާހުގެ އެންމެ ފަހުގެ މަސައްކަތަކަށް ފެނިފައިވަނީ ޑޭޝްގެ "އާދޭސް" އެވެ. ފައްތާހު ބުނާ ގޮތުން ފިލްމެއް ހަދާއިރު އޭނާ އެންމެ ބޮޑަށް ސަމާލުކަންދޭ ކަމަކީ ވާހަކައަށެވެ. އަދި ކޮސްޓިއުމަށާއި ލަވަތައް އެއީ ފައްތާހު ވަރަށް ބޮޑަށް ބަލާ ކަންކަމެވެ.
ފައްތާހުގެ މަސައްކަތަށް ދެން އެންމެ އަވަހަށް ފެންނަނީ "ހަތަރު ހަޅަ"އެވެ. އޭގައި ހިމެނޭ ހަތަރު ފިލްމްގެ ތެރެއިން ފައްތާހުގެ ފިލްމަށް ކިޔަނީ "ދަރި/ފިރި"އެވެ. ފައްތާހު އެފަދަ ފިލްމެއް ހަދާނެ މިއީ އެންމެ ފަހު ފަހަރުކަމެވެ. މި ފިލްމް ހެދީ ތަފާތު ފިލްމްވެސް ހަދަން އެނގޭކަން ސާބިތުކޮށްދިނުމަށް ކަމަށް ފައްތާހު ބުނެއެވެ.
"އަޅުގަނޑުގެ ސްޓައިލްއަކީ ލޯބި"
ފައްތާހު އެތައް ކާމިޔާބު ފިލްމްތަކެއް ޑައިރެކްޓްކޮށްފައިވާއިރު ފައްތާހު ބުނީ އޭނާ މަސައްކަތް ކުރަނީ ބެލުންތެރިން ބޭނުންވާނެ ގޮތަށާއި ފިލްމަކީ ހަޑި ފިލްމެކޭ ބުނުމުގެ ފުރުސަތު ނުދިނުމަށް ކަމަށެވެ. އެވޯޑައް އޭނާ މަސައްކަތް ނުކުރާ ކަމަށްވެސް އޭނާ ބުންޏެވެ.
ފައްތާހުގެ ސްޓައިލް ފިލްމްތަކަކީ "ލޯބި" ފިލްމްތަކެކެވެ. ފިލްމްތަކުގައި ހުންނަ ރޮމޭންސްއަކީ އޭނާގެ ސްޓައިލްއެވެ. ފިލްމްތަކުގައި ރޮމޭންސް ދައްކާއިރު އެއްވެސް ބައުންޑަރީއެއް ނުބަހައްޓާ ކަމަށް ފައްތާހު ބުންޏެވެ.
އެގޮތުން ފައްތާހު ބޭނުންވާ ގޮތަށް ކެމިސްޓްރީ ގެނެސްދެނީ ސީޒަން އާއި އާމިރާ ކަމަށް ފައްތާހު ބުނެއެވެ.
ފައްތާހުގެ އެންމެ މަގުބޫލު ތަނަކީ ފިނޮޅެވެ. އޭނާގެ ކޮންމެ ފިލްމެއްގައިވެސް ބީޗެއް ނުވަތަ ފިނޮޅެއް ނުދައްކާ ފިލްމެއް ނެތެވެ. ފައްތާހުއަށް އެންމެ ކަމުދާ ބީޗުގެ ގޮތުގައި ބ.ކަމަދޫ ބީޗު ފާހަގަކުރާއިރު އެންމެ ކަމުދަނީ މުރަވަންދޫ ފިނޮޅެވެ.
"މަރިޔަމް ނިޝާ ހީލީމަ އެވަރެއް ނެތް"
ފައްތާހުއަށް އަބަދުވެސް އެންމެ ކަމުދާ ތަރިއަކީ މަރިޔަމް ނިޝާއެވެ. އޭގެއިތުރުން ނިއުމާ މުހައްމަދަކީ މޮޅު އެކްޓްރެސްއެއް ކަމަށް ފައްތާހު ގަބޫލުކުރާއިރު ރިޝްފާ، އައްޒަ، މަޖޫ އަދި އަޒޫ އަކީ މި ދާއިރާގައި ކުރިމަގެއް އޮތް ތަރިން ކަމަށް ފައްތާހު ބުނެއެވެ.
ދޮން އައްޔަ އަދި ޖުމައްޔިލް އަކީ ވެސް އުއްމީދު ބޮޑު ދެ ތަރިން ކަމަށް ފައްތާހު ބުންޏެވެ.
"މި ދާއިރާއަށް ނިކުންނަންވީ ކިޔަވައިގެން"
ފައްތާހު ބުނީ މި ދާއިރާއަކީވެސް ކިޔަވައިގެން އުޅެވޭ ދާއިރާއެއް ކަމަށާއި ހަމަހުރެފަ މި ދާއިރާއަށް ވަނީމަ ކަމަކުނުދާނެ ކަމަށެވެ. ކުރިން މި ދާއިރާއަށް ކިޔެވުމުގެ ފުރުސަތު ނެތް ނަމަވެސް މިހާރު މި ދާއިރާއަށް ކިޔެވުމަށް ގިނަ ފުރުސަތުތަކެއް އެބަހުރި ކަމަށް ފައްތާހު ބުނެއެވެ. އޭރުން މި ދާއިރާ ކުރިއަރާނެ ކަމަށް ފައްތާހު ގަބޫލުކުރެއެވެ.
މީގެއިތުރުން ރާއްޖޭގެ ރަށްރަށުގައި ސިނަމާތައް ނެތުމަކީވެސް ދާއިރާއަށް ލިބޭ ހީނަރު ކަމެއް ކަމަށް ފައްތާހު ބުނެއެވެ. ރަށްރަށުގައި ފެންވަރުގެ ސިނަމާތައް ނެތުމަކީ ހިތާމަކުރާ ކަމެއް ކަމަށް ފައްތާހު ބުނެއެވެ.
ތައުލީމީ ބަޔަކު ދާއިރާއަށް ނިކުމެ ފެންވަރު ރަނގަޅު ސިނަމާތައް ހުޅުވާ، ބޭރުގެ ގައުމުތަކުގައި ރާއްޖޭގެ ފިލްމްތައް އެޅުވިއްޖެނަމަ މި ދާއިރާގެ ތަރިން އުޖޫރައެއްގެ ގޮތުގައި އެއްލައްކަ ފާންސާސް ހާސް ރުފިޔާ ނަގާނެ ކަމަށް ފައްތާހު އުންމީދުކުރެއެވެ.
"ފުޓްބޯޅަ ދަނޑުތަކަށްވުރެ ސިނަމާތަކަށް މީހުން ވަންނަލެއް ސަޅި"
ފައްތާހު ގަބޫލުކުރާ ގޮތުގައި ރާއްޖޭގައި ފިލްމީ ދާއިރާ މީހުން ބަލައިގަނެއެވެ. އެގޮތުން އެ ފަރާތްތަކުގެ އުފެއްދުންތައް ބަލައި، އެއަށް ފާޑުކިޔަނީވެސް ބަލައިގަންނާތީއެވެ. އަދި ސިނަމާތައް މިހާރުވެސް ފުރޭ ކަމަށާއި ފުޓްބޯޅަ މެޗެއް ބަލަން ވަންނަ މީހުންނަށްވުރެ ފިލްމް ބަލަންދާ މީހުން މިހާރުވެސް ގިނަ ކަމަށް އޭނާ ފާހަގަކުރެއެވެ.
"އަންނަ ދައުރަށް ޗެއާޕާސަންއަށް ކުރިމަތިނުލާނަން"
މިހާރު ފިލްމް އިންޑަސްޓްރީގެ ޗެއާޕާސަންގެ ގޮތުގައި ހުރި ފައްތާހު އަންނަ ދައުރަށް ކުރިމަތިނުލާން ނިންމާފައިވާއިރު މިހާރު އިންޑަސްޓްރީ ކުރިއަރުވަން ފައްތާހު ދަނީ ގިނަ މަސައްކަތްތަކެއް ކުރަމުންނެވެ. އަދި މިއަހަރު ފައްތާހު އެއްކޮށް ހުރީ އިންޑަސްޓްރީއަށް ހުސްވެ ކަމަށްވެސް ފައްތާހު ބުންޏެވެ.
ފައްތާހު ބުނީ އިންޑަސްޓްރީ ތެރޭ މައްސަލަތަކެއް ނެތް ކަމަށާއި ހިޔާލު ތަފާތުވުމަކީ ކޮންމެތާކުވެސް އޮންނާނެ ކަމެއް ކަމަށެވެ.
ފައްތާހު ބުނީ މިނިވަން 50 ޝޯވގައި ފަންނާނުންގެ ވަރަށް ގްރޭންޑް ހަރަކާތެއް ހުށައަޅައިދޭން ބޭނުންވާ ކަމަށެވެ. އެކަމަށް މިހާރުވެސް ޕްރޮޕޯސަލް ސަރުކާރަށް ހުށައަޅާފައިވާނެ ކަމަށެވެ.
"ބައްޕައެއް ތިމާވެއްޓަށް މަސައްކަތްކުރާ މީހެއް"
ފައްތާހަކީ ދެ ކުދިންގެ ބައްޕައެކެވެ. ފިލްމީ ދާއިރާގެ އިތުރުން ފައްތާހަކީ ކުނި މެނޭޖްކުރުމުގެ މަސައްކަތްކޮށް، އެކަމަށް ރައްޔިތުން ހޭލުންތެރިކުރުމަށް ގިނަ މަސައްކަތްތަކެއްކުރާ ފަރާތެކެވެ.
ޔޫއެންޑީޕީއާ ދިން ފުރުސަތެއްގައި ފައްތާހު ވަނީ ހެޔޮގޮތުގައި ކުނި ނައްތާލާނެ ނިޒާމެއްގެ ފަރުމާކޮށްފައެވެ. އެ ނިޒާމް މިހާރު ވަނީ އުނގޫފާރުގައި ގާއިމުކޮށްފައެވެ. އެ ނިޒާމް ބޭނުންކޮށްގެން އެ ރަށުގައި ދަނީ ކާމިޔާބުކަމާއެކު ކުނި ނައްތާލަމުންނެވެ. މިހާރު މި ނިޒާމް ފަރެސްމާތޮޑާގައި ގާއިމުކުރުމުގެ މަސައްކަތްވެސް މިހާރު ދަނީ ކުރަމުންނެވެ.
ފައްތާހު ދެކެން ބޭނުންވާ ދުވަހަކީ ޝަރަފުވެރިކަމުގެ އެވޯޑް ފައްތާހަށް ލިބޭ ދުވަހެވެ.
ސަޕޯޓަރުންނަށް ފައްތާހު ދިން މެސެޖަކީ ސިޔާސީ ކަންކަމުން ދުރުހެލިވުމަށްޓަކައި ފިލްމީ މަސައްކަތްތައް ބަލާލާ، ފާޑެއް ކިޔާލަން ބޭނުންނަމަ ސީދާ އެމީހަކަށް ގުޅާލައިގެން ފާޑުކިޔާލަން އެދޭ ކަމަށެވެ. ފައްތާހު ބުނީ ދިވެހި ކޮންމެ ފިލްމަކުންވެސް އިބުރަތެއް ލިބިގެންދާނެ ކަމަށެވެ.