ކަނޑުމެދުގައި އެކަހެރިވެފައިވާ އުޅަނދެއްގައި ނުރައްކާތެރި ބައްޔެއް ފެތުރެމުންދާ ޚަބަރަކީ ފަހުގެ ތާރީޚެއްގައި ދުނިޔެ ދުށް ބިރުވެރި ހަނދާންތަކެއް އާކޮށްދޭ ކަމެކެވެ. މީގެ މަހެއްހާ ދުވަސް ކުރިން އާޖެންޓީނާއިން ފުރައިގެން ދަތުރުކުރަމުންދިޔަ "އެމްވީ ހޮންޑިއަސް" ކްރޫޒް ޝިޕްގައި ހަންޓާވައިރަސް ފެތުރި، މިހާތަނަށް ތިން މީހަކު ވަނީ މަރުވެފައެވެ. އަދި އިތުރު ހަތަރު މީހަކު ވަނީ ފަރުވާއަށް އުޅަނދުން ބާލާފައެވެ. މި ހާދިސާއާ ގުޅިގެން، އިނގިރޭސިވިލާތާއި އެމެރިކާ ފަދަ ގައުމުތަކަށް އެނބުރި ދިޔަ ފަސިންޖަރުން ހޯދައި، ބަލި ފެތުރުން ހުއްޓުވުމުގެ ބޮޑު މަސައްކަތެއް ދުނިޔޭގެ އެކި ކަންކޮޅުތަކުގައި ދަނީ ކުރަމުންނެވެ. މި ބަލީގެ ނުރައްކާ އާންމުންނަށް ކުޑަކަމަށް ސިއްހީ މާހިރުން ވިދާޅުވެއެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ޑރ. މާރިއާ ވެން ކާކޯވް ވިދާޅުވި ގޮތުގައި، މިއީ އާލަމީ ވަބާއެއްގެ ފެށުމެއް ނޫނެވެ. އަދި މިއީ ކޯވިޑް ނުވަތަ އިންފްލުއެންޒާ ފަދަ ބައްޔެއް ނޫން ކަމަށާއި، މި ބަލި ފެތުރޭ ގޮތް މުޅިން ތަފާތު ކަމަށް އޭނާ ފާހަގަކުރެއްވިއެވެ. ހަންޓާވައިރަސް ޖެހުމުން އިންސާނުންގެ ކިބައިން އޭގެ އަލާމާތްތައް އާންމުކޮށް ފެންނަން ފަށަނީ ބަލިޖެހޭތާ އެއް ހަފުތާއާއި އަށް ހަފުތާއާ ދެމެދުގެ މުއްދަތެއްގައެވެ. ބަލީގެ ކުރީކޮޅު ފެންނަ އަލާމާތްތަކަކީ އާންމު ރޯގާގެ އަލާމާތްތަކާ އެއްގޮތް އަލާމާތްތަކެކެވެ. މީގެ ތެރޭގައި ގަދައަށް ހުން އައުން، ވަރުބަލިވުން، މަސްތަކުގައި ގަދައަށް ރިއްސުން (ޚާއްޞަކޮށް ފަލަމަސްގަނޑު، އުނަގަނޑު އަދި ބުރަކަށީގައި)، ބޮލުގައި ރިއްސުން، އަދި ބަނޑުގެ މައްސަލަތައް (މޭނުބައިކުރުން، ބޭރަށް ހިންގުން) ހިމެނެއެވެ. މި އަލާމާތްތައް ފެންނަން ފެށުމަށްފަހު، ވަރަށް އަވަހަށް ނޭވާލާ ނިޒާމުގެ ބޮޑެތި މައްސަލަތަކަށް ބަދަލުވެއެވެ. މީގެ ތެރޭގައި ކެއްސުން، ނޭވާ ކުރުވުން އަދި ފުއްޕާމޭގައި ފެން ހެދުމުގެ ސަބަބުން ނޭވާލާން އުނދަގޫވުން ހިމެނެއެވެ. ޑަބްލިއުއެޗްއޯގެ އެންމެ ފަހުގެ ތަފާސްހިސާބުތައް ދައްކާގޮތުން، މި އުޅަނދުން މިހާތަނަށް އަށް ކޭސް ވަނީ ފެނިފައެވެ. އޭގެ ތެރޭގައި ޔަގީންކުރެވިފައިވާ ފަސް ކޭސް އަދި ޝައްކުކުރެވޭ ތިން ކޭސް ހިމެނެއެވެ. ހަންޓާވައިރަސް އާންމުގޮތެއްގައި ފެތުރެނީ މީދާ ފަދަ ސޫފީގެ ނަޖިހުން ތަޣައްޔަރުވެފައިވާ ވައިގެ ޒަރީއާއިންނެވެ. ނަމަވެސް މި ކްރޫޒް ޝިޕުން ފެނިފައިވަނީ އިންސާނުންގެ މެދުގައި ގައިގޯޅިވުމުން ފެތުރޭ “އެންޑީސް” ސްޓްރެއިންއެވެ. ކްރޫޒް ޝިޕްތަކަކީ ޖާގައިގެ ގޮތުން ކުދި، އަދި ގިނަ ބަޔަކު އެކުގައި ވަގުތު ހޭދަކުރާ ތަންތަން ކަމަށްވުމުން، އެކަކު އަނެކަކުގެ ގަޔަށް ބަލި އެރުމުގެ ފުރުސަތު ބޮޑެވެ. އޭޕްރީލް 24 ވަނަ ދުވަހު ސެންޓް ހެލީނާ އައިލެންޑަށް ފޭބި 30 ފަސިންޖަރުންގެ ތެރެއިން ބައެއް މީހުންނަށް ބަލި ޖެހިފައިވާއިރު، އޭގެ ތެރޭގައި ހިމެނޭ ނެދަލޭންޑްސްގެ އަންހެނަކު ވަނީ މަރުވެފައެވެ. އޭނާގެ ފިރިމީހާވެސް އޭގެ ކުރިން އުޅަނދު މަތީގައި ވަނީ މަރުވެފައެވެ. އިނގިރޭސިވިލާތުގެ ހެލްތު ސެކިއުރިޓީ އޭޖެންސީ (ޔޫކޭއެޗްއެސްއޭ) ގެ ޑެޕިއުޓީ ޑިރެކްޓާ ޑރ. މީރާ ޗަންދު ވިދާޅުވި ގޮތުގައި، އާންމު ރައްޔިތުންނަށް އޮތް ނުރައްކާ ވަރަށް ކުޑަކަމުގެ ޔަގީންކަން ދިނުމަކީ މުހިންމު ކަމެކެވެ. އަދި ބަލި އިތުރަށް ފެތުރުން ހުއްޓުވުމަށްޓަކައި، އުޅަނދާ ނުވަތަ ބަލިމީހުންނާ ގުޅުންހުރި އެންމެން ހޯދުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. ރައްކާތެރިކަމުގެ ފިޔަވަޅެއްގެ ގޮތުން، އެނބުރި ގައުމަށްދާ އިނގިރޭސި ފަސިންޖަރުން 45 ދުވަހުގެ މުއްދަތަކަށް އެކަހެރިވުމަށް ވަނީ އަންގާފައެވެ. ކޭޕް ވާޑް ކައިރީގައި މަޑުކުރުމަށްފަހު، އެމްވީ ހޮންޑިއަސް މިހާރު ދަތުރުކުރަމުން ދަނީ ސްޕެއިންގެ ކެނޭރީ އައިލެންޑްސްއާ ދިމާއަށެވެ. އަދި އުޅަނދުގައި ތިބި މީހުންގެ ކިބައިން ބަލީގެ އަލާމާތެއް މިހާރު ނުފެންނަ ކަމަށް ކަމާބެހޭ ފަރާތްތަކުން ކަށަވަރުކޮށްދެއެވެ.