ހަމަލާ ބަދަލުކުރުން މެދުކަނޑާލަން އޭޕްރިލް މަހު ގާއިމުކުރި އެއްބަސްވުމަށްފަހު ހިނގި އެންމެ ނުރައްކާތެރި ކުރިމަތިލުމުގައި، އެމެރިކާ އާއި އީރާނުން ބުރާސްފަތި ދުވަހު އެއްބަޔަކު އަނެއްބަޔަކަށް ވަރުގަދަ ހަމަލާތަކެއް ދީފި އެވެ.
ހަނގުރާމަ ހުއްޓާލުމަށާއި، އިގްތިސާދީ ގޮތުން މުހިންމު ހޮރްމޫޒް ކަނޑުއޮޅި ހުޅުވުމަށް ކުރަމުން އަންނަ މަޝްވަރާތަކަށް މި ހަމަލާތަކުގެ ސަބަބުން ވަނީ ބޮޑު ލޮޅުމެއް އަރައިފަ އެވެ.
މި ކުރިމަތިލުމުގެ ތެރެއަށް އެމެރިކާގެ ބައިވެރިއެއް ކަމަށްވާ ކުވެއިތު ވެސް ވަނީ ވަދެފަ އެވެ. ކުވެއިތުން ބުނި ގޮތުގައި އެ ގައުމުން ވަނީ އަމާޒުވަމުންދިޔަ ހަމަލާތަކަކަށް ރައްދުދީފަ އެވެ. މި ހަމަލާތައް ކުރިމަތިވީ، އިޒްރޭލުން ލުބުނާނުގެ ދެކުނުގެ ބޮޑު ބައެއް "ހަނގުރާމައިގެ ސަރަހައްދެއް" ގެ ގޮތުގައި ކަނޑައެޅުމާ ގުޅިގެން، ލުބުނާން ފްރަންޓުގައި މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގަ އެވެ.
އީރާނުގެ ދައުލަތުގެ މީޑިއާ  އިން ބުނި ގޮތުގައި، އީރާނުގެ ސިފައިން ވަނީ ހޮރްމޫޒް ކަނޑުއޮޅި ހުރަސްކުރަން އުޅުނު ހަތަރު އުޅަނދަކަށް ހަމަލާދީފަ އެވެ. ފެބްރުއަރީ މަހުގެ ފަހުކޮޅު ހަނގުރާމަ ފެށުނީއްސުރެ އީރާނުން ދަނީ އެ ކަނޑުއޮޅި ބަންދުކޮށްގެން ހިފަހައްޓަމުންނެވެ.
އެމެރިކާގެ އޮފިޝަލަކު ވިދާޅުވި ގޮތުގައި، އެމެރިކާ ސިފައިން ވަނީ އީރާނުގެ ދެކުނުގެ ބަނދަރެއް ކަމަށްވާ ބަންދަރު އައްބާސްގައި ހުރި ގްރައުންޑް ކޮންޓްރޯލް ސްޓޭޝަނަކަށް ހަމަލާދީފަ އެވެ. އީރާނުގެ ރިވޮލިއުޝަނަރީ ގާޑްސްއާ ހަވާލާދީ އެ ގައުމުގެ ރަސްމީ މީޑިއާއިން ރިޕޯޓްކުރި ގޮތުގައި، މީގެ ރައްދުގައި އީރާނުން ވަނީ "އެ ހަމަލާ ފޮނުވާލި އެމެރިކާގެ ވައިގެ މަރުކަޒަށް" އަމާޒުކޮށް ހަމަލާދީފަ އެވެ.
އެ މަރުކަޒު ހުރި ތަނެއްގެ ތަފްސީލު އީރާނުން ހާމަކޮށްފައެއް ނުވެ އެވެ. ނަމަވެސް އެމެރިކާ ސިފައިން ތިބޭ ކުވެއިތުން ބުނީ، އެ ގައުމުގެ އެއާ ޑިފެންސް ސިސްޓަމްތަކުން ހަމަލާއަކަށް ރައްދުދީފައިވާ ކަމަށެވެ.
އީރާނުގެ ފޮރިން މިނިސްޓްރީގެ ތަރުޖަމާނު އެސްމާއިލް ބަގާއީ ވަނީ އެމެރިކާގެ ހަމަލާތައް ކުށްވެރިކުރައްވައި، ގައުމުގެ ސިޔާދަތު ދިފާއުކުރުމަށް "ކުރަންޖެހޭ ހުރިހާ ކަމެއް" ކުރާނެ ކަމަށް ވިދާޅުވެފަ އެވެ. މި ހަމަލާތަކަކީ ހަމަލާބަދަލުކުރުން ހުއްޓާލުމުގެ އެއްބަސްވުމާ ޚިލާފުވުން ކަމަށް އީރާނުން ބުނިއިރު، އެމެރިކާގެ އޮފިޝަލު ވިދާޅުވީ މިއީ "ހަމައެކަނި ދިފާއީ އަދި ހަމަލާ ބަދަލުކުރުން ހުއްޓާލާފައި އޮތުމުގެ ހާލަތު ދެމެހެއްޓުމަށް" ދިން ހަމަލާތަކެއް ކަމަށެވެ.
މި ކުރިމަތިލުމުގެ ސަބަބުން، ހަނގުރާމަ ރަސްމީކޮށް ނިންމުމަށް ކުރާ މަޝްވަރާތަކަށް ވާނެ ގޮތަކާ މެދު ވަނީ ސުވާލު އުފެދިފަ އެވެ.
މިދިޔަ ފެބްރުއަރީ 28 ގައި އެމެރިކާ އާއި އިޒްރޭލުން އީރާނަށް ދިން ހަމަލާތަކާ އެކު ފެށުނު ހަނގުރާމަ ނިމޭނެ އިރެއް އަދިވެސް ނޭނގެ އެވެ. ނަމަވެސް، ދެ ފަރާތުން ކުރެ އެއްވެސް ފަރާތަކުން ފުރިހަމަ ހަނގުރާމައަކަށް ދާން ބޭނުންވާ ކަމަކަށް މިހާރު ނުފެނެ އެވެ.
މިހާރު ހުށަހަޅާފައިވާ އެއްބަސްވުމުގެ މައިގަނޑު އަމާޒަކީ ހޮރްމޫޒް ކަނޑުއޮޅީގެ ދަތުރުފަތުރުތައް ފުރިހަމައަށް ހުޅުވާލުމެވެ. މި ކަނޑުއޮޅި ބަންދުވުމުގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑު ލޮޅުމެއް އަރައިފަ އެވެ.
ބުރާސްފަތި ދުވަހުގެ ހަމަލާތަކުގެ ޚަބަރާ އެކު، ތެލުގެ އަގުތައް ވަނީ އަނެއްކާ ވެސް މައްޗަށް ގޮސްފަ އެވެ. މިއީ އެއްބަސްވުމަކަށް އާދެވިދާނެ ކަމުގެ އުއްމީދުގައި އޭގެ ކުރީ ދުވަހު އަގުތައް ދަށަށް ދިއުމަށްފަހު އައި ބަދަލެކެވެ. -- އޭއެފްޕީ