އެމެރިކާގެ އޯޕަންއޭއައި ކުންފުނިން އަންގާރަ ދުވަހު ބޭއްވި ލައިވްސްޓްރީމެއްގައި، އެ ކުންފުނީގެ އެންމެ ފަހުގެ އޭއައި އިމޭޖް ޖެނެރޭޓާ "ޗެޓްޖީޕީޓީ އިމޭޖަސް 2.0" ރަސްމީކޮށް އިފްތިތާޙުކޮށްފިއެވެ. އެ ކުންފުނިން ބުނާ ގޮތުގައި މިއީ ކުރީގެ މޮޑެލްތަކަށްވުރެ ބުއްދިވެރި، އަދި ކުދިކުދި ތަފްސީލުތަކަށް ބަލައިގެން "ސްލޮޕް" އުފައްދާ މޮޑެލެކެވެ. މި އައު މޮޑެލްގެ ފެންވަރު އޮޅުންފިލުވައި ދެމުން އޯޕަންއޭއައި އިން ބުނީ، ކުރީގެ ޑީ-އޭ-އެލް-އީ އަކީ "ހޮހަޅައިގެ ކުރެހުން" ކަމަށްވާނަމަ، އިމޭޖަސް 1.0 އަކީ "ގަދީމީ އާޓް" ކަމަށާއި، އަދި އިމޭޖަސް 2.0 އަކީ އާޓުގެ "ރެނައިސާންސް" ނުވަތަ އައު އިންގިލާބެއް ކަމަށެވެ. https://sun.mv/220416 ކުންފުނީގެ ސީއީއޯ ސޭމް އޯލްޓްމަން ވިދާޅުވީ މިއީ ޖީޕީޓީ-3 އިން އެއްފަހަރާ ޖީޕީޓީ-5 އަށް ދިއުން ފަދަ ބޮޑު ކުރިއެރުމެއް ކަމަށެވެ. މި މޮޑެލްގައި ގިނަ ބަސްތަކަށް ސަޕޯޓްކުރުމާއި، ތަސްވީރުތައް ދެނެގަތުމުގެ ގާބިލުކަން ވަނީ އިތުރުކޮށްފައެވެ. މިސާލެއްގެ ގޮތުން ކުންފުނިން ދެއްކި ބަތް ތަށްޓެއްގެ ތަސްވީރުގައި، އެންމެ ކުޑަ ބަތް ފުކެއްގައި ވެސް މޮޑެލްގެ ނަން ވަރަށް ސާފުކޮށް ލިޔެފައި ހުއްޓެވެ. މި މޮޑެލް ބޭނުންކުރުމަށް ދެ މޯޑެއް ވަނީ ތަޢާރަފުކޮށްފައެވެ. އެއީ ހުރިހާ ޗެޓްޖީޕީޓީ ޔޫޒަރުންނަށާއި އޭޕީއައި ބޭނުންކުރާ ފަރާތްތަކަށް ލިބޭ "އިންސްޓަންޓް" މޯޑާއި، އަދި ޕްލަސް، ޕްރޯ އަދި ބިޒްނަސް ސަބްސްކްރައިބަރުންނަށް ޚާއްސަ "ތިންކިން" މޯޑެވެ. ތިންކިން މޯޑުގައި މޮޑެލަށް ވެބް ސާޗްކޮށްގެން ވަގުތުން މަޢުލޫމާތު ހޯދުމުގެ ގާބިލުކަން ލިބިގެންވެއެވެ. މީގެ އިތުރުން އެއް ޕްރޮމްޕްޓަކުން ތަފާތު ގިނަ ތަސްވީރުތައް އުފެއްދުމާއި، އަމިއްލަ މަސައްކަތް ދެވަނަ ފަހަރަށް ޗެކްކުރުމުގެ ފުރުސަތު ލިބޭއިރު، އެއް ޖުމްލައިގެ އިރުޝާދަކުން މުޅި ކޮމިކް ފޮތެއްގެ ސަފްހާތައްވެސް ތައްޔާރުކުރެވޭނެ ކަމަށް އޯޕަންއޭއައި އިން ބުނެއެވެ. މި މޮޑެލް ނެރުމުގެ ކުރިން ރެޑިޓް އަދި އެކްސް ފަދަ މަންސަތަކުގައި "ޖީޕީޓީ-އިމޭޖް-2" ގެ ނަމުގައި ލީކުވެފައިވާކަން އިންޖިނިއަރުން ވަނީ ކަށަވަރުކޮށްދީފައެވެ. ނަމަވެސް، ލީކުވި ބައެއް ތަސްވީރުތަކުގައި ބޮޑެތި ގޯސްތަކެއް ހުރިކަން ފާހަގަކުރެވުނެވެ. އޭގެ ތެރޭގައި ދުނިޔޭގެ މެޕްގައި ގައުމުތަކުގެ ނަން ގޯސްކޮށް ހުރުމާއި، ކެންޔާގެ ވެރިރަށް ނައިރޯބީ ސައުދީ އަރަބިއްޔާގައި އޮތް ކަމަށް ދެއްކުން ހިމެނެއެވެ. އޯޕަންއޭއައި އިން މިހާރު ތައްޔާރުވަމުން ދަނީ މި އަހަރު ބޭއްވުމަށް ހަމަޖެހިފައިވާ އައިޕީއޯ އަކަށެވެ. ކުންފުންޏަށް ފައިދާ ހޯދުމަށްޓަކައި "ފޯ-ޕްރޮފިޓް ޕަބްލިކް ބެނެފިޓް ކޯޕަރޭޝަން" އަކަށް ބަދަލުވަމުންދާއިރު، ޚަރަދު ކުޑަކުރުމުގެ ގޮތުން ވީޑިއޯ ޖެނެރޭޓާ "ސޯރާ" ވެސް ވަނީ އުވާލާފައެވެ. މި އަޕްޑޭޓާއެކު ހަފްތާއަކު އެއް ބިލިއަން ޔޫޒަރުންނަށް ޚިދުމަތް ދިނުމަށް އޯޕަންއޭއައި އިން އުންމީދުކުރެއެވެ. ރިސާޗަރެއް ކަމަށްވާ ގެބްރިއަލް ގޯ ވިދާޅުވި ގޮތުގައި މި މޮޑެލްގެ އެންމެ ޚާއްސަ ކަމަކީ އޭގައި ހިމެނޭ "ފޮޓޯރިއަލިޒަމް" ނުވަތަ ހަގީގީ ފޮޓޯއެއް ފަދަ އިހުސާސް ގެނެސްދޭ ސްޓައިލެވެ. މާކެޓްގެ ވާދަވެރިކަން ވަނީ ވަރަށް ބޮޑަށް އިތުރުވެފައެވެ. އެންތްރޮޕިކްގެ "ކްލޯޑް" އާއި ގޫގުލްގެ "ޖެމިނައި 3" އަށް ލިބެމުންދާ ތަރުހީބާ ގުޅިގެން އޯޕަންއޭއައި އިން "ކޯޑް ރެޑް" އިޢުލާންކޮށްފައިވާ ކަމަށް ރިޕޯޓްތައް ބުނެއެވެ. އަދި އެންވީޑިއާގެ ސީއީއޯ ޖެންސަން ހުއާންގް ވެސް ވަނީ އޯޕަންއޭއައިގެ ކޮންޓްރޯލް ދަށްވެދާނެތީ ކަންބޮޑުވުން ފާޅުކޮށްފައެވެ.