ތިމާވެއްޓަށް ލިބޭ ގެއްލުންތަކާ ގުޅިގެން ޖޫރިމަނާކޮށްފައިވާ މައްސަލަތަކުގައި ދައުލަތަށް 930.3 މިލިއަން ރުފިޔާ ނުލިބި އޮތްކަން އެންވަޔަރަމަންޓް މިނިސްޓްރީގެ އޮޑިޓް ރިޕޯޓުން އެނގިއްޖެ އެވެ.
ތަފްސީލް - އޮޑިޓް ރިޕޯޓްގައިވާ ގޮތުން އެއީ، ތިމާވެއްޓަށް ލިބޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު 2011 ވަނަ އަހަރު އެކުލަވާލިއިރުން ފެށިގެން މިދިޔަ ސެޕްޓެމްބަރު މަހާ ހަމައަށް ޖޫރިމަނާކޮށް ނުލިބި ހުރި ފައިސާ އެވެ.
 އެ ފައިސާ އަނބުރާ ހޯދުމަށް އެންވަޔަރަމަންޓް މިނިސްޓްރީން ބައެއް ކަންކަން އިސްލާހުކުރުމަށް އޮޑިޓް ރިޕޯޓްގައި ލަފާ ދީފައިވެ އެވެ. އެއީ:
ފައިސާ ދެއްކުމަށް ކަނޑައަޅާފައިވާ މުއްދަތުގެ ތެރޭގައި ފައިސާ ހޯދުމަށް މަސައްކަތްކުރުން
މުއްދަތުގެ ތެރޭގައި ފައިސާ ނުލިބިއްޖެ ނަމަ، މާލިއްޔަތު ގަވާއިދުގައިވާ ގޮތުގެ މަތިން ފައިސާ ދެއްކުމަށް އިތުރު ހަތް ދުވަހުގެ މުއްދަތެއް ދީ ލިޔުމުން އެކަން އެންގުން
އެ މުއްދަތު ހަމަވުމުން ވެސް ފައިސާ ނުދައްކާ ނަމަ، އެންމެ ފަހު ފުރުސަތެއްގެ ގޮތުގައި އިތުރު ހަތް ދުވަހުގެ މުއްދަތު ދޭ ގޮތަށް ލިޔުން ފޮނުވުން
އޭގެ ފަހުގައި ވެސް ފައިސާ ނުދައްކާ ނަމަ ފައިސާ ހޯދުމުގެ މައްސަލަ ޝަރީއަތަށް ހުށަހަޅައިގެން ކުރިއަށް ގެންދިއުން
ޝަރީއަތަށް ހުށަހަޅައިގެން ވެސް ފައިސާ ނުދައްކާ ނަމަ އެ މައްސަލަ ފިނޭންސް މިނިސްޓްރީއަށް ހުށަހަޅައިގެން އެ ފައިސާއާ މެދު ވަކި ގޮތެއް ނިންމަން ޖެހޭކަން، މާލިއްޔަތު ގަވާއިދުގައި ބަޔާންކޮށްފައިވާ ކަން ރިޕޯޓްގައިވެ އެވެ.