އަވަށްޓެރި ގަލްފުގެ ގައުމުތަކަށް ހަމަލާނުދޭނެ ކަމަށް އީރާނުން ބުނުމަށް ފަހު، އެ ގައުމުތަކަށް އަމާޒުކޮށް އީރާނުން އަނެއްކާވެސް މިސައިލާއި ޑްރޯން ހަމަލާތަކެއް ދީފިއެވެ. އިއްޔެ އީރާނުން ދިން މި ހަމަލާތައް އަމާޒުކޮށްފައިވަނީ ގަތަރާއި، ސައުދީ އަރަބިއްޔާއާއި، ބަހްރެއިން އަދި އެކުވެރި އަރަބި އިމާރާތް (ޔޫއޭއީ) އަށެވެ. މިއާއެކު މުޅި މެދުއިރުމަތީގެ މަސްރަހު ވަނީ އިތުރަށް ގޯސްވެފައެވެ. މި ހަމަލާތައް ދީފައިމިވަނީ، އެމެރިކާއާއި އިސްރާއީލުން ގުޅިގެން އީރާނަށް ދިން ވަރުގަދަ ހަމަލާތަކެއްގައި އީރާނުގެ އެންމެ އިސް ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން އުފެދިފައިވާ ހަމަނުޖެހުންތަކުގެ ތެރެއިންނެވެ. އީރާނުން ބުނަމުންދަނީ ގަލްފުގެ ގައުމުތަކަށް ދޭ ހަމަލާތަކަކީ އެމެރިކާއާއި އިސްރާއީލުގެ އަމަލުތަކަށް ދޭ ރައްދެއް ކަމަށާއި، އެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަކީ އީރާނުގެ އަމާޒުތަކެއް ކަމަށެވެ. https://www.sun.mv/218822 ގަލްފުގެ ގައުމުތަކަށް އީރާނުން އަލުން ހަމަލާދޭން ފަށާފައިމިވަނީ، މީގެ ކުރިން ދިން ހަމަލާތަކާ ގުޅިގެން އީރާނުގެ ރައީސް މަސްއޫދު ޕެޒެޝްކިއަން އެ ގައުމުތަކުގެ ކިބައިން މައާފަށް އެދިވަޑައިގެންފައި ވަނިކޮށެވެ. ރައީސް ޕެޒެޝްކިއަން ވިދާޅުވެފައިވަނީ، އީރާނަށް ހަމަލާދިނުމަށް އަވަށްޓެރި ގައުމުތަކުގެ ބިން ބޭނުންނުކުރާހާ ހިނދަކު، އެ ގައުމުތަކަށް އީރާނުން ހަމަލާނުދޭނެ ކަމަށެވެ. އަދި އީރާނުގެ ވަގުތީ ލީޑާޝިޕް ކައުންސިލުންވެސް ވަނީ އަވަށްޓެރި ގައުމުތަކަށް ހަމަލާނުދިނުމަށް އެއްބަސްވެފައެވެ. ނަމަވެސް، އޭގެ ފަހުން އެކްސްގައި ކުރެއްވި ޕޯސްޓެއްގައި ރައީސް ޕެޒެޝްކިއަން ވަނީ، އީރާނާ ދެކޮޅަށް ހަމަލާދިނުމަށް ބޭނުންކުރާ ސަރަހައްދީ މަރުކަޒުތަކަކީ އީރާނުގެ ދިފާއީ އޮޕަރޭޝަންތަކުގެ “ޝަރުއީ އަމާޒުތަކެއް” ކަމަށް ވިދާޅުވެފައެވެ. މިއާއެކު، އީރާނުގެ އަސްކަރިއްޔާގެ މައްޗަށް ސިޔާސީ ލީޑަރުންގެ ފުރިހަމަ ބާރު ނުހިނގާ ކަމަށާއި، ހަމަލާތަކުގެ އަމާޒުތައް ކަނޑައަޅަނީ ސީދާ އަސްކަރިއްޔާއިން ކަމަށް ބައިނަލްއަގުވާމީ މަސްރަހު ދިރާސާކުރާ ފަރާތްތަކުން ވަނީ ފާހަގަކޮށްފައެވެ. އީރާނުގެ ޖުޑިޝަރީގެ އިސްވެރިޔާ ޣުލާމްހުސައިން މުހްސިނީ އެޖެއީ ވިދާޅުވީ، އީރާނުގެ ދުޝްމަނުންނަށް އެހީތެރިކަން ފޯރުކޮށްދޭ ސަރަހައްދީ ގައުމުތަކަށް އަމާޒުކޮށް ދޭ ހަމަލާތައް މެދުކެނޑުމެއްނެތި ކުރިއަށްދާނެ ކަމަށެވެ. އަދި ބައެއް ގައުމުތަކުގެ ސަރަހައްދުތައް ފާޅުގައާއި ސިއްރުގައި ދުޝްމަނުން ބޭނުންކުރަމުންދާ ކަމުގެ ހެކި އީރާނުގެ އަސްކަރިއްޔާއަށް ލިބިފައިވާ ކަމަށްވެސް އޭނާ ވިދާޅުވިއެވެ. މީގެ އިތުރުން އީރާނުގެ ގާނޫނުހަދާ މަޖިލީހުގެ ރައީސް މުހައްމަދު ބާގިރު ގާލިބާފް ވިދާޅުވީ، ސަރަހައްދުގައި އެމެރިކާގެ އަސްކަރީ މަރުކަޒުތައް ހުރިހާ ހިނދަކު ސުލްހަ ނުލިބޭނެ ކަމަށެވެ. މި ތުހުމަތުތަކާ ގުޅިގެން ގަލްފުގެ ގައުމުތަކުން ވަނީ އެ ގައުމުތަކުގެ ބިން އީރާނާ ދެކޮޅަށް ބޭނުންކުރުމަށް ފުރުސަތު ނުދޭނެ ކަމަށް ތަކުރާރުކޮށް ބުނެފައެވެ. އީރާނުގެ ހަމަލާތަކުގެ ސަބަބުން ގަތަރުގެ ވެރިރަށް ދޯހާއާއި، ޔޫއޭއީގެ ދުބާއީ ފަދަ ސިޓީތަކުގައި ވަނީ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. ޔޫއޭއީން ވަނީ އީރާނުން ފޮނުވާލި 15 ބެލިސްޓިކް މިސައިލާއި 119 ޑްރޯން ވައްޓާލާފައިވާ ކަމަށް ބުނެފައެވެ. އަދި ސައުދީ އަރަބިއްޔާއިން ވަނީ އެ ގައުމުގެ ތެޔޮ ކާރުޚާނާތަކަށާއި ޕްރިންސް ސުލްތާން އެއާ ބޭސްއަށް އަމާޒުކޮށް ފޮނުވާލި ހަމަލާތަކެއް ދިފާއުކޮށްފައެވެ. ގަތަރުން ބުނެފައިވަނީ އީރާނުން ދިން ހަމަލާތަކުގެ ބަދަލު ހިފާނެ ކަމަށާއި، އެކަމުގެ އަގު އީރާނުން އަދާކުރަންޖެހޭނެ ކަމަށެވެ. މި ހަމަލާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް އިތުރު ހަމަލާތަކެއް ދެއްވާނެ ކަމުގެ އިންޒާރު ދެއްވާފައެވެ. ޓްރަމްޕް ވިދާޅުވީ އީރާނުން އަމާންނުދޭހާ ހިނދަކު، އެ ގައުމަށް އަމާޒުކޮށް ދޭ ހަމަލާތައް ވަރުގަދަވާނެ ކަމަށެވެ. ނަމަވެސް އީރާނުގެ ރައީސް ޕެޒެޝްކިއަން ވަނީ އެމެރިކާއަށް އަމާންދިނުމަކީ ދުވަހަކުވެސް ވާނެ ކަމެއް ނޫން ކަމަށް ވިދާޅުވެ، އެކަމަށް ރައްދުދެއްވާފައެވެ. އީރާނާއި އެމެރިކާ އަދި އިސްރާއީލާ ދެމެދު ހިނގަމުންދާ މި ކުރިމަތިލުންތަކުގެ ސަބަބުން މުޅި މެދުއިރުމަތީގެ ސަލާމަތާއި ރައްކާތެރިކަމާމެދު ވަނީ ބޮޑެތި ސުވާލުތަކެއް އުފެދިފައެވެ. ހަމަލާތަކުގެ ސަބަބުން ދުބާއީ އިންޓަނޭޝަނަލް އެއާޕޯޓުގެ އުދުހުންތަކަށް ބުރޫއަރާފައިވާއިރު، ބަހްރެއިންގައި ވަނީ އާންމުން ރައްކާތެރި ތަންތަނަށް ވަނުމަށް އިންޒާރުދީފައެވެ. މި ހަމަނުޖެހުންތަކުގެ އަސަރު ދުނިޔޭގެ އިގުތިސާދަށާއި ތެލުގެ ބާޒާރަށްވެސް ދަނީ ކުރަމުންނެވެ.