އެމެރިކާއިން ހަނގުރާމަ ކާމިޔާބުކޮށް ނިމުމުން، އެކަމުގެ ތެރެއަށް ވަންނަން އިނގިރޭސިވިލާތުން މަސައްކަތް ކުރާ ކަމަށާއި، މެދުއިރުމަތީގައި އިނގިރޭސި މަނަވަރުތަކުގެ އެހީތެރިކަން މިހާރު އެމެރިކާއަށް ބޭނުންނުވާ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިނގިރޭސިވިލާތަށް ބަހުގެ ހޫނު ހަމަލާތަކެއް ރޭ ދެއްވައިފި އެވެ.
އީރާނަށް އަމާޒުކޮށް އެމެރިކާ އާއި އިޒްރޭލުން ދެމުންދާ ހަމަލާތަކާ ގުޅިގެން ޓްރުތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، މެދުއިރުމަތީގެ ސަރަހައްދަށް އިނގިރޭސިވިލާތުގެ ދެ މަނަވަރެއް ފޮނުވުމާ މެދު އެ ގައުމުން ވިސްނަމުންދާ ކަމަށެވެ. ނަމަވެސް، ވޮޝިންޓަނަށް މިހާރު އެ މަނަވަރުތަކުގެ ބޭނުމެއް ނެތް ކަމަށް އޭނާ ފާހަގަކުރެއްވި އެވެ.
"ބޮޑުވަޒީރު ސްޓާމާ، އެންމެ ރަނގަޅު. އަހަރެމެންނަށް މިހާރު ތިޔަ މަނަވަރުތަކެއް ބޭނުމެއް ނޫން. އެކަމަކު އަހަރެމެން މިކަން ހަނދާން ބަހައްޓާނަން. ހަނގުރާމައެއް ކާމިޔާބުކޮށް ނިމުމުން، އޭގެ ތެރެއަށް ވަންނަން އުޅޭ ބަޔަކު އަހަރެމެންނަކަށް ބޭނުމެއް ނޫން،" ޓްރަމްޕް ވިދާޅުވި އެވެ.
މީގެ އިތުރުން، އެއާފޯސް ވަންގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، މީގެ ދެ ހަފުތާ ކުރިން އެ މަނަވަރުތަކުގެ އެހީ ލިބުނު ނަމަ ވަރަށް ރަނގަޅުވީސް ކަމަށެވެ.
ޓްރަމްޕްގެ މި ފާޑުކިޔުންތައް އަމާޒުވެފައި މިވަނީ، އީރާނަށް ދިން ފުރަތަމަ ހަމަލާތަކުގައި އިނގިރޭސިވިލާތުގައި ހުރި އެމެރިކާގެ އަސްކަރީ މަރުކަޒުތައް ބޭނުންކުރުމުގެ ހުއްދަ ދިނުމަށް އިނގިރޭސިވިލާތުން ކުރިން ދެކޮޅު ހެދުމާ ގުޅިގެންނެވެ. މި ނިންމުމުގެ ސަބަބުން އެމެރިކާގެ މަތިންދާބޯޓުތަކަށް ދިގު ރާސްތާގެ ދަތުރުތަކެއް ކުރަން ޖެހުނު ކަމަށް ރިޕޯޓުތައް ބުނެ އެވެ.
ނަމަވެސް، ފަހުން ބޮޑުވަޒީރު ކެއިރު ސްޓާމާ ވަނީ، އީރާނުގެ މިސައިލް މަރުކަޒުތަކަށް އަމާޒުކޮށްދޭ ދިފާއީ ހަމަލާތަކުގައި އެ މަރުކަޒުތައް ބޭނުންކުރުމުގެ ހުއްދަ ދެއްވާފަ އެވެ.
އިނގިރޭސި ދިފާއީ ވުޒާރާއިން ކަށަވަރުކޮށްދީފައިވާ ގޮތުގައި، އިނގިރޭސިވިލާތުގެ މަނަވަރު އެޗުއެމްއެސް ޕްރިންސް އޮފް ވޭލްސް އޮތީ ތައްޔާރީ ހާލަތަކަށް ގެނެވިފަ އެވެ. އަދި ފަސް ދުވަހުގެ ތެރޭގައި ފުރަން ތައްޔާރުވުމަށް އެ މަނަވަރުގެ ފަޅުވެރިންނަށް ވަނީ އަންގާފަ އެވެ. ނަމަވެސް، އެ މަނަވަރު މެދުއިރުމަތީގެ ސަރަހައްދަށް ފޮނުވާނެ ކަމަށް ބުނެ ދެކެވޭ ވާހަކަތަކަށް ރަސްމީ ފަރާތްތަކުން ވަނީ ބާރު ނުދީފަ އެވެ.
މީގެ އިތުރުން، ސައިޕްރަސްގައި ހުންނަ އިނގިރޭސި ވައިގެ އަސްކަރީ މަރުކަޒަށް އަމާޒުވާ ޑްރޯން ހަމަލާތަކުން ރައްކާތެރިވުމަށްޓަކައި، ވައިގެ ދިފާއީ މަނަވަރު އެޗުއެމްއެސް ޑްރެގަން މެޑިޓެރޭނިއަން ކަނޑަށް ފޮނުވާނެކަން އިނގިރޭސިވިލާތުން ވަނީ ކުރިން އިއުލާނުކޮށްފަ އެވެ.
ދެ ގައުމުގެ މެދުގައި ހިޔާލު ތަފާތުވުންތަކެއް އުފެދިފައިވީ ނަމަވެސް، ބޮޑުވަޒީރު ސްޓާމާ ވިދާޅުވީ ދެ ގައުމުގެ މެދުގައި އޮތް ޒަމާންވީ އަސްކަރީ އަދި ސިޔާސީ ގުޅުން ބަދަހިކަމާ އެކު ދެމިއޮތް ކަމަށެވެ. އަދި ދެ ގައުމުގެ މެދުގައި އަބަދު ވެސް އޮންނަ ހާއްސަ ގުޅުމުގެ ދަށުން، އިންޓެލިޖެންސް މައުލޫމާތު ހިއްސާކުރުމުގެ މަސައްކަތް މެދުނުކެނޑި ކުރިއަށްދާ ކަމަށް ވެސް އޭނާ ވިދާޅުވި އެވެ.