ހުޅުދޫ ސްކޫލް ދަރިވަރުންނަށް ފެންވަރު ރަނގަޅު ތަޢުލީމެއް ފޯރުކޮށްދިނުމުގެ ގޮތުން ބެލެނިވެރިންނާއި މުދައްރިސުންނާއި ލީޑިންގ ޓީޗަރުންނަށް ޢަމާޒުކޮށްގެން "ދަރިވަރުންނަށް ފެންވަރު ރަނގަޅު ތަޢުލީމެއް ފޯރުކޮށްދިނުމަށް އަޅުގަނޑުމެން މިތިބީ ތައްޔާރަށް!" މިނަމުގައި ޕްރޮގްރާމެއް ފަށައިފި އެވެ.
މިޕްރޮގްރާމްގެ ފެށުމުގެ ރަސްމިއްޔާތު ޖެނުއަރީ މަހުގެ 10 ވަނަ ދުވަހު ފެށިއިރު މި ރަސްމިއްޔާތުގައި ވާހަކަ ދައްކަވަމުން ސްކޫލްގެ ޕްރިންސިޕަލް މަޒްކޫރާ މޫސާ މި ޕްރޮގްރާމްގެ މަޤްސަދާއި މި ޕްރޮގްރާމް ހިންގުމަށް ރާވަން ޖެހުނު ސަބަބު ބަޔާން ކުރެއްވި އެވެ. އަދި މި ޕްރޮގްރާމްގައި މުދައްރިސުންނަށް ޢަމާޒު ކުރެވޭ ބާބުތައް ހަފްތާއަކު އެއްފަހަރު ބޭއްވޭނެ ކަމަށާއިބެލެނިވެރިންނަށް ޢަމާޒުކުރެވޭ ބާބުތައް ކޮންމެ ދެހަފްތާއިން އެއް ހަފްތާއަކު ބޭއްވޭނެ ކަމަށް ވިދާޅުވި އެވެ.
ޕްރޮގްރާމް ފެށުމުގެ ރަސްމިއްޔާތު ނިމިގެން ދިޔައީ ޕްރޮގްރާމްގެ ބައިވެރިން ތައްޔާރުކުރި ބެނާގައި އެންމެންގެ އަތުގެ ނިޝާން ޖެހުމުންނެވެ. މިބެނާއަކީ ފްރޭމްކުރުމަސްފަހު ސްކޫލްގައި ބެހެއްޓިގެންދާނެ ބެނާއެކެވެ. ބެނާގައި އަތުގެ ނިޝާންއިން ރަމްޒުކޮށްދެނީ ދަރިވަރުންނަށް ފެންވަރު ރަނގަޅު ތަޢުލީމެއް ފޯރުކޮށްދޭން މަސައްކަތް ކުރާނެކަމަށް ބައިވެރިން އިޤުރާރުވުމެވެ.
މުދައްރިސުންނަށް ޢަމާޒުކުރެވޭ ބާބުތައް ބޭއްވޭއިރު ސްކޫލްގެ ބައެއް ދަރިވަރުންވެސް މި ހަރާކާތުގައި ބައިވެރި ކުރެވޭނެ ކަމުގައި ސްކޫލްގެ މެނޭޖްމަންޓުން މައުލޫމާތުދެ އެވެ.
މުދައްރިސުންނަށް ބޭއްވޭ ބާބުތައް މައިގަނޑު ގޮތެއްގައި ޢަމާޒުކުރެވޭނީ ސްޓޫޑަންޓް ސެންޓާޑް ޓީޗިން އެއިޑްސް ތަކާއި ޙަރަކާތްތައް ރޭވުމުގައެވެ. މުދައްރިސުންނާއި އެކީ ދަރިވަރުން ބައިވެރިކުރެވެނީ އެކުދިންގެ އިޙްސާސްތަކާއި ޚިޔާލު މިދެންނެވިފަދަ ޙަރަކާތްތަކުގައި ބޭނުންކުރުމުގެ މަޤްސަދުގައެވެ. މިޕްރޮގްރާމްގައި ތައްޔާރުކުރެވޭ ޓީޗިން އެއިޑްސް ތައް ސްކޫލްގެ ސްޓާފް ރޫމްގައި ޤާއިމުކުރަން ހަމަޖެހިފައިވާ ޑިޕާޓްމަންޓް ރިސޯސް ކޯނަރގައި ބެހެއްޓޭނެއެވެ.
ބެލެނިވެރިންނަށް ޢަމާޒުކުރެވޭ ބާބުތަކުގައި ފިލާވަޅު ދަސްކުރުމުގައި ދަރިވަރުންނަށް އެހީތެރިވާނެ ގޮތްތައް ކިޔައިދީ ދަރިވަރުންގެ ހެދިބޮޑުވުމުގައި ދިމާވާ ތަފާތު ކަންތައްތަކުގައި ޢަމަލުކުރާނެ ގޮތްތައް ބުނެދެވޭނެއެވެ. މިކަންތައް ކުރެވޭނީ މިފަދަ ކަންތައްތަކުގެ ޙަޤީގަތާއި އެއްގޮތް ތަމްސީލުތަކުގެ އެހީގައެވެ.
ހުޅުދޫ ސްކޫލަކީ އަބަދުވެސް ދަރިވަރުންގެ ތަޢުލީމަށް ގިނަގުނަ މަސައްކަތައްކުރާ ސްކޫލެއްކަން ބެލެނިވެރިން ފާހަނގަ ކުރެއެވެ.