ރަނިންމޭޓަކަށް ޑީއާރުޕީގެ ލީޑަރު އަހުމަދު ތަސްމީނު އަލީ ހުންނަވައިގެން ކުރިއަށް އޮތް ރިޔާސީ އިންތިހާބު ރައީސް ޑރ.މުހައްމަދު ވަހީދު ހަސަން މަނިކަށް ކާމިޔާބު ނުކުރެއްވޭނެ ކަމަށް އުމަރު ނަސީރު ވިދާޅުވެއްޖެއެވެ. ރާއްޖޭން ބޭރުގައި ހުންނަވައިގެން ސީއެންއެމަށް މައުލޫމާތު ދެއްވަމުން އުމަރު ނަސީރު ވިދާޅުވީ ރައީސް ވަހީދުގެ ކޯލިޝަނަށް އޭނާ ތާއިދު ކުރެއްވުމަކީ މިހާރު ދުރު ކަމެއް ކަމަށާއި އޭނާ ދެން ކުރިއަށްދާނެ ގޮތެއް ނިންމާނީ ސަޕޯޓަރުން ކަމަށެވެ.
"އަޅުގަނޑު ކުރިއަށްދާނެ ގޮތެއް ނުނިންމޭނެ އަޅުގަނޑަކަށް. ސަޕޯޓަރުން ނިންމާނީ އަޅުގަނޑު ދާންވީ ވަހީދާ އެކުތޯ، ގާސިމާ އެކުތޯ،" އުމަރު ވިދާޅުވިއެވެ.
އޭނާ ކުރިއަށްދާނީ ގާސިމާއެކުތޯ ނުވަތަ ވަހީދާ އެކުތޯ ނިންމާނީ ސަޕޯޓަރުން ކަމަށް އުމަރު ވިދާޅުވި އިރު، އޭނާގެ އިސް ސަޕޯޓަރުންތަކެއްވަނީ ދާދި ފަހުން ޖުމްހޫރީ ޕާޓީއާއި ގުޅިފައެވެ. ރައީސް ވަހީދުގެ ރަނިން މޭޓަކަށް ތަސްމީނު ހަމަޖައްސަވާފައިވާ އިރު އުމަރު ނަސީރުވަނީ ތަސްމީނަށް މީގެ ކުރިން ވަރަށް ބޮޑަށް ފާޑު ވިދާޅުވެފައެވެ. ތަސްމީނަށް އުމަރުގެ ހަމަލާތައް އެންމެ ބޮޑަށް އަމާޒުވެފައިވަނީ އެމްޑީޕީއާއި އެކު ޑީލް ހަދާ ކަމަށް ބުނެ ޒެޑް ޑިއާރުޕީ އުފެއްދުމާއި ގުޅިގެންނެވެ. ޒެޑް ޑިއާރުޕީ އުފެއްދުމުގައި އުމަރު ނަސީރު އިސް ދައުރެއް އަދާ ކުރެއްވިއެވެ.