މަޖިލިސް މެންބަރު ހާމިދު އަބުދުލް ޣަފޫރު ހަ މަހަށް ޖަލަށްލާން ކްރިމިނަލް ކޯޓުން ކޮށްފައިވާ ހުކުމަށްފަހު މިހާތަނަށް ކަންކަން ހިނގާފައިވާ ގޮތް ބައްލަވާ ރިވިއު ކުރަމުން އަންނަ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު ވިދާޅުވީ ހެންވޭރު ދެކުނު ދާއިރާގެ މެންބަރު، ހާމިދުގެ މައްޗަށް އައި ހުކުމާއި އެ ހުކުމް ތަންފީޒު ކުރުމުގައި މިހާތަނަށް ކަން ހިނގައިދިޔަ ގޮތާއި ހާމިދު މަޖިލީހުގެ އިދާރާގައި ހުންނެވުމަށްފަހު ގެއަށް ވަޑައިގެންނެވުމާ ހަމައަށް ކަންކަން ހިނގާފައިވާ ގޮތް ބަލައި ރިވިއު ކުރަން ފައްޓަވާފައިވާ ކަމަށާއި އެކަމުގައި ރައީސް އޮފީހާއި ޑީޕީއާރްއެސްއާ ވާހަކަ ދައްކަވަމުން އަންނަ ކަމަށެވެ.
"ހާމިދަށް ކޯޓުން ކޮށްފައިވާ ހުކުމާއެކު [މިހާތަނަށް ކަން ހިނގިގޮތް ބަލައި] އެބަ ރިވިއު ކުރަން. އެކަމާ ގުޅިގެން ރައީސް އޮފީހާ ޕެނިޓެންޝަރީއާ މަޝްވަރާ ކުރަމުން މިދަނީ،" އުމަރު ވިދާޅުވި އެވެ.
އުމަރު ވިދާޅުވީ އެމަނިކުފާނު ހޯމް މިނިސްޓަރު ކަމުގެ މަގާމާ ހަވާލުވެވަޑައިގަތުމުގެ ކުރިން ހާމިދުގެ މައްޗަށް އައި ހުކުމެއް ނަމަވެސް މަގާމާ ހަވާލުވެވަޑައިގަތުމާއެކު ހާމިދާމެދު އަމަލުކުރާނީ ކޮންގޮތަކަށްތޯ ގިނަ ފަރާތްތަކަކުން އެމަނިކުފާނާ ސުވާލުކުރަމުން އަންނަ ކަމަށެވެ. އަދި ވިދާޅުވީ ހާމިދާމެދު އަމަލުކުރާނެ ގޮތެއް ވަރަށް އަވަހަށް ހާމަކުރާނެ ކަމަށެވެ.
"ހާމިދަށް ކޯޓުން ހުކުމް ކުރީ އަޅުގަނޑު މަގާމާ ހަވާލުވުމުގެ ކުރިން. އަޅުގަނޑު މަގާމާ ހަވާލުވެ ހުވާކުރުމަށްފަހު ހާމިދާމެދު މިނިސްޓްރީން އަމަލުކުރައްވަނީ ކޮންގޮތަކަށްތޯ ވަރަށްގިނަ ފަރާތްތަކުން އެބަ ސުވާލު ކުރޭ. ކަންދިމާވި ގޮތުން އަޅުގަނޑު މަގާމާ ހަވާލުވި ވަގުތާ ހާމިދު ގެއަށް ވަޑައިގެންނެވި ވަގުތާ އެކުއެކީ ދިމާވީ އެހެންވީމާ ބައެއް މީހުނަށް ހީވީ އެއީ އަޅުގަނޑުގެ ނިންމުމުމެއް ކަމަށް. އެއީ އެހެން އޮތް ކަމެއް ނޫން. އެކަން ހިނގާފައިވާ އޮތީ ހާމިދުގެ މެޑިކަލް ކޮންޑިޝަންތަކެއް ވެސް އޮތުމުން، ސަބަބުތަކެއް އޮވެގެން، އެހެންވީމަ އެކަމުގައި ކަން އޮތް ގޮތް ވަރަށް އަވަހަށް ރައްޔިތުންނަށް އަޅުގަނޑު ސާފުކޮށްދޭނަން،" އުމަރު ވިދާޅުވި އެވެ.
ގާނޫނަކީ އެއްވެސް ރައްޔިތަކަށް އިސްތިސްނާ ވެވޭނެ އެއްޗެއް ނޫންކަން ފާހަގަކުރައްވާ އުމަރު ވިދާޅުވީ ގާނޫނާ ހިލާފަށް އަމަލުކުރާ ކޮންމެ މީހަކަށް ގާނޫނީ އިމުގެ ތެރެއިން އޮންނަ އަދަބެއް ކަނޑައެޅުމުގައި ހޯމް މިނިސްޓަރުގެ ފުރިހަމަ ޒިންމާ އަދާ ކުރައްވާނެ ކަމަށާއި ގާނޫނު އެންމެންގެ މައްޗަށް ވެސް ހަމަހަމަކަމާއެކު ކުރިއަށް ގެންދަން މަސައްކަތްކުރައްވާނެ ކަމަށެވެ. މައިގަނޑު އަމާޒަކީ ރައްޔިތުންނަށް އަނިޔާވެރިވެ އަދަބު ކަނޑައެޅުން ނޫން ކަމަށާއި ހާމިދަށް ކޯޓުން ކޮށްފައިވާ ހުކުމަށް ލުއި އަދަބެއް ދިނުމުގައި ހޯމް މިނިސްޓްރީން މަސައްކަތް ކުރާނެ ކަމަށެވެ.
"ގާނޫނީ އިމުން އެއްވެސް ރައްޔިތަކަށް ބޭރު ނުވެވޭނެ. އަޅުގަނޑު އަދާކުރަންޖެހޭ ވާޖިބު ފުރިހަމައަށް އަދާކުރާނަން ނަމަވެސް މިދަންނަވަނީ ރައްޔިތުންނަށް އަނިޔާތެރިވެ އަދަބު ދޭ ވާހަކައެއް ނޫން. ހާމިދަށް ކޯޓުން ކޮށްފައިވާ ހުކުމަށް ލުއި އަދަބެއް ދިނުމުގައި މަސައްކަތްކޮށްދޭނަން، އެމަނިކުފާނަކީ ނުރައްކާތެރި ކުށްވެރިއެއްނޫން،." އުމަރު ވިދާޅުވި އެވެ.