ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދާއި މާލޭ ސިޓީ ކައުންސިލްގެ އެމްޑީޕީ މެމްބަރު ހަސަން އަފީފު (ޖަންބު އަފީފު) އާއި މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ)ގެ ޗެއާމަން އިބްރާހިމް އުމަރު މަނިކުގެ އިތުރުން ކުޑަކުދިންގެ ހާއްސަ ޑޮކްޓަރު އަބްދުﷲ އަފީފު މިއަދު ޕީޕީއެމަށް ސޮއިކުރައްވައިފި އެވެ. ޕީޕީއެމް އޮފީހުގައި ބޭއްވި ރަސްމިއްޔާތުގައި އެ ހަތަރު ބޭފުޅުންގެ ފޯމާ ހަވާލުވެވަޑައިގަތީ ކުރީގެ ރައީސް އަދި ޕާޓީގެ ވެސް ރައީސް މައުމޫން އަބްދުލް ގައްޔޫމެވެ. އެ ހަތަރު ބޭފުޅުންގެ އިތުރުން ޒުވާނުންތަކެއް ވެސް އެ ރަސްމިއްޔާތުގައި ޕީޕީއެމަށް ސޮއިކުރި އެވެ. މެމްބަރު ނަޝީދުގެ ފޯމާ ހަވާލުވެވަޑައިގަތުމަށް ފަހު މައުމޫން ވަނީ އޭނާ އަށް ވަރަށް ބޮޑަށް ތައުރީފްކުރައްވައި ވާހަކަ ދައްކަވައިފަ އެވެ. އެގޮތުން ނަޝީދަކީ އަދާކުރެއްވި މަގާމްތަކުގައި ވަރަށް ހިކުމަތްތެރިކަމާއި ކެތްތެރިކަމާ އެކު މަސައްކަތް ކުރައްވާ ބޭފުޅެއް ކަމަށް ވިދާޅުވި އެވެ. ނަޝީދު ޕީޕީއެމާ ގުޅިވަޑައިގަތުމަކީ ޕީޕީއެމަށް ލިބޭ ކާމިޔާބީއެއް ކަމަށާއި އެކަމާ އުފާކުރައްވާ ކަމަށް މައުމޫން ވިދާޅުވި އެވެ. "އަޅުގަނޑު އެދެނީ އަލްއުސްތާޒު މުހައްމަދު ނަޝީދަށް އަބަދުވެސް ކާމިޔާބީ، ސިޔާސީ މައިދާނުގަ އާއި އެމަނިކުފާނުގެ އަމިއްލަ ޕްރޮފެޝަންގައި ވެސް. އެމަނިކުފާނަކީ ރައްޔިތުންގެ ތެރެއިން ގާނޫނީ ދާއިރާއިން ވަރަށް ފުންނާބު އުސް ބޭފުޅެއް، މި ރޮނގުން ވެސް މި ސަރުކާރާއި ރައްޔިތުންގެ މަޖިލީހަށް ވެސް ވަރަށް ގިނަ ގުނަ މަސައްކަތްތަކެއް ވަނީ ކޮށްދެއްވާފައި،" މައުމޫން ވިދާޅުވި އެވެ. ނަޝީދުގެ އިތުރުން ވެސް ގިނަ ބަޔަކު ޕީޕީއެމާ ގުޅުމަކީ އެ ޕާޓީ އަށް ލިބޭ ކުރިއެރުމެއް ކަން ފާހަގަކުރައްވައި ހުރިހާ އެންމެން ވެސް ކުރިއަށް އޮތް ދެ އިންތިހާބު ޕީޕީއެމަށް ކާމިޔާބުކޮށްދޭން މަސައްކަތް ކުރުމަށް މައުމޫން އެދިވަޑައިގަތެވެ. އެމްޑީޕީން ވަކިވެވަޑައިގެން ޕީޕީއެމަށް ސޮއިކުރެއްވި މާލޭ ސިޓީ ކައުންސިލްގެ މެމްބަރު ޖަމްބު ހަސަން ވިދާޅުވީ އޭނާ ޕީޕީއެމާ ގުޅިވަޑައިގަތީ ގައުމަށް ހިދުމަތް ކުރެއްވުމަށް ކަމަށެވެ. އެއީ ފައިސާ އަށް ކުރެއްވި ކަމެއް ނޫން ކަމަށާއި އަމިއްލަ އަށް ފެނިވަޑައިގެން ނިންމެވި ނިންމެވުމެއް ކަމަށް ވެސް އޭނާ ވިދާޅުވި އެވެ. އަފީފު ވިދާޅުވި ގޮތުގައި ޕީޕީއެމުގެ ސިޔާސަތުތަކާއި އުސޫލްތަކަށް އޭނާ ފުރިހަމަ އަށް ތާއީދުކުރައްވަ އެވެ. އެހެންކަމުން ކުރިއަށް އޮތް ތަނުގައި ޕީޕީއެމުގައި ހުންނަވައި ރައްޔިތުންނަށް ހިދުމަތް ކުރުމަށް ލިބޭ ފުރުސަތުތަކުގެ ބޭނުން ހިއްޕަވާނެ ކަމަށް ވެސް އޭނާ ވިދާޅުވި އެވެ.ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދާއި މާލޭ ސިޓީ ކައުންސިލްގެ އެމްޑީޕީގެ މެމްބަރު ޖަމްބު ހަސަން އަފީފް ޕީޕީއެމަށް ދެންމެ ސޮއިކުރައްވައިފި އެވެ.