އަތޮޅު ތެރޭގެ ރަށްތަކަށް ދިމާވެފައިވާ ކަރަންޓުގެ މައްސަލަ ހައްލުކުރަން ސަރުކާރާއި ފެނަކަ ކޯޕަރޭޝަން ގުޅިގެން ކުރިއަށް ގެންދާ މަަސައްކަތްތަކުގެ ދަށުން ރާއްޖެ ގެނައި 15 މިލިއަން ރުފިޔާގެ ކޭބަލްތައް ރަށްތަކަށް ފޮނުވަން ފަށައިފި އެވެ.
އަތޮޅު ތަކަށް މިއަދު ފޮނުވަން ފެށި ކޭބަލްތައް ގެނައުމަށް ބިޑް ހުޅުވާލުމުން ބިޑް ކާމިޔާބުކޮށްފައިވަނީ ސްރީލަންކާގެ ކެލާނީ ކޭބަލް ކުންފުނިންނެވެ.
ސްރީލަންކާ އިން ގެނައި ކޭބަލްތައް އަތޮޅު ތަކަށް ފޮނުވަން ފެށުމުގެ ކުރިން މިއަދު ނޫސްވެރިންނާ ބައްދަލުކުރައްވާ ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލު ވިދާޅުވީ ލަންކާ އިން ކޭބަލްތައް ގެނެވި އަތޮޅު ތަކަށް ފޮނުވަން ފެށުމާއި ގުޅިގެން ޑިސްޓްރިބިއުޝަން ނެޓްވޯކްތައް ރަގަޅުކުރުމަށް ކުރާ މަސައްކަތް ވަރަށް އަވަހަށް ހައްލުކުރެވޭނެ ކަމަށެވެ.
ކޭބަލްތަކާއި އެކު ޑިސްޓްރިބިއުޝަން ފޮށިތައް ވެސް މިހާރު މާލެ ގެނެވިފައިވާތީ އެ ފޮށިތައް ވެސް އަތޮޅު ތަކަށް ފޮނުވުމަށް ތައްޔާރުވަމުންދާ ކަަމަށް ނިމާލް ވިދާޅުވި އެވެ. އަދި ކޭބަލްތައް މިއަދު ފޮނުވަން ފެށީ ހދ. ކުޅުދުއްފުއްޓާއި ގދ. ތިނަދޫ އަށް ކަމަށާއި އެ ދެ ރަށުން އެހެން ރަށްރަށަށް ވެސް ކޭބަލް ގެންދާނެ ކަަމަށް ނިމާލް ވިދާޅުވި އެވެ.
އަތޮޅު ތެރެއަށް ބޭނުންވާ ޖަނަރޭޓަރު ގަތުމަށް ޗައިނާއަށް ދިޔަ ފެނަކަ ކޯޕަރޭޝަންގެ ޓެކްނިކަލް ޓީމުގެ މަސައްކަތްތަކާއި ގުޅޭގޮތުން ވެސް ނިމާލް ވަނީ މައުލުމާތު ދެއްވާފަ އެވެ. އެގޮތުން ވިދާޅުވީ ޗައިނާ އިން ގަނެގެން ރާއްޖެއަށް ގެންނަންޖެހޭ ޖަނަރޭޓަރުތައް ރާއްޖެ ގެނައުމަށް ބޯޓަށް އެރުވުމުގެ މަސައްކަތް މިހާރު ހިނގަމުންދާ ކަމަށެވެ. އަދި މި ޖަރަނޭޓަރުތައް ރާއްޖެއަށް ލިބުމަށް ދެން ހޭދަވާނެ ވަގުތަކީ އެ ތަކެތި ޗައިނާއިން ރާއްޖެއަށް ގެނައުމަށް ހޭދަވާނެ ވަގުތު ކަމަށް ވެސް ނިމާލް ވިދާޅުވި އެވެ.
އަތޮޅު ތެރޭގެ ކަރަންޓުގެ ހިދުމަތް ރަގަޅުކުރުމަށް ކުރަމުންދާ މަސައްކަތްތަކުގެ ދަށުން ރަށްތަކަށް ފޮނުވުމަށް ޗައިނާއިން ގެންނަނީ 76 ޖަނަރޭޓެވެ.