އުމަރު ޒާހިރަކީ ގައުމީ ހަޒާނާއެއް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
އުމަރު ޒާހިރު އަވަހާރަވުމާ ގުޅިގެން “މިހާރު” ނޫހާ ވާހަކަ ދައްކަވަމުން ރައީސް މައުމޫން ވިދާޅުވީ، އުމަރު ޒާހިރަކީ މުޅި ގައުމަށްވެސް ވަފާތެރި، އިހުލާސްތެރި ހިދުމަތްތެރިއެއް ކަމަށެވެ. އަދި ހުންނެވި ކޮންމެ މަގާމެއްގައިވެސް އިހުލާސްތެރިކަމާއެކު ގިނަ ދުވަހު މަސައްކަތް ކުރެއްވިކަން ފާހާގަ ކުރެއްވިއެވެ.
މައުމޫން ވިދާޅުވީ އުމަރު ޒާހިރަކީ ގައުމީ ހަޒާނާއެއް ކަމަށާއި، އެއީ ލެޖެންޑެއް ކަމަށެވެ. އަދި އެފަދަ ދެވަނައެއް ނެތް ހިދުމަތްތެރިއެއް ކަމަށާއި، އުމަރު ޒާހިރު އަވަހާރަވުމަކީ ގައުމަށް ލިބުނު ފުން ހިތާމައެއް ކަމަށް ވިދާޅުވިއެވެ.
އޭގެ އިތުރުން އުމަރު ޒާހިރުގެ ހާލުކޮޅު ބައްލަވަން ކޮންމެ ދުވަހަކު ކަހަލަ ގޮތަކަށް ގުޅުއްވި ކަމަށް މައުމޫން ވިދާޅުވިއެވެ. އެހެން ނަމަވެސް ކޮވިޑަށް ޕޮޒިޓިވްވެ، ހޮސްޕިޓަލިގައި އެޑްމިޓް ކުރި ފަހުން ފޯނަށް ނުގުޅޭ ކަމަށް އެމަނިކުފާނު ވިދާޅުވިއެވެ.
އުމަރު ޒާހިރު އަވަހާރަވީ ކޮވިޑް ބަލީގައި ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ދަނިކޮށް މިއަދު މެންދުރުފަހު 2:02ގަ އެވެ. އަވަހާރަވި އިރު، އުމުރުފުޅަކީ 85 އަހަރެވެ.
އުމަރު ޒާހިރަކީ 1953 ވަނަ އަހަރުން ފެށިގެން 50 އަހަރަށްވުރެ ގިނަ ދުވަހު ދިވެހި ގައުމަށް އިހުލާސްތެރި އަގުހުރި ގިނަ ހިދުމަތްތަކެއް ކުރައްވާފައިވާ ބޭފުޅެކެވެ.