ރައްޔިތުންގެ ޚާއްސަ މަޖިލީހުގެ ރައީސް ކަމުގެ ހުވާ އެ މަޖިލީހުގެ އދ. އަތޮޅުގެ މެންބަރު ގާސިމް އިބްރާހީމް، ރައީސުލްޖުމްހޫރިއްޔާ އަލްއުސްތާޒު މައުމޫން އަބްދުލްގައްޔޫމުގެ ކުރިފުޅުމަތީގައި މިއަދު ކުރައްވައިފި އެވެ.
މިއަދު މެންދުރުފަހު ރައީސް އޮފީހުގައި ބޭއްވެވި މި ރަސްމިއްޔާތުގައި ގާސިމު އިބްރާހީމަށް ހުވާލައިދެއްވީ އިސްލާމީ ކަންތައްތަކާ ބެހޭ އެންމެ މަތީ މަޖިލީހުގެ ރައީސް ޝައިޚު މުހަންމަދު ރަޝީދު އިބްރާހީމެވެ.
ރައްޔިތުންގެ ޚާއްސަ މަޖިލީހުގެ ރައީސް ކަމަށް ގާސިމު އިބްރާހީމް ހޮވިވަޑައިގަތީ އިއްޔެ ބޭއްވެވި އެ މަޖިލީހުގެ ޖަލްސާއަށް ހާޒިރުވެވަޑައިގެން ތިއްބެވި 80 މެންބަރުންގެ ތެރެއިން 72 ވޯޓުގެ އަގުލަބިއްޔަތުންނެވެ.
ގާސިމް ހުވާކުރެއްވުމުގެ ރަސްމިއްޔާތުގައި މިނިސްޓަ އޮފް ޕްރެޒިޑެންޝަލް އެފެއާޒް މުހަންމަދު ހުސައިނާއި ރައްޔިތުންގެ ޚާއްސަ މަޖިލީހުގެ ނާއިބު ރައީސް އަލްއުސްތާޒު ޝާހީން ހަމީދާއި ރައްޔިތުންގެ މަޖިލީހުގެ އަމީން އާންމު އަހުމަދު މުހަންމަދު ބައިވެރިވެވަޑައިގެންނެވި އެވެ.