މެންޗެސްޓާ ޔުނައިޓެޑުގެ ސަޕޯޓަރުންނަށް އިއްޔެއަކީ ޖަޒުބާތުން ފުރިގެންވީ ދުވަހެކެވެ. ޒުވާން ވިންގަރު އެންޓޮނީ، މި ސީޒަން ނިމެންދެން ލޯނެއްގެ ދަށުން ރެއާލް ބެޓިސްއަށް ދިޔައީ އެވެ.
އެކަމަކު ސަޕޯޓަރުން އިއްޔެ ބޭލުވި ކަރުނައިގެ ފަހަތުގައި ވަނީ ކޮން ޖަޒުބާތެއް ހެއްޔެވެ؟ އެއީ ކުލަބުގެ ތާރީހުގައި ވެސް ދެ ވަނައަށް އެންމެ އަގުބޮޑުކޮށް ގަތް ކުޅުންތެރިޔާ ދިއުމުން އޭގެ ހިތާމައިގައި ކަމަށް ވެދާނެ އެވެ. ނުވަތަ އޭނާގެ 95 މިލިއަން ޔޫރޯގެ ބޮޑު އަގާ ގާތް ކުރާވަރުގެ ކުޅުމެއް ނުދެއްކޭތީ 'ބޮލުން ކަޓުވާލެވުމުން' އެކަމުގެ އުފަލުގަ އެވެ.
އަޔަކްސްއަށް ކުޅުމަށް ފަހު ފަސް އަހަރުގެ އެއްބަސްވުމެއްގެ ދަށުން އެންޓޮނީ ޔުނައިޓެޑާ ގުޅުނީ 2022ގަ އެވެ. އޭގެ ފަހުން އޭނާ ޔުނައިޓެޑުގެ ޖޯޒީ ލައިގެން ދަނޑަށް އެރި 96 ފަހަރު ޖެހުނީ އެންމެ 12 ގޯލެވެ. އޭޕްރީލް 2023ގެ ފަހުން ޕްރިމިއާ ލީގު މެޗެއްގައި އަދި އޭނާއަކަށް ގޯލެއް ނުޖެހެ އެވެ.
މި ސީޒަނަށް އެކަނި ބެލިޔަސް، އޭނާ ކުޅެފައިވަނީ ޖުމްލަ 14 މެޗުގަ އެވެ. ލީގުގެ އެންމެ މެޗަކަށް ވެސް ފުރަތަމަ 11ގައި ހިމަނާފައެއް ނުވެ އެވެ.
ޔުނައިޓެޑުގައި އެންޓޮނީގެ ފެށުން ފެނުނީ ވަރަށް އުންމީދީކޮށެވެ. ލީގުގައި ކުޅުނު ފުރަތަމަ ތިން މެޗުގައި ވެސް ގޯލު ޖެހި އެވެ. އެއީ އާސެނަލް އަތުން މޮޅުވި މެޗާއި ސިޓީ އަތުން ބަލިވި މެޗާއި އެވަޓަންގެ މައްޗަށް ކުރި ހޯދި މެޗުގަ އެވެ. މިއީ ވެސް އެ ކުލަބުގެ ތާރީހުގައި އެންޓޮނީއަށް ވުރެ ކުރިން އެއްވެސް ކުޅުންތެރިއަކަށް ކުރެވުނު ކަމެއް ނޫނެވެ.
މޮޅު ކުޅުމަށް ވުރެ ޔުނައިޓެޑުގައި އެންޓޮނީ މަޝްހޫރުވެފައިވަނީ ދަނޑުމަތީގައި ޗަރުކޭސް ދައްކާ، ވަގުތު ބޭކާރުކުރާ ކުޅުންތެރިއެއް ގޮތުގަ އެވެ. މިސާލަކަށް ހުރި ތަނުގައި ހުރެގެން އޭނާގެ ވަށައި ބޯޅަ އަނބުރާލާ އެނބުރުމެވެ. ބޯޅައާ އެއްކޮށް އެންޓޮނީ ވެސް ބުމަރެއް ހެން އެނބުރޭ މި ހުނަރަށް ކިޔަނީ 'އެންޓޮނީ ސްޕިން' އެވެ.
އިދިކޮޅު ކުޅުންތެރިއެއްގެ ގާތުން ނައްޓާފައި ނުދެވޭ ތަނުގައި މިއީ ވަގުތު ބޭކާރުކުރުން ފިޔަވައި މާ ބޮޑު ބޭނުމެއް ހިފޭ ހުނަރެއް ނޫނެވެ. ހަމަ ހުސް އާޓެވެ. އަދި ބެޓިސްއަށް ދިޔަ ފުރަތަމަ ދުވަހު އެ ކުލަބުން އޭނާ އިއުލާންކުރި ވީޑިއޯގައި ވެސް އޭނާ ދައްކާލީ އެ ސްޕިން އެވެ.
މިކަހަލަ ބޭކާރު ކަންތަކާ ހުރެ ތައުރީފަށް ވުރެ ބޮޑަށް އޭނާއަށް އެންމެންގެ ފަރާތުން އަމާޒުވީ ފާޑުކިޔުމެވެ. މަޖާޒީ ގޮތަކަށް އޭނާއަކީ 'ގްރޭޓަސްޓް އޮފް އޯލް ޓައިމް' ނުވަތަ 'ގޯޓް'އޭ ވެސް ކިޔަ އެވެ. މެސީ އާއި ރޮނާލްޑޯ ފަދަ ކުޅުންތެރިންނަށް ވުރެ ވެސް އެންޓޮނީ އުޅެނީ މާ އުހުގަ އެވެ. އިއްޔެ ރެއާލް ބެޓިސްއަށް އޭނާ ބަދަލުވިކަން އިއުލާންކުރި ޕޯސްޓުތަކުގައި ވެސް އޮތީ ހުސް މިފަދަ ކޮމެންޓުތަކެވެ.
ޔުނައިޓެޑުން އެންޓޮނީއަށް އަލްވަދާއު ކިޔައި ހިއްސާކުރި ޕޯސްޓަށް ބައެއް މީހުން ކުރި ކޮމެންޓުތައް:
"ކްރިސްޓިއާނޯއަށް ފަހު ޔުނައިޓެޑަށް ކުޅުނު އެންމެ މޮޅު ކުޅުންތެރިޔާ."
"އަހަރެމެންނަށް މި ގެއްލުނީ ލެޖެންޑެއް."
"ރެއާލް ބެޓިސް މިފަހަރު ސްޕެނިޝް ލީގު ކާމިޔާބުކުރާނެ."
"އުންމީދަކީ އެންޓޮނީ މޮޅަށް ކުޅެ، އުމުރު ދުވަހު ރެއާލް ބެޓިސްގައި ހުރުން."
"ސްޕެއިން އޮތީ މި ހަބަރަށް ތައްޔާރުވެގެނެއް ނޫން."
"ލަ ލީގާގެ ހުރިހާ ޑިފެންޑަރުން ތިބީ ބިރުން."
"ލަ ލީގާއަށް ހެޔޮ އެދެން. އެ ދަނީ ތޫފާނެއް."
"ވިނީޝިއަސް އާއި ރަފީނިއާގެ ދުވަސް މި ދިޔައީ. މިއައީ ގޯޓު."
"އެމްބާޕޭ އާއި ޔަމާލް ވެސް ރޮއްވާލާނެ."
"ހެޔޮނުވާނެ މޮޅަށް ކުޅޭތި. ހޫނު މޫސުމުގައި ވިއްކާލެވޭނީ އޭރުން."
އަނެއްކޮޅުން އެންޓޮނީ ދިޔަ ގޮތާ މެދު ހިތްހަމަނުޖެހޭ މީހުން ވެސް ތިއްބެވެ. ބައެއް މީހުންނަށް މައްސަލައަކަށް ވީ ލޯނެއްގައި އޭނާ ދޫކޮށްލުމުންނެވެ. މި ސީޒަން ނިމޭއިރަށް އެނބުރި ޔުނައިޓެޑަށް އަންނާނެތީ އެވެ. ރެއާލް ބެޓިސްގެ ބައެއް ސަޕޯޓަރުން ތިބީ އެންޓޮނީ ގޮސް އެ ކުލަބު ރެލިގޭޓުކޮށްލަފާނެތީ ބިރުންނެވެ. މިހާރު ރެއާލް ބެޓިސް އޮތީ ސްޕެނިޝް ލަ ލީގާގެ ތާވަލުގެ 13 ވަނައިގަ އެވެ.
ބެޓިސްއިން އެންޓޮނީ ގެންދިޔައީ އޭނާއަށް ހަފްތާއަކު ލިބޭ 200،000 ޕައުންޑުގެ ބޮޑު މުސާރައިގެ %84 ދައްކަން އެއްބަސްވެގެންނެވެ.
އެންޓޮނީ ދިއުމުން ހިތާމަކުރާ ޔުނައިޓެޑު ސަޕޯޓަރުންނަށް އަދި މުޅިން މާޔޫސްވާނެ ކަމެއް ނެތެވެ. މި ސީޒަން ނިމުމުން އޭނާ ހަމަ އެނބުރި އަތުވެދާނެ އެވެ.