ރާއްޖޭގައި ރޫހާނީ ފަރުވާގެ ހިދުމަތްތަކެއްދޭ ކަމަށް ބުނެ މީސް މީޑިއާ ގައި އިސްތިހާރު ކުރަމުންދާ ހިންދޫ ފާދީރީއެއްގެ މައްސަލަ ބަލަން ފަށައިފިއެވެ.
މިކަމާ ގުޅިގެން ފުލުހުން މީޑިޔާތަކަށް މައުލޫމާތު ދެމުން ބުނީ "މާސްޓަރ ދުރްގާ ރާއޯ ގުރުޖީ" ނަމަކަށް ކިޔާ މީހަކު ދިވެހިރާއްޖޭގައި ރޫހާނީ ފަރުވާގެ ހިދުމަތްތަކެއް ދޭކަމަށް ބުނެ ސޯޝަލް މީޑިއާގެ މަންސަތަކުގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށާއި މި މައްސަލަ އާއި ގުޅިގެން ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތް ކަމާބެހޭ އިދާރާތަކާ ގުޅިގެން ކުރަމުން އަންނަ ކަމަށެވެ.
ދިވެހިންގެ ސަގާފަތާއި ދީނާ ޚިލާފު މިފަދަ ކަންކަމުގެ މަޢުލޫމާތު އެކަކު އަނެއްކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމުގައި ދެކޭ ކަމަށާއި ވުމާއެކު އެފަދަ އިޝްތިހާރެއް ފެނިވަޑައިގަންނަވައިފިނަމަ ލަސްނުކުރައްވައި ފުލުހުންނަށް އެންގުމަށް ވެސް އެދިފައިވެއެވެ.
ރޫހާނީ ފަރުވާދޭ ކަމަށް ބުނެ އެމީހާ ހިންގާ ޕޭޖުގައި އަތާއި މޫނު ބަލައިގެން އަދި ހޮރޮސްކޯޕް މެދުވެރިކޮށް ދިމާވެފައިވާ ހުރިހާ މައްސަލައަކަށް ހައްލު ހޯދައިދޭނެ ކަމަށާއި ގުޅޭނެ ނަންބަރެއްވެސް ޕޯސްޓުކޮށްފައި އޮތެވެ.
މި މައްސަލަ ފުލުހުން ބަލަން ފަށާފައިވާއިރު 2023 އޮގަސްޓު މަހުގެ ތެރޭގައި ވެސް ފާދިރީއަކު އައިސް، ރޫހާނީ ފަރުވާގެ ކްލާސްތައް ނަގައިދޭ ކަމަށް ބުނެ ކެމްޕޭނެއް ހިންގިއެވެ. ފުލުހުން އޭނާ ހައްޔަރުކޮށް ވަނީ ޑީޕޯޓު ކޮށްލާފައެވެ.