އަނިޔާވެރިކަމަކީ ހަމައެކަނި ޖިސްމާނީ އަނިޔާކުރުމެއް ނޫނެވެ. ހިތްދަތިކުރުވުމަކީ އެންމެ ބޮޑު އަނިޔާއެވެ. އަނެކާއަށް ނުބައި ބަސްތައް ބުނުމަކީ ވެސް ހަމަ އަނިޔާއެވެ. މީސްތަކުންނަކީ އަނިޔާވެރިކަމުން ސަލާމަތްވެގެން ތިބެން ޖެހޭނެ ބައެއް ނަމަވެސް ޖުމުލަ ގޮތެއްގައި ބަލައިފިނަމަ ކޮންމެވެސް ސިފައެއްގައި އަނިޔާ ލިބެމުންދާ މީހަކު މަދުކަމަށް ބުނަންޖެހޭ ޙާލަތަށް އަނިޔާވެރިކަން މިވަނީ ޢާންމުވެފައެވެ.
ވީމާ އަނިޔާއިން ސަލާމަތްވެހުރުމަށް މިފދަ ޛިކުރުތައް ކުރަމުން ގެންދާށެވެ!
لا حَوْلَ وَلا قُوَّةَ إِلا بِالله
އެކުލެވިގެންވާ މާނައަކީ އެންމެހައި ބާރުތަކެއް ލިބިވޮޑިގެންވަނީ ﷲ ތަޢާލާއަށެވެ. އެހެން ފަރާތަކަށް އެއްވެސް ބާރެއް ލިބިގެނެއް ނުވެއެވެ.
މިއީ ސުވަރުގޭގެ ޚަޒާނާއިން އިންސާނުންނަށް ލިބިފައިވާ ޖަވާހިރެކެވެ. ސުވަރުގެ ވަނުމަށް އޮތް ތަޅުދަނޑިއެކެވެ. އެންމެހައި ބާރުތަކެއް ލިބިވޮޑިގެންވަނީ ﷲ ތަޢާލާއަށްކަން ޤަބޫލުކުރުމާއި އެކަލާނގެ ފިޔަވައި އެހެން އެއްވެސް ފަރާތަކަށް އެއްވެސް ބާރެއް ލިބިގެން ނުވާކަމަށް ޤަބޫލުކުރުން މިއީ އިސްލާމް ދީނުގެ އެންމެ މުހިންމު އަސާސެވެ.
މިކަލިމަ ކިޔުން ގިނަކޮށް އަދި ބުނެވޭ ބަހަށް ޢަމަލުކުރާ މީހާއަށް އަނިޔާއެއް ގެއްލުމެއް ހަމަ އެކަކަށްވެސް ނުދެވޭނެއެވެ. އެމީހަކަށް ބޭނުންވާ ހިމާޔަތާއި ރައްކައުތެރިކަން ﷲ ތަޢާލާ ދެއްވަވާނެތެވެ. އިން ޝާ ﷲ. އަހުރެން މިހެން މިބުނާ ސަބަބަކީ އެއިރުން އެމީހަކު ހުންނާނީ ﷲ ތަޢާލާގެ މަތިން ހަނދުމަކުރުންމަތީގައެވެ. ﷲ ތައާލާ މަތިވެރިކުރުންމަތީގައެވެ. ﷲ ތަޢާލާގެ މަތިންހަނދުމަކޮށް އެކަލާނގެމަތިވެރިކުރުންމަތީގައި ހުންނަ މީހެއްގެ މީހެއްގެ މަތިން ހަނދުމަކުރެއްވެވުމުގައި ﷲ ތަޢާލާ ދެމިވޮިގެންވާނެތެވެ. އެފަދަ މީހަކަށް ވެވިއްޖެނަމަ އެމީހަކަށް ގެއްލުމެއް ނުވަތަ އަނިޔާ އެއް ދެވޭނީ ކާކަށް ހެއްޔެވެ؟
ގެއިން ނުކުންނަމުން މިޛިކުރު ކިޔުމުން އެމީހަކަށް ބޭނުންވާނެ ރައްކައުތެރިކަން ﷲ ތަޢާލާ ދެއްވަވަތެވެ.
އެއްވެސް މީހަކަށް އަނިޔާވެރި ނުވުމަކީ ﷲ ތަޢާލާ އެންމެ ގަދައަށް ކުރައްވަވާފައިވާ އެއް އަމުރުފުޅެވެ. އަނިޔާވެރިންނަށް ﷲ ތަޢާލާ ވަނީ ލަޢްނަތް ލައްވަވައިފައެވެ. އަދި މީސްތަކުންނަށް އެހީތެރިވާ މީހުންނަށް އެހީތެރިވެވޮޑިގަތުމުގައި ދެމިހުންނަވާނެކަމަށް ވަނީ ވަޙީކުރައްވަވައިފައެވެ.
ނަމަވެސް އެކަކު އަނެކަކަށް އަނިޔާވެރިވުން ޢާންމުވަމުން އައިސް ގޭބިސީތަކުގައިވެސް އެކަން މިވަނީ ޢާންމުވެފައެވެ. މައިންބަފައިންނަށް އަނިޔާވެރިވަނީއެވެ. ދެމަފިރިން އެކަކު އަނިޔާވެރިވަނީއެވެ. ދަރިން މައިންބަފައިންނަށް އަދި މައިންބަފައިން ދަރިންނަށްވެސް އަނިޔާވެރިވަނީއެވެ. ވަޒީފާގެ ބިރުދައްކައި މުވައްޒިފުންނަށްވެސް އަނިޔާވެރިވަނީއެވެ.
--އިސްލާމީ ތިލަފަތުގެ ދަރުސަކުން