ބޭންކް އޮފް މޯލްޑިވްސް (ބީއެމްއެލް)އަށް މިދިޔަ އަހަރު ލިބުނު ފައިދާ، އޭގެ ކުރީ އަހަރާ އަޅާބަލާއިރު %10 އިތުރުވެ، ރެކޯޑް މިންވަރެއް ކަމަށްވާ 3.2 ބިލިއަން ރުފިޔާއަށް އަރައިފި އެވެ.
ވީ ކިހިނެއް؟ - ބީއެމްއެލް އިން މިއަދު ވަނީ މިދިޔަ އަހަރުގެ ފަހު ކުއާޓަރުގެ ހިސާބުތައް އާންމުކޮށްފަ އެވެ.
ތަފްސީލް - އެ ހިސާބުތަކުން ދައްކާ ގޮތުން، އޮކްޓޯބަރުން ޑިސެމްބަރު މަހުގެ ނިޔަލަށް ހޭދަވި މިދިޔަ އަހަރުގެ ހަތަރު ވަނަ ކުއާޓަރުގައި:
828.7 މިލިއަން ރުފިޔާގެ ހިންގުމުގެ ފައިދާއެއް ލިބުނު؛ މިއީ ރެކޯޑެއެް 
ސާފު ފައިދާގެ ގޮތުގައި 837.5 މިލިއަން ރުފިޔާ ލިބުނު؛ މިއީ ތިންވަނަ ކުއާޓަރާ އަޅާބަލާއިރު %76.2 ކުރިއެރުމެއް
މިދިޔަ އަހަރުގެ ޖުމްލަ ހިސާބުތަކަށް ބަލާއިރު:
ޖުމްލަ އާމްދަނީ ވަނީ 5.5 ބިލިއަން ރުފިޔާއަށް ވުރެ މަތިވެފައި؛ މިއީ 2024އާ އަޅާބަލާއިރު %16.1ގެ ކުރިއެރުމެއް
ޓެކްސްއަށް ކެނޑުމުގެ ކުރިން ލިބުނު ފައިދާ ވަނީ 2024އާ އަޅާބަލާއިރު %10 އިތުރުވެ، ރެކޯޑް އަދަދެއް ކަމަށްވާ 3.2 ބިލިއަން ރުފިޔާއަށް އަރާފައި
ޖުމްލަ އެސެޓް 55.7 ބިލިއަން ރުފިޔާއަށް ވުރެ މަތިވެފައިވޭ؛ މިއީ 2024އާ އަޅާބަލާއިރު %15 ކުރިއެރުމެއް
ބީއެމްއެލް އިން ބުނި ގޮތުގައި، އެ ބޭންކުގެ ކެޕިޓަލް އަދި ލިކުއިޑިޓީ ރޭޝިއޯ ގާނޫނު ލާޒިމުކުރާ މިންގަނޑަށް ވުރެ މަތީގައި ދެމެހެއްޓިފައިވެ އެވެ.
މިދިޔަ އަހަރުގެ ތެރޭގައި ބީއެމްއެލް އިން ވިޔަފާރިތަކާއި އާންމު ފަރުދުންނަށް 10 ބިލިއަން ރުފިޔާގެ އާ ލޯނު ދޫކޮށްފައިވެ އެވެ.
ބީއެމްއެލް އިން މިދިޔަ އަހަރު ތައާރަފްކުރި އާ ފައިނޭންސިންގެ ތެރޭގައި ހިމެނެނީ:
'ގްރީން ރިސޯޓް ފައިނޭންސިން' ތައާރަފުކުރި 
ހައުސިން މިނިސްޓްރީއާ ގުޅިގެން %5ގެ ކުޑަ ރޭޓެއްގައި 'ހިޔާވެހި ފައިނޭންސިން' ދޫކުރަން ފެށި 
ގެދޮރު ގަތުމަށް ދޫކުރާ ލޯނުތަކުގެ އިކުއިޓީ %5އަށް ދަށްކުރި 
ބީއެމްއެލް އެފޯޑަބަލް ހޯމް ލީސިން ޕްރައިވެޓް ލިމިޓެޑް އުފައްދައި އަގުހެޔޮ ފްލެޓުތައް އެޅުމުގެ މަޝްރޫއުތައް އިފްތިތާހުކުރި
ބީއެމްއެލްގެ ހިދުމަތްތައް ފުޅާކުރުމަށް މިދިޔަ އަހަރު ކުރި މަސައްކަތްތަކުގެ ތެރޭގައި:
ރ. ދުވާފަރުގައި ބޭންކުގެ 40 ވަނަ ބްރާންޗު ހުޅުވައި 'މުޅި ރާއްޖެއަށް ބީއެމްއެލް އޭޓީއެމް' މަޝްރޫއު ނިންމައި މީހުން ދިރިއުޅޭ ހުރިހާ ރަށެއްގައި އެ ބޭންކުގެ ހިދުމަތް ގާއިމުކުރި
ޑިޖިޓަލް އަދި ޕޭމަންޓް ހިދުމަތްތަކަށް އައި ކުރިއެރުންތަކުގެ ތެރޭގައި، ހުރިހާ ހިދުމަތަކަށް އޮންލައިންކޮށް އެދެވޭނެ އިންތިޒާމު ހަމަޖެއްސި 
'ސްވައިޕް' ޑިޖިޓަލް ވޮލެޓް ދައްކާލި 
ވިސާ ޕްލެޓިނަމް ޑެބިޓް ކާޑާއި ވިސާ އިންފިނިޓް ކްރެޑިޓް ކާޑުގެ އިތުރުން އިންޑިއަން ރޫޕީ އަދި ޗައިނީޒް ޔުއާން އެކައުންޓްތައް ތައާރަފުކުރި 
ވިސާ، އެމެކްސް، އަލީޕޭ+، ވީޝިން ޕޭ، ޔޫނިއަންޕޭ އަދި މާސްޓަކާޑާ އެކު ވީ ސްޓްރެޓިޖިކް ޕާޓްނަޝިޕްތަކުގެ ސަބަބުން ރާއްޖޭގެ ޑިޖިޓަލް ޕޭމަންޓް ނިޒާމު އިތުރަށް ވަރުގަދަވެގެންދިޔަ 
ބީއެމްއެލް ސްޓޫޑަންޓް ކާޑާއި މަސްވެރިންނަށް ފައިނޭންސް ކުރުމަށް 'މަސްވެރިޔާ ޕޯޓަލް' އާއި ތިމާވެށި ހިމާޔަތްކުރުމަށް 'އީއެންވީ ޕީއޯއެސް' ޕްރޮޖެކްޓާ އެކު އެމެކްސްއާ ގުޅިގެން 'އެކްސްޕީރިއަންސް މޯލްޑިވްސް' ކެމްޕޭން ފެށި 
ކުދި އަދި މެދު ފަންތީގެ ވިޔަފާރިތަކަށް ދޭ ހިދުމަތްތައް ފުޅާކުރުމަށް އެސްޑީއެފްސީ (މިހާރު އެސްއެމްއީ ޑިޖިޓަލް)، ބީއެމްއެލްގެ ދަށަށް ގެންދިޔަ
ވިޔަފާރިތަކަށް އެހީތެރިވުމުގެ ގޮތުން މާޗަންޓް ފީ %1އަށް ކުޑަކުރި 
ބުނީ ކީކޭ؟ - "2025 ވަނަ އަހަރު ކާމިޔާބުކަމާ އެކު ނިންމާލެވުނުކަމީ އަޅުގަނޑަށް ލިބޭ ވަރަށް ބޮޑު އުފަލެއް. މި ކުއާޓަރުގެ ނަތީޖާއިން ދައްކުވައިދެނީ އަޅުގަނޑުމެންގެ އިސްތިރާޖީ އަމާޒަށް ވާސިލްވެފައިވާކަން އަދި އަޅުގަނޑުމެން މުވައްޒަފުންނަށް ދޭ އަހުމިއްޔަތުކަން،" ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވި އެވެ.
"ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކޮށް ވަރުގަދަ ބެލެންސް ޝީޓެއް ދެމެހެއްޓިފައިވޭ. ވަކިވަކި ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމުގައި އަޅުގަނޑުމެން ދެމިތިބޭނަން."
20 އަތޮޅުގައި 42 ބްރާންޗު 
267 އޭޓީއެމް 
މީހުން ދިރިއުޅޭ ހުރިހާ ރަށެއްގައި ގާއިމުކޮށްފައިވާ ސެލްފް ސާވިސް ބޭންކިން ސެންޓަރުތައް 
އެންމެ ޒަމާނީ އޮންލައިން ބޭންކިންގެ ހިދުމަތް