ބޭންކް އޮފް މޯލްޑިވްސް (ބީއެމްއެލް)އަށް މިދިޔަ އަހަރު ލިބުނު ޖުމްލަ އާމްދަނީ 5.5 ބިލިއަން ރުފިޔާއަށް އަރައި، ރެކޯޑް އަދަދެއްގެ ފައިދާއެއް ލިބިފައިވާ ކަމަށް އެ ބެންކުން މިއަދު ބުނެފިއެވެ. އެ ބެންކުން ބުނި ގޮތުގައި، މިދިޔަ އަހަރުގެ ހަތަރު ވަނަ ކުއާޓަރުގައި، ބީއެމްއެލްއަށް 837.5 މިލިއަން ރުފިޔާ ސާފު ފައިދާއަށް ލިބުނެވެ. އެއީ، މިދިޔަ އަހަރުގެ ތިން ވަނަ ކުއާޓަރާ އަޅާ ބަލާއިރު، 76.2 އިންސައްތައިގެ ކުރިއެރުމެކެވެ. މިދިޔަ އަހަރުގެ މާލީ ނަތީޖާތަކާ ހަވާލާދީ، ބީއެމްއެލްއިން ބުނީ، މިދިޔަ އަހަރު ލިބުނު ޖުމްލަ އާމްދަނީ 5.5 ބިލިއަން ރުފިޔާއަށް ވުރެ މަތި ކަމަށެވެ. އެއީ، 2024 ވަނަ އަހަރާ އަޅާ ބަލާއިރު، 16.1 އިންސައްތައިގެ ކުރިއެރުމެކެވެ. އޭގެއިތުރަށް، ޓެކްސްއަށް ކެނޑުމުގެ ކުރިން، ބީއެމްއެލްއަށް ލިބުނު ފައިދާ މިދިޔަ އަހަރު 3.2 ބިލިއަން ރުފިޔާއަށް އަރާފައިވެއެވެ. އެއީ، ރެކޯޑު އަދަދެއް ކަމަށް އެ ބެންކުން ފާހަގަކުރިއެވެ. ބީއެމްއެލްގެ މިދިޔަ އަހަރުގެ އަހަރީ އާންމު ޖަލްސާ: ބީއެމްއެލްއަށް ލިބުނު ފައިދާ މިދިޔަ އަހަރު 3.2 ބިލިއަން ރުފިޔާއަށް އަރާފައިވޭ -- ފޮޓޯ: ބީއެމްއެލް ބޭންކުގެ ޖުމްލަ އެސެޓް 55.7 ބިލިއަން ރުފިޔާއަށްވުރެ މަތިވެފައިވާ ކަމަށް ބީއެމްއެލުން ވަނީ ބުނެފައެވެ. އެކަމުން ހާމަކޮށްދެނީ، ބޭންކުގެ ބެލެންސް ޝީޓްގެ ހަރުދަނާކަން ދަމަހައްޓާ މިންވަރު ކަމަށް ބީއެމްއެލުން ވަނީ ބުނެފައެވެ. އެއާއެކު، ވޭތުވެދިޔަ އަހަރުގެ ތެރޭގައި ބީއެމްއެލްއިން ވަނީ، ވިޔަފާރިތަކާއި އާންމު ފަރުދުންނަށް 10 ބިލިއަން ރުފިޔާގެ އާ ލޯނު ދޫކޮށްފައެވެ. އަދި، ބޭންކުގެ ކެޕިޓަލް ލިކުއިޑިޓީ ރޭޝިއޯ ގާނޫނު ލާޒިމުކުރާ މިންގަނޑަށްވުރެ މަތީގައި ދެމެހެއްޓިފައިވާކަމަށް އެ ބެންކުން ވަނީ ބުނެފައެވެ. އެ ނަތީޖާތަކާ ގުޅުވައި ބޭންކުގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް ވިދާޅުވީ، މިދިޔަ އަހަރު ކާމިޔާބު ކަމާ އެކީ ނިންމާލެވުމަކީ ލިބޭ ވަަރަށް ބޮޑު އުފަލެއް ކަމަށެވެ. މިގޮތުން، ނިމުނު ހަތަރު ވަނަ ކުއާޓަރުގެ ނަތީޖާއިން އިސްތިރާޖީ އަމާޒަށް ވާސިލްވެފައިވާ ކަމާއި މުވައްޒަފުންނަށް ދޭ އަހުމިއްޔަތުކަން ހާމަވާ ކަމަށް ޝަރީފް ވަނީ ވިދާޅުވެފައެވެ. ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކުރެވިފައިވާކަން އޭނާ ފާހަގަކުރެއްވިއެވެ. އަދި، ވަކިވަކި ފަރުދުންނާއި ވިޔަފާރިތައް ހިމެނޭހެން ރާއްޖޭގެ އެކި ކަންކޮޅުތަކަށް ޚިދުމަތް ފޯރުކޮށްދިނުމުގައި ބީއެމްއެލްއިން ދެމިތިބޭނެ ކަމަށް ޝަރީފް ވަނީ ވިދާޅުވެފައެވެ.