ރައީސް ޑރ. މުހައްމަދު މުއިއްޒު ވެސް މިދިޔަ އެމްޑީޕީ ސަރުކާރެކޭ އެއްގޮތަށް އިންޑިއާއިން ބުނި ހުރިހާ ކަމަކަށް އެއްބަސްވެފައިވާ ކަމަށާއި މިއީ ވެސް އިންޑިއާގެ ގޮނޑިކޮއްކޮ ސަރުކާރެއް ކަމަށް ކުރީގެ ހޯމް މިނިސްޓަރު އުމަރު ނަސީރު މިއަދު ތުހުމަތުކުރައްވައިފިއެވެ.ރައީސް މުއިއްޒުއާއި ބޮޑުވަޒީރު މޯދީ ސަލާމް ކުރައްވާ މަންޒަރު ފެންނަ ފޮޓޯއަކާ އެކު އުމަރު ކުރެއްވި ޕޯސްޓެއްގައި ވިދާޅުވީ އެމްޑީޕީގެ ވެރިކަމާއި ޕީއެންސީގެ ވެރިކަމުގައި އެއްވެސް ތަފާތެއް ނެތް ކަމަށެވެ. އިންޑިއާގެ ގޮނޑި ކޮއްކޮ ސަރުކާރަކަށް މި ސަރުކާރު ވެސް ބަދަލުވެ ބުނި ހުރިހާ ކަމަކަށް އެއްބަސްވެފައިވާ ކަމަށް ވެސް ވިދާޅުވި އެވެ."މިއީ ފަހުގެ ތާރީހެއްގައި ރާއްޖޭގެ ވެރިއަކު ކެމްޕެއިން ވައުދަކާ މިހާ ފާޅުގައި ހިލާފުވި ފުރަތަމަ ފަހަރު،" އުމަރު ވިދާޅުވި އެވެ.އަދި ވިދާޅުވީ މި ސަރުކާރަށް ރާއްޖޭގައި ތިބި އިންޑިއާ އަސްކަރިއްޔާގެ މީހުން ފޮނުވާނުލެވުނުތާ ކުރީ ސަރުކާރުތަކުން އެއްބަސް ވެފައި ނެތް ކަންކަމަށް އެއްބަސްވެ އަމާން ވެސް ދީފައިވާ ކަމަށެވެ. ރައީސް މުއިއްޒު އިންޑިއާ އަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ އެގައުމުގެ ބޮޑުވަޒީރު ނަރެންދްރަ މޯދީއާއެކު މަޝްވަރާ ބައްދަލުވުމެއް ބާއްވައި އެގައުމާއެކު ތަފާތު އެކި ދާއިރާތަކުން މުހިއްމު ގިނަ އެއްބަސްވުންތަކެއް ސޮއިކޮށްފަ އެވެ.މޯދީއާއެކު ބޭއްވި ބައްދަލުކުރެއްވުމުގައި ވަނީ އިންޑިއާގެ ކޮންސިއުލޭޓެއް އައްޑޫ ސިޓީގައި އަދި ބެންގަލޫރުގައި ރާއްޖޭގެ ކޮންސިއުލޭޓެއް ގާއިމުކުރުމާ ގުޅޭގޮތުން ވެސް މަޝްވަރާކުރައްވާފަ އެވެ.މި ސަރުކާރު އައި ފަހުން ރާއްޖެ އާއި އިންޑިއާގެ ގުޅުން ކޮންމެވެސް ވަރަކަށް ވަނީ ހީނަރުވި އެވެ. އެއީ އިންޑިއާ އާއި މޯދީ އަށް ނިސްބަތްވާ ގޮތަށް މި ސަރުކާރުގެ ތިން ޑެޕިއުޓީ މިނިސްޓަރަކު ބަދު ބަސް ވިދާޅުވެ، ފުރައްސާރަ ކުރެއްވި މައްސަލައިގަ އެވެ. އެއާ އެކީގައި ދިވެހި ސަރުކާރުން ވެސް އަވަސް ފިޔަވަޅުތަކެއް އަޅައި ތިން ޑެޕިއުޓީ މިނިސްޓަރުން ސަސްޕެންޑް ކުރި އެވެ.ނަމަވެސް ފަހަކަށް އައިސް ރާއްޖެ އާއި އިންޑިއާގެ ގުޅުން ވަނީ ވަރަށް ބޮޑަށް ރަނގަޅުވާން ފަށައިފަ އެވެ. އެގޮތުން ކުރީ ސަރުކާރުން އިންޑިއާ މެދުވެރިކޮށް ނެގި 200 މިލިއަން ޑޮލަރުގެ ލޯނެއްގެ ތެރެއިން 100 މިލިއަން ދެއްކުން އެއް އަހަރަށް ދާދިފަހުން އިންޑިއާ އިން ވަނީ ފަސްކޮށްދީފަ އެވެ.