އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މަސައްކަތް އަވަސްކުރަން މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ (241 ކޮމިޓީ) އިން ނިންމައިފިއެވެ.
އެގޮތަށް ނިންމާފައި ވަނީ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން މިއަދު ބޭއްވި ބައްދަލުވުމުގައެވެ.
މީގެ ކުރިން ކޮމެޓީން ނިންމާފައި ވަނީ އަންނަ ފެބްރުއަރީ މަހުގެ ނިޔަލަށް އެ ބިލުގެ މަސައްކަތް ނިންމުމަށެވެ. އެގޮތުން، އަންނަ ޑިސެމްބަރުގެ ނިޔަލަށް ކަމާ ބެހޭ އިދާރާތަކަށް މި ބިލާ ގުޅޭ ގޮތުން ސިޓީ ފޮނުވުމަށް ފަހު، އެ ތަންތަނުން ލިބޭ ޖަވާބަށް ބަލައި އެ ފަރާތްތައް ކޮމިޓީއަށް ހާޒިރުކުރުމަށް އޭރު ކޮމިޓީން ވަނީ ނިންމާފައެވެ.
Advertisement
އެހެންނަމަވެސް މިއަދު އެކޮމެޓީގެ ބައްދަލުވުމެއް ބާއްވައި، މުގައްރިރު، އޭދަފުށި ދާއިރާގެ މެންބަރު އަހުމަދު ސަލީމް ވިދާޅުވީ އެ ބިލުގެ މަސައްކަތް އަވަސް ކުރަން ބޭނުންވާ ކަމަށެވެ.
އެގޮތުން، ހޯމަ ދުވަހުން ފެށިގެން ކަމާބެހޭ ފަރާތްތައް ކޮމިޓީ އަށް ހާޒިރުކޮށް ސުވާލުކުރުމަށް ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ ހުށަހަޅުއްވާފައެވެ. އަދި އެގޮތަށް ވަނީ ކޮމިޓީން ފާސްކޮށްފައެވެ.
މި ބިލު މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމެވެ. މި ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ އަށް ފޮނުވީ ޖޫން 10 ގައެވެ.