މަޖީދިއްޔާ ސްކޫލު ކުރިމަތީ އޮންނަ ހުސްބިމުގައި ޕާކިން އޭރިއާއެއް ހެދުމުގެ މަސައްކަތް ކުރަމުން އަންނަކަމަށް މާލޭ ސިޓީ ކައުންސިލުން ހާމަކޮށްފިއެވެ.
ޕީއެސްއެމްއާ ވާހަކަ ދައްކަވަމުން މާލޭ ސިޓީ ކައުންސިލުގެ މެމްބަރު އަހުމަދު ޒަމީރު ވިދާޅުވީ، މާޖީދިއްޔާ ކުރިމަތީގައި އޮންނަ ހުސްބުމުގެ ބޮޑު ބައެއް ޕާކިންނަށް ހާއްސަ ކުރި ނަމަވެސް އެތަނުގެ ބައެއް އިށީން ދެލައިގެން ތިބެވޭނެ ގޮތަށް ހަދަން ވެސް ނިންމަވާފައިވާ ކަމަށެވެ.
މުޅި އެސަރަހައްދު ސާފުކުރުމުގެ މަސައްކަތް މިހާރު އެއްކޮށް ނިމިފައިވާކަން ފާހަގަކުރައްވާ ޒަމީރު ވިދާޅުވީ، މިހާރު ކުރަމުން އަންނަނީ ބިންގަނޑު އެއްވަރުކޮށް ގާއެތުރުމުގެ މަސައްކަތް ކަމަށެވެ. އެގޮތުން ގާއަތުރާ ނިމުނުހާ އަވަހަކަށް އެސަރަހައްދު ޕާކިންނަށް ހުޅުވާލާނެ ކަމަށް ވެސް ޒަމީރު ވިދާޅުވިއެވެ.
އެ ޕާކިން އޭރިއާ ބޭނުން ކުރަން ހަމަޖެހިފައި ވަނީ ސައިކަލު ޕާކު ކުރުމަށެވެ.
މަޖީދިއްޔާ ކުރިމަތީގައި އޮތް ބިމަކީ، ކުރީގެ، ދިވެހި ބަހާއި ތާރީހަށް ހިދުމަތް ކުރާ ގައުމީ މަރުކަޒު ހުރި ބިމެވެ. އެ މަރުކަޒު އުވާލުމާއެކު އެތަން އެއްކޮށް ހުހަށް އެތައް ދުވަހަކު ބޭއްވުމަށް ފަހު އެ ސަރަހައްދުގައި ހައުސިން ޔުނިޓު އަޅަން ވެސް ސަރުކާރުން ނިންމިއެވެ. އެކަމަކު، މިހާރު މިވަނީ މާލެއަށް ކުރިމަތިވެފައިވާ ޕާކިންގެ މައްސަލަ ހައްލު ކުރުމަށް ޕާކިން އޭރިއާއަކަށް ބަދަލުކުރަން ނިންމާފައެވެ.
މާލޭގައި ހުރި ހުސްބިންތަކުގައި ބޮޑެތި އިމާރާތްތައް އެޅުން ހުއްޓާލާއި އެތަންތަނުގައި ވެހިކަލް ޕާކުކުރެވޭނެ އިންތިޒާމުތަކާއި ހިތްފަސޭހަ މައިޒާންތައް ހެދުމަކީ މި ސަރުކާރުގެ ވިސްނުމެކެވެ.