ރޭ ދަންވަރު، "ހަވީރު"ގެ މައި އިދާރާގައި ހުޅުޖެހި މައްސަލާގައި އަދި މިހާތަނަށް އެއްވެސް ފަރާތެއް ހައްޔަރުކުރެވިފައި ނުވާކަމަށް ފުލުހުން ބުނެފިއެވެ.
ހަވީރު އިދާރާގެ ރިސެޕްޝަން ހުންނަ ހިސާބުގައި، ރޭ 2:30 އެހާކަންހާއިރު ރޯކޮށްލި ނަމަވެސް، އަލިފާންގަނޑު ނުފެތުރެނީސް ނިއްވާލެވިފައި ވެއެވެ. އެހެންނަމަވެސް، ރިސެޕްޝަން ހުންނަ ހިސާބު އެއްކޮށް އަނދައި، އެ ތަނަށް ގެއްލުން ލިބިފައިވެއެވެ.
އަލިފާނުގެ ހާދިސާ ހިނގަނިކޮށް އެ ހިސާބަށް ދިޔަ މީހުންނަށް ވަނީ، މީހަކު ފިލަންވެގެން ދުވެފައި ދާތީ ފެނިފައެވެ. އަދި، އެ މީހާ ގެންގުޅުނު ކަމަށް ބެލެވޭ ދަބަހަކާއި ތޮތްޕެއް ވަނީ އެ ސަރަހައްދުން ދިފާއީ ބާރުތަކުގެ ބެލުމުގެދަށަށް ގެނެސްފައެވެ.
ފުލުހުންގެ އޮފިޝަލް ވިދާޅުވީ، އެ މައްސަލައިގައި އަދި މީހަކު ހައްޔަރުކުރެވިފައި ނުވި ނަމަވެސް، އެ މައްސަލަ ތަހުގީގުކުރަމުން ދާކަމަށެވެ.
ރޭ ހިނގައިދިޔަ ހާދިސާއާއި ގުޅިގެން ހަވީރުގެ ތިން ހިއްސާދާރުން މިއަދު ނެރުއްވި ބަޔާނެއްގައި ވާގޮތުގައި ރޭ "ހަވީރު" އިދާރާގެ ރިސެޕްޝަންގައި ރޯކޮށްލައި ނައްތާލާފައި ވަނީ އޮޑިޓް ކުރިޔަށްގެންދިއުމަށްޓަކައި ބޭނުންވާ ލިޔެކިއުންތައް ކަމަށާއި، މިއީ އެކަމަށް ހުރަސްއެޅުމުގެ ގޮތުން ހިންގާފައިވާ ކަމެއް ކަމަށެވެ.