އިތުރުވަމުންދާ ބުރައެއްގެ ސަބަބުން ކޮންމެ ނިޒާމެއް ވެސް ހަލާކުވެދާ ފަދައިން، ފުރަމެއަށް ދެވޭ ގެއްލުންތަކުގެ ސަބަބުން އެއީ އަލުން އިއާދަނުކުރެވޭ ފަދަ ހާލަތަކަށް ގޮސްދާނެ ގުނަވަނެކެވެ. ފުރަމެއަކީ އާންމުކޮށް އަޅާނުލެވި އޮންނަ ގުނަވަނަކަށް ވީނަމަވެސް، އެއީ ހިމޭންކަމާ އެކު ދުވާލަކު 500 އަށްވުރެ ގިނަ އުނދަގޫ މަސައްކަތްތައް ފުރިހަމަކުރާ ގުނަވަނެއް ކަމަށް އިންޑިއާގެ 'ލިވަ ޓްރާންސްޕްލާންޓް ސާޖަން' ޑރ. އަންކުރް ގަރްގް ވިދާޅުވެފައިވެއެވެ. މީގެ އިތުރުން، ކުރީގެ ހާލަތަށް އަމިއްލައަށް އިއާދަވުމުގެ ގާބިލުކަން ވެސް ފުރަމެއަށް ލިބިގެންވެއެވެ. ނަމަވެސް، މި ގާބިލުކަމަކީ ވަކި މިންވަރެއް އޮންނަ ކަމެކެވެ. މާ ބޮޑަށް ބުރަވުމުގެ ސަބަބުން ފުރަމޭގެ މަސައްކަތް ހުއްޓި، އަލުން ރަނގަޅު ނުކުރެވޭ ހާލަތަކަށް ދިއުމަކީ އެކަށީގެންވާ ކަމެއް ކަމަށް 25 އަހަރަށްވުރެ ދިގު މުއްދަތެއްވަންދެން ފުރަމޭ ބަދަލުކުރުމުގެ މަސައްކަތުގައި ހޭދަކުރައްވާފައިވާ ޑރ. އަންކުރް ވިދާޅުވެފައިވެއެވެ. ފުރަމޭ ރައްކާތެރި ކުރުމަކީ މަދު ކަންތައްތަކަކަށް ސަމާލުކަންދީގެން ކުރެވިދާނެ ކަމެއް ކަމަށް 'ލިވަ ޓްރާންސްޕްލާންޓް ސާޖަން' ޑރ. އަންކުރް ގަރްގް ވިދާޅުވޭ--ފޮޓޯ/އިންޑިއަންއެކްސްޕްރެސް އުފާވެރި ޚަބަރަކީ ފުރަމޭ ރައްކާތެރިކުރުމަކީ މައިގަނޑު މަދު ކަންތައްތަކަކަށް ސަމާލުކަން ދީގެން ކުރެވިދާނެ ކަމެއް ކަމެވެ. އޭގެ ތެރޭގައި، ރަލާއި މަސްތުވާތަކެތިން ދުރުހެލިވެ ތިބުމާއި، ހަކުރާއި ސަރުބީ އެކުލެވޭ ކެއުންތަކުން ދުރުހެލިވުމުގެ އިތުރުން އެކި ކަހަލަ ނުރައްކާތެރި އަދި އާދައިގެ ވައިރަސްގެ ސަބަބުން ޖެހޭ ބަލިތަކުން ރައްކާތެރިކަން ހޯދުން ހިމެނެއެވެ. މިއިން އެއްވެސް ކަމަކަށް މާ ބޮޑު ހޭދައެއް ކުރަން ނުޖެހޭއިރު މި ކަންކަމަށް ބޭނުން ވަނީ ބުއްދިވެރިކަމާ އެކު ކަންކަން ނިންމުމުމުގެ ހިތްވަރު އަމިއްލަ ނަފުސަށް ހޯދައިދިނުން ކަމަށް ޑރ. އަންކުރް ވިދާޅުވެފައިވެއެވެ. ފުރަމެއަކީ އޭގެ "ވިހަ" މާއްދާތައް މަދުކޮށްދިނުމުން ވަރަށް އަވަހަށް ރަނގަޅުވާ ގުނަވަނެއް ކަމަށް ސަޖިކަލް ގޭސްޓްރޮއެންޓެރޮލޮޖިސްޓެއްގެ ގޮތުގައި ވެސް މަސައްކަތް ކުރައްވަމުން އަންނަ ޑރ. އަންކުރް ހާމަކުރައްވާފައިވެއެވެ. ފުރަމޭއަށް ކުރިމަތިވާ އެންމެ ބޮޑު އެއް ނުރައްކަލަކީ ކާބޯތަކެތީގައި އިތުރުކޮށްފައި ހުންނަ ހަކުރެވެ. ޚާއްސަކޮށް ފޮނި ބުއިންތަކާއި ޕެކެޓްކޮށްފައި ހުންނަ ކާނާގައި ހިމެނޭ 'ފްރަކްޓޯޒް' ފިލްޓަރުކުރަނީ ހަމައެކަނި ފުރަމޭއިން ކަމަށްވެފައި، އެ މާއްދާ އިތުރުވުމުން އެއީ ސަރުބީގެ ގޮތުގައި ފުރަމޭގައި ރައްކާކުރެވޭ ބާވަތަކަށްވެއެވެ. އެހެންކަމުން، ފޮނި ބުއިންތަކާއި ޕްރޮސެސްކޮށްފައިވާ ކާނާ މަދުކުރުމަކީ ފުރަމޭގެ ބުރަ ލުއިކޮށްދޭނެ އެންމެ ފަސޭހަ މަގެވެ. ކާބޯތަކެތީގެ އިތުރުން ފުރަމޭއިން ކޮންމެ ދުވަހަކު ގިނަ އަދަދެއްގެ ބޭސްތައް ވެސް ފިލްޓާކުރާއިރު ބޭސް ކެއުމުގައި ޑޮކްޓަރުންގެ އިރުޝާދުތަކާ އެއްގޮތަށް ބޭސް ބޭނުންކުރުމަކީ މުހިއްމުކަމެއް--ފޮޓޯ/އެންޑީޓީވީ ފުރަމޭގެ ދުޅަހެޔޮކަމަށްޓަކައި ރަލާއި މަސްތުގެ ބާވަތްތައް ބޭނުންކުރުމާ ދުރުހެލިވުމަކީ ކޮންމެހެން މުހިންމު ކަމެކެވެ. އިސްލާމީ މުޖުތަމައެއްގައި މި ކަމަކީ ދީނީ ގޮތުން ނަހީ ކުރައްވާފައިވާ ކަމަކަށްވާއިރު ސިއްހީ ގޮތުން ވެސް ނުރައްކާތެރި ކަމެއްގެ ގޮތުގައި ބެލެވޭ ކަމެކެވެ. ރަލާއި މަސްތުގެ ބާވަތްތައް ބޭނުންކުރުމަކީ ފުރަމެއަށް އިތުރު ބުރައެއް ޖައްސައި، އޭގެ ސަބަބުން އުފެދޭ ވިހަ މާއްދާތައް ނައްތާލުމަށް ފުރަމޭ މާ ބޮޑަށް މަސައްކަތް ކުރަންޖެހޭ ކަމެކެވެ. އެހެންކަމުން މިފަދަ ނުބައި އާދަތަކުން ދުރުހެލިވުމަކީ ފުރަމެއަށް ދެވޭނެ އެންމެ ބޮޑު ހަދިޔާއެވެ. ކާބޯތަކެތީގެ އިތުރުން ފުރަމެއިން ކޮންމެ ދުވަހަކު ގިނަ އަދަދެއްގެ ބޭސްތައް ވެސް ފިލްޓާކުރެއެވެ. އާންމުކޮށް ބޭނުންކުރާ ޕެނަޑޯލް (ޕެރަސެޓަމޯލް) ފަދަ ބޭސްތަކަކީ ވެސް ކަނޑައެޅިފައިވާ މިންވަރަށް ވުރެ ގިނައިން ބޭނުންކޮށްފިނަމަ ފުރަމޭއަށް ބޮޑެތި ގެއްލުންތައް ދީ، ފުރަމޭ ފެއިލްވުމަށް މެދުވެރިވާ ކަމެކެވެ. އެހެންކަމުން، ބޭސް ބޭނުންކުރުމުގައި ސިއްހީ އިދާރާތަކުން ދެވޭ އިރުޝާދުތަކަށް ބަލައި، ހަމަޖެހިފައިވާ މިންވަރަށް ވުރެ އިތުރު ނުކުރުމަށް ސަމާލުކަން ދިނުމަކީ މުހިއްމުކަމެކެވެ. ކާބޯތަކެތީގެ އިތުރުން ހަށިގަނޑުގެ ހަރަކާތްތެރިކަމަކީ ވެސް ފުރަމޭގެ ދުޅަހެޔޮކަމާ ގުޅިފައިވާ ކަމެކެވެ. ގަވާއިދުން ކަސްރަތު ކުރުމަކީ ބަރުދަން ކޮންޓްރޯލް ކުރުމަށާއި، ލޭގައި ހަކުރު ހުންނަ މިންވަރު ހަމަހަމަ ކުރުމަށާއި، ފުރަމޭގައި ސަރުބީ ޖެހުން ހުއްޓުވުމަށް އެހީތެރިވެދޭ ކަމެކެވެ. ވައިރަސްގެ ސަބަބުން ޖެހޭ ހެޕަޓައިޓިސްއަކީ ފުރަމޭއަށް ކުރިމަތިވާ ބޮޑު ނުރައްކަލެއްގެ ގޮތުގައި ޑރ. އަންކުރް ފާހަގަކުރައްވާފައިވެއެވެ. މީގެ ތެރެއިން ހެޕަޓައިޓިސް އޭ އަދި ބީއަށް ރައްކާތެރި ވެކްސިން މިހާރު ލިބެން ހުރެއެވެ. ހެޕަޓައިޓިސް ބީން ރައްކާތެރިކަން ހޯދުމުން ހެޕަޓައިޓިސް ޑީން ވެސް ހަށިގަނޑު ރައްކާތެރިކޮށްދިނުމަށް އެހީތެރިވެދޭނެތީ މި ކަމަށް ޚާއްސަ ވެކްސިން ޖެހުމަކީ ފުރަމޭގެ ދުޅަހެޔޮކަމަށްޓަކައި ކުރެވިދާނެ ބުއްދިވެރި އިންވެސްޓްމެންޓެއް ކަމަށް ޑރ. އަންކުރް އިރުޝާދުދެއްވައެވެ. ފުރަމޭގެ ދުޅަހެޔޮކޮށް ބެހެއްޓުމަށް އަގު ބޮޑު ސަޕްލިމެންޓްތަކެއް ނުވަތަ "ޑިޓޮކްސް" ސައިތަކެއް ބޭނުންކުރުމުގެ ބަދަލުގައި، ހަށިގަނޑަށް ބޭނުންވާ މިންހެޔޮ ކާނާ ބޭނުންކޮށް ހަރަކާތްތެރި ދިރިއުޅުމަކަށް ދިރިއުޅުމުގެ ވައްޓަފާޅި ބަދަލުކޮށް، އަދި ބޭސްތަކާއި ވިހަ މާއްދާތަކުން ހަށިގަނޑު ރައްކާތެރިކުރަން މަސައްކަތް ކުރެވިދާނެއެވެ. މިފަދަ ގޮތަކަށް ފުރަމޭއަށް އިހުތިރާމުކޮށް، އެ ގުނަވަނުގެ ރައްކާތެރިކަމަށް މަސައްކަތްކޮށްފި ނަމަ، އެތައް އަހަރަކަށް ފުރަމޭގެ މަސައްކަތް ފުރިހަމައަށް ކުރިއަށްދާނެ ކަމަށް ޑރ. އަންކުރް ގަރްގް ވިދާޅުވެފައިވެއެވެ.