އިމިގްރޭޝަންގެ ޓާސްކުފޯހުން މިދިޔަ އަހަރު ބަލައި ފާސްކުރި ތަންތަނުގައި މިހާރު ބިދޭސީން އުޅެނީ ސައްހަ ވިސާއަކާ އެކު، ގަވާއިދާ އެއްގޮތަށްތޯ ބެލުމަށް ޚާއްސަ އޮޕަރޭޝަނެއް ފަށައިފިއެވެ. ރާއްޖޭގައި ދިމާވެފައިވާ ބިދޭސީންގެ މައްސަލަ ހައްލުކުރަން މި ސަރުކާރުން ވަނީ ޚާއްސަ އިސްކަމެއް ދީގެން މަސައްކަތްތަކެއް ފަށައިފައެވެ. އެ މަސައްކަތުގެ ތެރެއިން އިމިގްރޭޝަނުން އަންނަނީ ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީން ހޯދައި އެ މީހުންނާމެދު ފިޔަވަޅު އަޅަމުންނެވެ. އިމިގްރޭޝަނުން އެކްސްގައި މިއަދު ކުރި ޕޯސްޓެއްގައި ބުނީ، މިދިއަ އަހަރު ބަލައި ފާސްކުރި ތަންތަނުގައި މިހާރު ބިދޭސީން އުޅެނީ ގަވައިދަށްތޯ ބެލުމަށް ޚާއްސަ އޮޕަރޭޝަނެއް ފަށާފައިވާ ކަމަށެވެ. އެގޮތުން، އިއްޔެ ބަލައި ފާސްކުރި ދެ ތަނުގައި ވެސް މިހާރު ގަވާއިދާ ޚިލާފަށް އުޅެމުންދާ ބިދޭސީއެއް ނެތްކަން ފާހަގަކުރެވިފައިވާ ކަމަށް އިމިގްރޭޝަނުން ބުންޏެވެ. https://x.com/ImmigrationMV/status/1882477594635055312 ގަވައިދާ ޚިލާފަށް ރާއްޖޭގައި އުޅޭ އަދި ވިޔަފާރިކުރާ ބިދޭސީންގެ މައްސަލަ ހައްލުކުރަން އިމިގްރޭޝަނުން ވަރަށް ގިނަ މަސައްކަތްތަކެއް ފާއިތުވި އަހަރު ވެސް ކޮށްފައިވެއެވެ. އެގޮތުން، ހުޅުމާލެއާއި މާލޭގައި މާސް އިންސްޕެކްޝަންތަކާއި، ރެއިޑް އޮޕަރޭޝަންތައް ހިންގާފައިވެއެވެ. އިމިގްރޭޝަންގެ ކޮންޓްރޯލާ ޖެނެރަލް ޝައްމާން ވަހީދު މީގެ ކުރިން ވިދާޅުވި ގޮތުގައި ބިދޭސީންގެ މައްސަލަތައް ހައްލުކުރުމަށް ކުރިއަށް އޮތްތަނުގައި އަތޮޅުތެރެއަށް އޮޕަރޭޝަންތައް ފުޅާކުރާނެއެވެ. މިހާރު އެ މަސައްކަތްތައް ފަށާފައިވާކަން ވެސް ފާހަގަކުރެވެއެވެ. ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެއް ކަމަށާއި އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތް ވެސް ކުރަމުންދާކަމަށް އިމިގްރޭޝަނުން ވަނީ ބުނެފައެވެ.