ނ. ހޮޅުދޫގައި ބޮޑެތި ޒަޚަމްތަކާ އެއްކޮށް، މަރުވެފައި އޮއްވާ ފެނުނު 50 އަހަރުގެ ޒަކިއްޔާ މޫސާގެ މަރުގެ މައްސާލާގައި ފުލުހުން ހަނު ތިބެނީ ކަމަށް ބުނެ، ހޮޅުދޫގައި މިއަދު އިހުތިޖާޖުކޮށްފިއެވެ. ހަވީރު 4:30 ގައި ފެށި ހޮޅުދޫގެ ރައްޔިތުން ކަޅު ހެދުމުގައި ނުކުމެ ފެށި އިހުތިޖާޖުގައި ޒަކިއްޔާގެ ތަހުގީގު ލަސްވާތީ އެކަމާ ނުރުހުން ފާޅުކޮށް، އިންސާފު އަވަސް ކުރަން ވަނީ ގޮވައިލައިފައެވެ. ޒަކިއްޔާއަކީ އަމިއްލައަށް މަރުވި މީހެއް ނޫން ކަމަށްބުނެ އިހުތިޖާޖުގެ ބައިވެރިއަކު ބުނީ، އެ މަރަށް އިންސާފު ނުލިބެނީސް އިހުތިޖާޖު ހުއްޓާނުލާނެ ކަމަށާއި މިއަދު ވެސް އެކަމުގެ ކަންބޮޑުވުން ޕޮލިހުންނާ ހިއްސާކުރި ކަމަށެވެ. ޒަކިއްޔާގެ މަރުގެ މައްސާލަގައި މިއަދު ހޮޅުދޫގައި ބޭއްވި އެއްވުމުގެ ތެރެއިން --- "ހޮޅުދޫގެ މަދު މީހަކު ނޫނީ ނިކުމެ މިތިބީ މިފަދަ ދެވަނަ ޒަކިއްްޔާއެއް ހޮޅުދޫ ފަސްގަނޑުން މިފަދަ ގޮަތަކަށް ފެންނަން ބޭނުންނުވާތީ، އެހެނަސް ހިތާމަޔާ އެއްކޮށް ދަންނަވާލަން ބޭނުންވަނީ މި އަޑުއަހާނެ އެއްވެސް ބަޔެއް ނެތޭ މިއޮތް ޕޮލިހުން ވެސް މި ރައްޔިތުންގެ ވާހަކަ އަޑެއް ނާހައޭ،" އެ ބައިވެރިޔާ ބުންޏެވެ. އެގޮތުން، ޒަކިއްޔާގެ މަރަށް ފަސް މަސްވާން ގާތްވެފައިވާއިރު، ހޮޅުދޫގައި އޮތް ނަފްސާނީ ބިރުވެރިކަން އިދާރާތަކަށް ގަބޫލުނުކުރެވޭ ކަމަށް އެ ބައިވެރިޔާ ބުންޏެވެ. "ފަހަރެއްގައި ވެސް މިއީ ޒަކިއްޔާ ވެގެން ކުރާ މަސައްކަތެއް ނޫން، އަޅުގަނޑުމެން އެހެން އިންސާނަކު ކަތިލާފައި އޮއްވައި ފެންނަން ބޭނުން ނުވާތީ ކުރާ މަސައްކަތެއް މިއީ،" ހޮޅުދޫގެ ފަސް ގަނޑުން ރައްކާތެރިކަމާއި ސަލާމަތްތެރިކަން ބޭނުންވާ ކަމަށް އެ ބައިވެރިޔާ ވަނީ ބުނެފައެވެ. މި އެއްވުމުގައި ބެނާތަކާއި ޕޯސްޓަރުތައް ބޭނުންކޮށްގެން ވަނީ ހޮޅުދޫ ރައްޔިތުން ޝުއޫރު ފާޅުކޮށްފައެވެ. ޒަކިއްޔާގެ މަރަށް އިންސާފަށް ގޮވާލައި، މިއަދު ހޮޅުދޫގައި ބޭއްވި އިހުތިޖާޖުގެ ތެރެއިން ---- ޒަކިއްޔާ މަރުވެފައި އޮއްވައި ފެނުނީ މިދިޔަ އަހަރުގެ ސެޕްޓެމްބަރު މަހުގެ 10ވަނަ ދުވަހުގެ ހެނދުނެވެ. މި މައްސަލައިގައި އޭނާ މަރާލީ ކަމަށާއި އެ ކަމުގައި އިންސާފު އަވަސްކޮށްދިނުމަށް އެދި ހޮޅުދޫގައި އެއްވުމެއް ވެސް ބޭއްވިއެވެ. ފުލުހުން ބުނި ގޮތުގައި ޑޮކްޓަރުގެ ބަހުން ޒަކިއްޔާ މަރުވާން ދިމާވި ސަބަބެއްގެ ގޮތުގައި ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކެވެ. އެހެން ނަމަވެސް މިހާތަނަށް އޭނާ މަރާލިކަމުގެ އެއްވެސް ހެއްކެއް ތަހުގީގަށް ފާހަގަކުރެވިފައި ނެތް ކަމަށް ފުލުހުން އޮތީ ބުނެފައެވެ. މި މައްސަލައިގައި ފުލުހުން ހާމަކުރި މައުލޫމާތަށް ބަލާއިރު، ޒަކިއްޔާގެ ކަރުގެ ކަނާތް އަދި ވައަތް ފަރާތަށް ފުންކޮށް ގިނަ ޒަޚަމްތަކެއް ލިބިފައި ހުއްޓެވެ. އަދި ކަރުގައި މެދާއި ހިސާބުގައި ތިލަކޮށް އެއް ޒަޚަމް ލިބިފައިވެއެވެ. ހޮޅުދޫގައި އަޑުއުފުލަނީ ---- އޭނާ މަރުވެފައި އޮތް ސީންގައި އޭނާގެ ކައިރީ އޮތް ވަޅިއާއި އޭނާގެ ހެދުމުގައި ވެސް ގިނަ އަދަދަކަށް ލޭ ހުއްޓެވެ. އަދި އެ ވަޅީގައި ހުރި ލެއަކީ ޒަކިއްޔާގެ ލޭ ކަމަށް ވެސް ތަހުގީގަށް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ. https://sun.mv/201718 އެހެންނަމަވެސް ޒަކިއްޔާގެ ކަރުގައި ފެންނަން ހުރި ޒަޚަމްތަކަކީ އެ ވަޅިން ލިބިފައިވާ ޒަޚަމްތަކެއްތޯ ނުވަތަ ނޫންތޯ ފުލުހުން ހާމައެއްނުކުރެއެވެ. ފުލުހުން ބުނި ގޮތުގައި އެ މައުލޫމާތުތައް ހިއްސާކުރެވޭނީ މުޅި ތަހުގީގު ނިމުމުންނެވެ. އޭގެ އިތުރުން، ޒަކިއްޔާ މަރުވެފައި އޮއްވާ ފެނުނު ތަނަށް އިތުރު މީހަކު ވަދެ އޭނާއަށް ހަމަލާދިން ކަމުގެ އެއްވެސް ނިޝާނެއް ވެސް ފެންނަން ނެތް ކަމަށް ވެސް ތަހުގީގަށް ފާހަގަވެފައިވާ ކަމަށް ފުލުހުން ވަނީ ބުނެފައެވެ. މަރުގެ ތަހުގީގުގައި ފުލުހުން މިހާރު ވަނީ އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) ބައިވެރިކޮށްފައެވެ.