މިއަދު ހިނގި އަލިފާނުގެ ހާދިސާގައި ވިނަރެސް ޓަވަރެއްގެ 13 ވަނަ ފަންގިފިލާގެ 6 ވަނަ އެޕާޓުމަންޓަށް ދިރިނޫޅެވޭ ވަރަށް ގެއްލުން ލިބިފައިވާ ކަމަށް މޯލްޑިވްސް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
ވީ ކިިހިނެއް؟ - މި އަލިފާނުގެ ހާދިސާ ހިނގާފައިވަނީ ހުޅުމާލޭ ދެވަނަ ފިޔަވަހީގެ ވިނަރެސް ޓަވަރު 9ގެ 13 ވަނަ ފަންގިފިލާގެ 6 ވަނަ އެޕާޓްމަންޓުގަ އެވެ. އެމްއެންޑީއެފް އިން ބުނި ގޮތުގައި:
އެ އެޕާޓުމަންޓުން ދުން އަރާކަމުގެ މައުލޫމާތު ލިބުނީ މިއަދު ހެނދުނު 7:41 ހާއިރު 
ރޯވި އަލިފާންގަނޑު މިހާރު ވަނީ ނިއްވާލާފައި 
މި ހާދިސާ ހިނގީ ގޮދަޑިއެއްގައި ރޯވެގެން
ތަފްސީލް - އެންޑީއެމްއޭ އިން ބުނި ގޮތުގައި، އެ އަލިފާނުގެ ހާދިސާގައި ލިބިފައިވާ ގެއްލުންތައް ބަލައި އެ އާއިލާއަށް އެހީތެރިކަން މިހާރު ވަނީ ފޯރުކޮށްދީފަ އެވެ. އެގޮތުން:
އެޕާޓްމަންޓް ވަނީ މީހުން ދިރިނޫޅެވޭ ވަރަށް ގެއްލުން ލިބިފައި
 އެޕާޓްމަންޓްގައި ދިރިއުޅޭ ހަތަރު މީހަކަށް 5 ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއުން ވަނީ ހަމަޖައްސައިދީފައި 
ދެ މީހަކަށް އަންނައުނު ވަނީ ފޯރުކޮށްދީފައި
މި ހާދިސާގައި އެޕާޓުމަންޓުގައި ދިރިއުޅުނު އެއްވެސް މީހަކަށް ގެއްލުން ލިބިފައެއް ނުވެ އެވެ.