ޗާގޯސް ނުވަތަ ފޯޅަވަހި ރާއްޖެއަށް ހޯދަން ދިވެހި ސަރުކާރުން މަސައްކަތްކުރާތީ ކަމަށް ބުނެ، ރާއްޖެއާ މޮރިޝަސްއިން ގުޅުން ކަނޑައިލުމަކީ އެ ގައުމުން ނިންމި ވަރަށް ތާކުން ތާކު ނުޖެހޭ، އޮއްޓަރެއް ނެތް ނިންމުމެއްގެ ގޮތުގައި، ރައީސް ޑރ. މުޙައްމަދު މުއިއްޒު މިއަދު ސިފަކުރައްވައިފިއެވެ. މިއަދު ބޭއްވެވި ނޫސްވެރިންގެ ބައްދަލުވުމުގައި، މޮރިޝަސްއިން ރާއްޖެއާ ގުޅުން ކެނޑި މައްސަލައިގައި ރައީސް ވިދާޅުވީ މޮރިޝަސްއިން ރާއްޖެއާއެކު ޚާރިޖީ ގުޅުން ކަނޑައިލަން ނިންމި ނިންމުމަކީ ވަރަށް "ތާކުންތާކު ނުޖެހޭ" އެއްވެސް އޮއްޓަރެއް ހުރި ނިންމުމެއް ނޫން ކަމަށެވެ. "މޮރިޝަސްއިން ރާއްޖެއާ ސިޔާސީ ގުޅުން ކަނޑައިލުމަކީ ވަރަށް ތާކުންތާކު ނުޖެހޭ، ވަރަށް އިމެޗުއާ، ނައީވް (އެއްވެސް އޮއްޓަރެއް ނެތް) ނިންމުމެއް. އެ ނިންމުން އެހެން ނިންމުމަކުން ހަގީގަތް ބަދަލެއް ނުވޭ. ރާއްޖެއާ ސިޔާސީ ގުޅުން ކަނޑައިލިޔަސް މޮރިޝަސްއަށް ހައްގުނޫން ތަނެއް މޮރިޝަސްއަކަށް ހައްގެއް ނުވާނެ،" ރައީސް ވިދާޅުވިއެވެ. އެ މަނިކުފާނު ވިދާޅުވީ އެއްވެސް ގައުމަކަށް އިނގިރޭސިވިލާތުން ޗާގޯސް ނުވަތަ ފޯޅަވަހި ހަވާލުކުރާނަމަ، އެ ތަނެއް ހައްގުވާނީ ރާއްޖެއަށް ކަމަށެވެ. އެއީ ހަގީގަތް ކަމަށާއި ގުޅުން ކަނޑައިލި ނަމަވެސް އެ ހަގީގަތް ބަދަލުނުވާނެ ކަމަށް ރައީސް ވިދާޅުވިއެވެ. "މަޝްވަރާ ކުރުމެއް ނެތި އަމިއްލަފުޅަށް ނިންމުން ނިންމީ، ވަރަށް ނައިވް (ހަރުދަނާ ކަމެއް ނެތް ނިންމުމެއް)،" ރައީސް ވިދާޅުވިއެވެ. އެމަނިކުފާނު ވިދާޅުވީ ރާއްޖޭގެ ސްޓޭންޑު ބަދަލުނުވާނެ ކަމަށާއި، ކުރިއަށްދާނީ 'މޯލްޑިވްސް ފަސްޓް' ޕޮލިސީއާއެކު ކަމަށެވެ. https://sun.mv/218464 މޮރިޝަސްއިން މިދިޔަ ހުކުރު ދުވަހު ވަނީ ރާއްޖެއާ ގުޅުން ކަނޑައިލައިފައެވެ. އެ ކަން ހާމަކުރީ އެ ގައުމުން އާންމުކުރި އެ ދުވަހުގެ ވަޒީރުންގެ މަޖިލީހުންގެ ނިންމުންތަކުގައެވެ. އޭގައިވާ ގޮތުން ގޮތުން ޗާގޯސް އައިލެންޑްސް ނުވަތަ ފޯޅަވައްސަކީ މޮރިޝަސްގެ ތަނެއްގެ ގޮތުގައި ބަލައިގަތުން ދިވެހިރާއްޖޭގެ ސަރުކާރުން ހުއްޓާލައި، އިނގިރޭސިވިލާތާއި މޮރިޝަސްއާ ދެމެދު ވެފައިވާ އެއްބަސްވުމަށް ރާއްޖެއިން މިހާރު ދަނީ ދެކޮޅު ހަދަމުންނެވެ. އެހެންވެ މޮރިޝަސްގެ ގައުމީ މަސްލަހަތު އިސްކޮށް، ދިވެހިރާއްޖެއާއެކު އޮތް ހުރިހާ ގުޅުންތަކެއް ވަގުތުން މެދުކަނޑާލުމަށް ނިންމީކަމަށް ވަނީ ބުނެފައެވެ. https://sun.mv/218482 ރައީސް ވިދާޅުވީ، ކުރީގެ ރަސްމީ ލިޔެކިއުންތަކުގައި ރާއްޖޭގެ ސިޔާދަތީ އިމުގެ ތެރޭގައި ފޯޅަވަހި ހިމަނައިފައިވާކަން ތާރީޚުން ކަށަވަރުވާ ކަމަށެވެ. އެ ކަންކަމާ އެކީގައި ޗާގޯސްގެ ރަށްތައް ކައިރިއަށް އޭރުވެސް މިހާރުވެސް ދިވެހި މަސްވެރިން މަހަށް ނިކުންނަ ކަމަށް ރައީސް ވިދާޅުވިއެވެ. އެހެންކަމުން، ޗާގޯސްގެ ރަށްތަކާއި ދިވެހީންގެ ދެމެދު ސިޔާދަތީ ގުޅުންތަކެއް އޮތްކަން ހާމަވާ ކަމަށް އެމަނިކުފާނު ވިދާޅުވިއެވެ. "އެހެންކަމުން ފޯޅަވައްސާއި ދިވެހިރާއްޖެއާ ދެމެދު ސިޔާދަތީ ގުޅުންތަކެއް އޮތްކަން މިފަދަ އެތައް ގޮތަކުން ކަށަވަރުވާތީ، ފޯޅަވަހީގެ މިލްކުވެރިކަން މޮރިޝަސްއަށް ދިނުމަށް އިނގިރޭސިވިލާތުން ނިންމި ނިންމުމަށް ދިވެހިރާއްޖޭން އިއުތިރާޒުކޮށް އެކަމާ ދިވެހި ދައުލަތުން ދެކޮޅު ހަދާކަން ބަޔާންކޮށް ދިވެހި ސަރުކާރުގެ ފަރާތުން ވާނީ އިނގިރޭސި ސަރުކާރަށް އަށެއް ނޮވެންބަރު 2024ގަ، އަދި 18 ޖެނުއަރީ 2026ގަ ލިޔުމުން ހުށަހަޅައިފައި،" މިދިޔަ މަހުގެ ފަސްވަނަ ދުވަހު ރިޔާސީ ބަޔާން އިއްވަވަމުން ރައީސް ވިދާޅުވިއެވެ.