މިއަދު މީސްތަކުން އެންމެ ބޮޑަށް އިހްމާލުވަނީ މަރަށް ތައްޔާރުވުމަށެވެ. މަރުވުމުން ވަޅުލެވި ފަސްގަނޑުތެރޭގައި ބަރުޒަޚުގެ ޢާލަމުގައި ހޭދަކުރަންޖެހޭނެ މުއްދަތަށާއި ކުރިމަތިލާންޖެހޭނެ ކަންކަމަށް ނުވިސްނެނީ މަރުވުމާއިމެދު ނުވިސްނޭތީއެވެ. 
ބައެއް މީހުން ނިދައިލާނެ އަރާމު އެނދާއި ގޮދަޑިއާއި އެފަދަ ތަކެތި ހޯދަން އެތައް ހާސް ރުފިޔާއެއް އެބަ ޚަރަދުކުރެއެވެ. ފަޤީރަކަށް އެންމެ ރުފިޔާއެއް ޞަދަޤާތްކޮށްލުން އެއީ ވަރަށް ބުރަކަމެއް ކަމަށް ދެކެމުން ދުނިޔޭގައި އެންމެ މަތީފެންވަރުގައި، އެންމެ އަރާމުގައި ނިދާނެ އެނދާއި ގޮދަޑިއާއި އެނޫންވެސް  ތަކެތި ގަންނަން އެތައް ހާސް ރުފިޔާއެއް އެބަ ޚަރަދުކުރެއެވެ.  
ކިތަންމެ ބޮޑު ހޭދައެއްކޮށްގެން ކިތަންމެ އަގު ބޮޑު އެނދެއް ހޯދައިގެން ކިތަންމެ އަރާމު ތަންމައްޗެއްގައި ނިދިނަމަވެސް ނިދޭނީ އެންމެ ދުވަހަށް ބެލިނަމަވެސް އެމީހަކު މަރުވަންދެންނެވެ. މީހެއްގެ ޢުމުރުން 100 އަހަރު ހަމަވަނީ މަދު މީހެއްގެއެވެ. އެވްރެޖް ޢުމުރަކީ 60 އަހަރާއި 70 އަހަރުކަމަށް ބެލެވެއެވެ. 
އެހިސާބުން މިޖެހެނީ މަރުވާށެވެ. މަރުވުމުން ރުހުނަސް ނުރުހުނަސް ޖެހޭނީ ހަމަ ވަޅުލެވޭށެވެ! މަރުވެ ޙިސާބު ބައްލަވައި ސުވަރުގެ ނުވަތަ ނަރަކައަށް ވައްދަވަންދެން ތިބާ އެތަންމައްޗެއްގައި އެންމެ ގިނަ ދުވަހު އޮންނާނެ ތަންމައްޗަކީ ބިމުގައި ހުރިވެއްޔެވެ. މަރުވީންސުރެ ޤިޔާމަތްވުމާއި ހަމައަށް އޮންނަންޖެހޭނެތީއެވެ. އަހުރެމެން އެފަސްގަނޑުގެ އަގުވަޒަންނުކޮށް ގުންފައި ޖަހަމުން ހިނގައި މިއުޅޭ ފަސްގަނޑެވެ! ޤަބޫލުކުރަން ކިތަންމެ ބޭނުން ނުވި ނަމަވެސް ޙަޤީޤަތަކީ މިއީއެވެ. 
ވީމާ އެތަންމައްޗަކީ އަރާމު ތަންމައްޗަކަށް ހަދަން މަސައްކަތްކުރާށެވެ! މާނައަކީ މަރުވެ ވަޅުލެވުމުން އޮންނަން ޖެހޭ ތަންމައްޗަކީ އަރާމު ތަންމައްޗަކަށް ހަދާށެވެ! އެކަމަށް ގަދައަޅައި މަސައްކަތްކުރާށެވެ! ތަންމަތި އަރާމުކަމުން ފަތިސް ނަމާދަށް ނުހޭލެވޭނަމަ އެތަންމައްޗަކީ އަރާމު ތަންމައްޗެއްކަމަށް ނުދެކޭށެވެ! އެއީ ތިބާގެ ހަލާކުކަމަށް ދެކޭށެވެ! 
ރަސޫލް (ﷺ) އަވަހާރަފުޅު ލެއްޕެވީ ބުރަކަށިފުޅުދަށުގައި އޮތް ކުނާފުޅުގެ ފާހަގަތައް ބުރަކަށިފުޅުން ފެންނަ ފަދަ ޙާލުކޮޅުގައެވެ. އެއަށްވުރެ އަރާމު ތަންމައްޗެއް ހަދިޔާކުރައްވަން ޞަޙާބީއަކު އުޅުއްވެވުމުން އެކަންވެސް ރަސޫލް (ﷺ) ވަނީ ޤަބޫލުފުޅު ނުކުރައްވަވައިފައެވެ. އެއްސަބަބަކީ ތަންމަތި އަރާމުވުމުން ނަމާދަށް ހޭފުޅުނުލެއްވެވިދާނެ ކަމެވެ. 
އެކަމުން އެނގިގެންދަނީ މުހިންމީ ނިދާނެ އަރާމުތަންމައްޗެއް ނޫން ކަމެވެ. ނިދީން ހޭލައި ދަމުނަމާދުކުރުމާއި ފަތިސް ނަމާދު އެ ނަމާދުގެ ވަޤުތުގައި ކުރުން ކަމެވެ! ނިދާނެ ތަންމަތި ހޯދާއިރު މިކަންކަމަށް ވިސްނައިގެން ކަންކަން ކުރާށެވެ! އެތައް ހާސް ރިޔާލައަކަށް ގަންނަ އަރާމު ތަންމައްޗަކަށްވުރެ ޞަދަޤާތްކުރާ އެންމެ ރިޔާލައަކުން ލިބޭނެ ފައިދާ އެތައް ގުނައެއް ބޮޑުވެދާނެއެވެ! 
މީގެ މާނައަކީ ތަނަވަސްކަން ހުރިނަމަ އަރާމު ތަންމައްޗެއްގައި ނުނިދުމެއް ނޫނެވެ. އަރާމު ތަންމައްޗެއް ހޯދުމަށްވުރެ ކައްވަޅާއި ޤިޔާމަތް ދުވަހުގެ އަރާމު ލިބިގަންނަން މަސައްކަތްކުރުމުގެ މުހިންމުކަމާއި އެކަމުން ކުރާނެ ފައިދާ މާބޮޑުކަން ބަޔާންކުރުމެވެ.
 
- އިސްލާމީ ތިލަފަތުގެ ދަރުސަކުން