ވޮޝިންޓަން (ނޮވެމްބަރު 1) - ބާރުގަދަ ތޫފާނެއްގައި ޖެހި ބަހާމާސް ކައިރި އަށް މިދިޔަ މަހު ގެއްލިފައިވާ އެމެރިކާގެ ކާގޯ ބޯޓު ކަނޑު އަޑީގައި އޮއްވާ ފެނިފައިވާ ކަމަށް ސާޗް ޓީމުން ބުނެފި އެވެ. ގާތްގަނޑަކަށް 790 ފޫޓުގެ ދިގު ބޯޓު 33 ފަޅުވެރިންނާ އެކު ގެއްލުނީ އެމެރިކާގެ ފްލޮރިޑާ އިން ޕިއުޓޯ ރިކާ އަށް ދަތުރު ކުރަނިކޮށެވެ. އެމެރިކާގެ ކަނޑުގެ ސިފައިންގެ މަނަވަރަކުން ބޭނުންކުރި ސޯނާ އިކްއިޕްމަންޓުގެ އެހީގައި ކަނޑުއަޑީގައި ބޯޓު އޮތްކަން ޔަގީންވެފައިވާ ކަމަށް އޮފިޝަލުން ބުނެ އެވެ. ބޯޓު އޮތީ 15،000 ފޫޓު އަޑީގަ އެވެ. އެލް ފާރޯ ނަމަކަށް ކިޔާ ކާގޯ ބޯޓު ހާލުގައި ޖެހުނުކަން އެންގީ އޮކްޓޯބަރު 1 ވަނަ ދުވަހު އެވެ. ބޯޓު ތޫފާނުގައި ޖެހުނު ކަމަށް ބެލެވެނީ އިންޖީނު ހުއްޓިގެން ބޯޓުގެ މިސްރާބު ބަދަލު ނުކުރެވިގެން ކަމަށް އޮފިޝަލުން ލަފާކޮށްފައިވެ އެވެ. ބޯޓު ގެއްލުނު ދުވަސްވަރު އެ ބޯޓުގެ ބައެއް ތަކެތި ކަނޑުމަތިން ފެނިފައިވެ އެވެ. އަދި އެކެއްގެ ހަށިގަނޑު ވެސް ފެނިފައިވެ އެވެ. އެމެރިކާގެ ނޭޝަނަލް ޓްރާންސްޕޮޓޭޝަން ސޭފްޓީ ބޯޑުން ބުނީ ރިމޯޓުން އޮޕަރޭޓްކުރާ ވެހިކަލެއް ކަނޑުއަޑި އަށް ފޮނުވައިގެން ބޯޓު އިތުރަށް ސާވޭ ކުރާނެ ކަމަށެވެ. އަދި ކަނޑުއަޑީގައި އޮތީ ގެއްލުނު ކާގޯ ބޯޓުކަން މުޅިން ޔަގީން ކުރެވިއްޖެ ނަމަ އެ ބޯޓުގެ ވޮޔޭޖް ޑޭޓާ ރެކޯޑަރު ނަގާނެ ކަމަށް ބުނެފައިވެ އެވެ.