ހޯމް މިނިސްޓަރު އުމަރު ނަސީރު ބަންދުގައި ބަހައްޓައިގެން ކްރިމިނަލް ކޯޓަށް ހާޒިރުކުރުމަށް ފުލުހުންގެ މައްޗަށް ނެރެފައިވާ އަމުރު އިސްތިއުނާފު ކުރުމަށް ހައިކޯޓަށް މިއަދު ހުށަހަޅައިފި އެވެ. މިދިޔަ ބުރާސްފަތި ދުވަހު ނެރުނު އެ އަމުރުގެ އިސްތިއުނާފުކުރުމަށް އުމަރު ހުށަހެޅި ނަމަވެސް އެ މައްސަލަ ހައިކޯޓުން އަދި ބަލައިގަތުމާ މެދު އަދި ގޮތެއް ނުނިންމާ ކަމަށް "ހަވީރަ"ށް ވަނީ އެނގިފަ އެވެ. އުމަރު ބަންދުގައި ބަހައްޓައިގެން ކޯޓަށް ހާޒިރުކުރުމަށް އަމުރު ނެރުނީ ރަސްމީ ދަތުރުފުޅެއްގައި ނެދަލެންޑްސްގައި ހުންނަވަނިކޮށެވެ. އުމަރު ނެދަލެންޑްސް އަށް ވަޑައިގަތީ، ރާއްޖެއަށް އެތެރެކުރާ މަސްތުވާތަކެތި ދެނެގަތުމަށް ބޭނުންވާ ކުއްތާ ހޯދުމުގެ އެންމެ ފަހުގެ ނިންމުންތައް ނިންމުމަށް ކަމަށް ހޯމް މިނިސްޓްރީން ވަނީ ބުނެފަ އެވެ. އެ ދަތުރުފުޅަށް ފަހު އޭނާ ރާއްޖެ ވަޑައިގަންނަވާނީ މާދަމާ އެވެ. އުމަރުގެ މައްޗަށް ދައުލަތުން ދައުވާ ކުރަނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު، އޭރުގެ އިދިކޮޅު ފަރާތްތަކުން ކުރި މުޒާހަރާއެއްގައި ދައުލަތުގެ އަމާންކަމަށް ގެއްލުން ލިބިދާނެ ފަދަ ވާހަކަ ދެއްކެވި ކަމަށް ބުނެ އެވެ. އެ ދައުވާއަށް އޭނާ އިންކާރު ކުރައްވަ އެވެ. މި މައްސަލާގައި މިދިޔަ އަންގާރަ ދުވަހާއި ބުރާސްފަތި ދުވަހު ބާއްވަން ހަމަޖެއްސި ޝަރީއަތް ވަނީ ކެންސަލްކޮށްފަ އެވެ. އަންގާރަ ދުވަހުގެ އަޑުއެހުން ކެންސަލްކުރީ އުމަރު ކޯޓަށް ވަޑައިނުގަތުމުންނެވެ. އޭރު އޭނާ ހުންނެވީ ނެދަލެންޑްސްގަ އެވެ. ބުރާސްފަތި ދުވަހުގެ ޝަރީއަތް ކެންސަލްކުރި ސަބަބު ސާފެއް ނުވެ އެވެ.