ގާނޫނު އަސާސީހިމާޔަތްކުރުމަށް ކަމަށް ވިދާޅުވެ ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް އިދިކޮޅު އެމްޑީޕީއާ "ކައިވެނިކުރީ" ވެރިކަމުގެ ދަހިވެތިކަމުގައި ގައުމުގެ ހަމަޖެހުން ނަގާލަން ކަމަށް ބުނެ ޕީޕީއެމުން ވަރަށް ބޮޑަށް އޭނާ އަށް ފާޑު ކިޔައިފި އެވެ. މިއީ، ރިޔާސީ އިންތިހާބު ޕީޕީއެމަށް ކާމިޔާބުކުރަން ޖުމްހޫރީ ޕާޓީއާ ޕީޕީއެމުން ހެދި ކޯލިޝަން ރޫޅުނު ފަހުން އާއްމު ޖަލްސާއެއްގައި، ފާޅުކަން ބޮޑު ގޮތެއްގައި ގާސިމަށް ޕީޕީއެމްގެ މެމްބަރުންގެ ބަހުގެ ހޫނު ހަމަލާތައް ރައްދުކުރި ފުރަތަމަ ފަހަރެވެ. ކޯލިޝަނާ އެކު ޕީޕީއެމަށް ވެރިކަން ލިބުމުން "ބަތަލަކަށް" ވި ގާސިމް، ޕީޕީއެމްގެ މެމްބަރުން ރޭ ސިފަކުރެއްވީ އަމިއްލަ އެދުމުގައި އުޅުއްވާ ގައުމުގެ ހަތުރެއް ކަމަށެވެ. މާލެ: ވެރިކަންކުރާ ޕީޕީއެމުން ޖެނުއަރީ 29، 2015 ގައި ކާނިވާ ސަރަހައްދުގައި ބޭއްވި ޖަލްސާ: ގާސިމްގެ ބޭނުމަކީ ގައުމުގައި ހަމަޖެހުން ނަގާލުން ކަމަށް ޕީޕީއެމްގެ ޕީޖީ މެމްބަރުން ވިދާޅުވި .-- ހަވީރު ފޮޓޯ: ނިޝާން އަލީ ގާސިމަށް ފާޑުވިދާޅުވެ، ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަހުމަދު ނިހާން ވިދާޅުވީ ގާސިމް ޕީޕީއެމް ކޯލިޝަނާ ގުޅިވަޑައިގަތުމުން އޭނާ އަށް ދޭން ޖެހުނު ފަޅު ރަށްތަކާއި ރިސޯޓްތަކުގެ އަދަދު ޓޫރިޒަމް މިނިސްޓަރު އަހުމަދު އަދީބަށް އެނގިވަޑައިގަންނަވާނެ ކަމަށެވެ. "އަޅުގަނޑުމެންގެ ބިލަކާ އެއްކޮޅަށް ވޯޓު ދެއްވުމަށް ފަހު އަނެއް ދުވަހު އަދީބު ބުނާނެ ވެއްޖެއޭ ފަޅު ރަށެއް ދޭން،" ގާސިމަށް އިޝާރާތްކުރައްވައި ނިހާން ވިދާޅުވި އެވެ. އޭނާ ވިދާޅުވީ ސިޔާސީ ބޭފުޅުން ކޯލިޝަންގައި ދަމަހައްޓަން، ފަޅުރަށްތަކާއި ލޯނު އެއްޗެހި ނުދެއްވަން ރައީސް ޔާމީން ނިންމެވި ނިންމެވުމަށް ފުރިހަމަ އަށް ތާއީދުކުރައްވާ ކަމަށެވެ. ޕީޕީއެމުން ރޭ ކާނިވާ ސަރަހައްދުގައި ބޭއްވި ޖަލްސާގައި ނިހާން ވާހަކަ ދައްކަވަނީ: ގާސިމަށް ސަރުކާރުން ލޯނާއި ފަޅުރަށްތައް ދޭން ޖެހުނު ކަމަށް ނިހާން ވިދާޅުވި. ---ހަވީރު ފޮޓޯ: ނިޝާން އަލީ ޕީޕީއެމްގެ ނައިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވީ ގާނޫނީ ވެރިކަމެއް ވައްޓާލައި މަގުމަތި ހަލަބޮލިކޮށްލަން 2004 ގައި ވެސް ގާސިމް މަސައްކަތްކުރެއްވި ކަމަށާއި އެކަމުގެ ހެކިތައް މިއަދާ ހަމަ އަށް ވެސް ފެންނަން އެބަހުރި ކަމަށެވެ. "މި އުޅެނީ ގާނޫނުއަސާސީ ހިމާޔަތްކުރުމަކަށް ނޫން، މިއުޅެނީ ތިމާގެ ސިނކުޑީގައި ރާއްޖޭގެ ވެރިކަން ނޫން ކަމެއް ނެތިގެން، ވެރިކަމާ ހެދި ދަންޖެހިގެން، އެކަމާ ހުރެ ދަންޖެހިގެން ރާއްޖޭގެ އަމާންކަން ނަގާލަން. މިއުޅެނީކީ ކޮންމެހެން ގާނޫނު އަސާސީ ހިމާޔަތްކުރުމަކަށް ނޫން،" އަބްދުއްރަހީމް ވިދާޅުވި އެވެ. އޭނާ ވިދާޅުވި ގޮތުގައި ކުރީގެ ރައީސް މުހައްމަދު ނަޝީދުގެ ސަރުކާރު ވެއްޓުމުން، އުފާފާޅުކޮށް، ދީނާއި ގައުމު ރައްކާތެރިވެއްޖެ ކަމަށް އެންމެ ފުރަތަމަ ވިދާޅުވީ ގާސިމް ކަމަށެވެ. އެންމެ ފަހުން ބޭއްވި ރިޔާސީ އިންތިހާބުގެ ފަހު ބުރުގައި ވެސް ގާސިމް ޕީޕީއެމަށް ތާއީދުކުރަން ނިންމީ ގައުމާއި ދީން އަދި ގާނޫނު އަސާސީ ހިމާޔަތްކުރުމަށް ކަމަށް ވިދާޅުވެ ކަމަށާއި ޕީޕީއެމުން "ފާހާނާ ސާފުކުރަން ހަވާލުކުރިއަސް" އެކަން ކުރައްވާނެ ކަމަށް ނަސަންދުރާގައި ބޭއްވި ބައްދަލުވުމެއްގައި ގާސިމް ވިދާޅުވެފައިވާ ކަމަށެވެ. ވެރިކަންކުރާ ޕީޕީއެމުން ރޭ ކާނިވާ ސަރަހައްދުގައި ބޭއްވި ޖަލްސާގައި އަބްދުއްރަހީމް ވާހަކަ ދައްކަވަނީ: ގާސިމް އެމްޑީޕީއާ ގުޅިވަޑައިގަތީ ވެރިކަމުގެ ދަހިވެތިކަމުގައި ކަމަށް އަބްދުއްރަހީމް ވިދާޅުވި. .- ހަވީރު ފޮޓޯ: ނިޝާން އަލީ "ފައިސާ ހަރަދުކޮށްގެން ވެރިކަން ލިބޭ ނަމަ އެމަނިކުފާނަށް [ގާސިމަށް] ވެރިކަން ލިބިވަޑައިގަންނަވާނެކަން އެންމެ ރަނގަޅަށް އެނގިވަޑައިގަންނަވާނެ ބޭފުޅަކީ ވެސް އެއީ. ލައްކަ ފައިސާ ހޭދަކުރައްވައިފި. އެކަމަކު ވެރިކަމެއް ނުލިބުނު،" އޭނާ ވިދާޅުވި އެވެ. އަބްދުއްރަހީމް ވިދާޅުވީ އެމްޑީޕީގެ ވެރިކަމުގައި، ގާނޫނުއަސާސީ ހިމާޔަތްކުރުމަށް ނުކުތީ ގާނޫނުއަސާސީއާ ހިލާފަށް ކަންތައްތަކެއް ހިނގަމުންދާ ކަމަށް ޝަރުއީ ކޯޓުތަކުން ހުކުމްކޮށްފައިވާތީ އެވެ. އެކަމަކު ގާނޫނު އަސާސީ ހިމާޔަތްކުރުމަށް ކަމަށް ބުނެ އެމްޑީޕީ އާއި ޖުމްހޫރީ ޕާޓީ މިހާރު ގުޅިގެން އުޅެނީ އެއްވެސް ކަމެއް ގާނޫނުއަސާސީއާ ހިލާފަށް ކުރާތީ ނޫން ކަމަށް ވެސް އަބްދުއްރަހީމް ވިދާޅުވި އެވެ.