ހޭންޑްބޯލް މޯލްޑިވްސްއިން އިންތިޒާމްކޮށްގެން ބާއްވާ ފުރަތަމަ ފަހަރަށް ރާއްޖޭގައި ބާއްވާ އިންޓަރ ސްކޫލް ހޭންޑްބޯލް މުބާރާތުގައި މިހާތަނަށް ހަ ސްކޫލަކުން 18 ޓީމު ބައިވެރިވެއްޖެއެވެ.
އޭޕްރީލް މަހު ބޭއްވުމަށް ހަމަޖެހިފައިވާ އިންޓަރ ސްކޫލް ހޭންޑްބޯލް މުބާރާތަކީ ތިން އުމުރުފުރާއަކަށް ހާއްސަކޮށްގެން ކުރިއަށްގެންދާ މުބާރާތެކެވެ. މިމުބާރާތް ކުރިއަށްދާނީ 12 އަހަރުން ދަށް، 14 އަހަރުން ދަށް އަދި 16 އަހަރުން ދަށަށް ކަމަށް ހޭންޑްބޯލް މޯލްޑިވްސްއިން މައުލޫމާތު ދެއެވެ.
ސްކޫލް ކުދިންނަށް ހޭންޑްބޯލް އުނގަންނައިދީ، ރާއްޖޭގައި ހޭންޑްބޯލް އާލާކުރުމުގެ މަގްސަދުގައި ބާއްވާ މިމުބާރާތުގައި ވާދަކުރާ ޓީމުތަކަށް އިއްޔެ ވަނީ މައުލޫމާތު ދީފައެވެ. އިއްޔަ އަރަބިއްޔާ ސްކޫލްގައި ބޭއްވި ރަސްމިއްޔާތުގައި މުބާރާތުގެ ގަވާއިދުތަކާ ބެހޭގޮތުން މައުލޫމާތު ދިން އިރު، ސްކޫލްތަކަށް ވަނީ ހޭންޑްބޯލް ވެސް ހަދިޔާކޮށްފައެވެ.
އިންޓަރ ސްކޫލް މުބާރާތުގެ ކުރިން ހޭންޑްބޯލް މޯލްޑިވްސްއިން ދެ ހަރަކާތެއް ކުރިއަށް ގެންދިއުމަށް ވަނީ ނިންމައިފައެވެ. އަންނަ މަހު ކޯޗިންގް ކޯހެއް ކުރިއަށްގެންދިއުމަށް ނިންމާފައިވާއިރު، އޭޕްރީލްމަހު ކުރީކޮޅު ގައުމީ ހޭންޑްބޯލް ޓީމު ލަންކާގައި ކޭމްޕްކުރާގޮތަށް ހަމަޖެހިފައިވެއެވެ.